وندا الەمنىڭ 13 ەلىنەن كەلگەن 100 استام ۇكىمەت وكىلدەرى مەن ساراپشىلار باس قوستى. شارا بارىسىندا استاناداعى مەملەكەتتىك قىزمەت سالاسىنداعى وڭىرلىك حاب پەن قىتايدىڭ مەملەكەتتىك باسقارۋ اكادەمياسى مەموراندۋمعا قول قويدى. سەمينار ەلدەردىڭ جالپى دامۋى مەن ىنتىماقتاستىق اياسىن كەڭەيتۋگە زياتكەرلىك قولداۋ كورسەتۋ ماقساتىندا وتكىزىلدى. ونىڭ اشىلۋ سالتاناتىندا وڭىرلىك حابتىڭ باسقارۋشى كوميتەت توراعاسى ءاليحان بايمەنوۆ ءسوز سويلەدى.
ء«وزارا ىقپالداسۋ جانە ءوزارا تاۋەلدىلىكپەن سيپاتتالاتىن وركەنيەتتىڭ قازىرگى دامۋ كەزەڭى ادامزاتتىڭ بولاشاعى ءۇشىن ورتاق جاۋاپكەرشىلىك ماسەلەسىن جاڭا دەڭگەيگە كوتەرەدى, جاھاندىق جانە ايماقتىق ىنتىماقتاستىقتى جانداندىرۋ جالپى دامۋدى قامتاماسىز ەتۋدە ماڭىزعا يە», - دەپ اتاپ ءوتتى ءاليحان بايمەنوۆ. «كەز-كەلگەن يننوۆاتسيا, الەمنىڭ قاي تۇكپىرىندە شىقسا دا, ول - ادامزاتقا ورتاق يگىلىك, الەمنىڭ دە دامۋىنا قىزمەت ەتۋى ءتيىس. بارلىعىنىڭ اشىق, يننوۆاتسيالىق جانە جان-جاقتى دامۋى يدەياسى بۇۇ-نىڭ تۇراقتى دامۋ ماقساتتارىندا دا كورىنىس تاپقان», - دەدى باسقارۋ كوميتەت توراعاسى. ونىڭ ايتۋىنشا, تاعدىرى ورتاق جاھاندىق قاۋىمداستىق قۇرۋ تۇجىرىمداماسى مەن دامۋ ماقساتتارىن جۇزەگە اسىرۋدا پروگرەسس كوبىنە باسقارۋ ينستيتۋتتارى تيىمدىلىگىنە تاۋەلدى.
«تەڭ تەڭىمەن» قاعيداتى بويىنشا تاجىريبە الماسۋ, ورتاق زەرتتەۋلەر جاساۋ, سونداي-اق, ارىپتەستىكتى دامىتۋ ۇكىمەتتىڭ مەملەكەتتىك باسقارۋ تيىمدىلىگىن ارتتىرۋ بويىنشا ۇكىمەتتەردىڭ ۇمتىلىستارىنا سەرپىن بەرەدى. سوندىقتان, قازاقستان ۇكىمەتى مەن بۇۇ دامۋ باعدارلاماسى استاناداعى وڭىرلىك حابتى قۇرۋ باستاماسىن كوتەردى», - دەدى ءاليحان بايمەنوۆ. قازىرگى تاڭدا حابتا امەريكا, ەو, تمد, كاۆكاز جانە اسەان ەلدەرىن قوسا العاندا 38 قاتىسۋشى مەملەكەت بار. قىتاي – حابتىڭ قۇرىلتايشىلارىنىڭ ءارى بەلسەندى قاتىسۋشىلارىنىڭ ءبىرى.
سەمينار اۋقىمىندا حاب پەن الەمدەگى مەملەكەتتىك باسقارۋ سالاسىنداعى ءىرى ءبىلىم جانە عىلىمي زەرتتەۋ ينستيتۋتتارىنىڭ ءبىرى – قىتايدىڭ مەملەكەتتىك باسقارۋ اكادەمياسى اراسىندا مەموراندۋمعا قول قويىلدى. بۇل - ەكى ۇيىم ىنتىماقتاستىعىنىڭ جاڭا كەزەڭگە شىعۋىنىڭ باستاۋى.
اكادەميانىڭ اتقارۋشى ۆيتسە-پرەزيدەنتى (ۆيتسە-مينيستر) ما دزەنتان اكادەميانىڭ مەملەكەتتىك قىزمەت سالاسىنداعى تاجىريبە جانە ءبىلىم الماسۋدىڭ ماڭىزدى حالىقارالىق ورتالىعى سانالاتىن استانا حابىمەن ارىپتەستىكتى تەرەڭدەتۋ جانە كەڭەيتۋ بويىنشا ىقىلاسىن جەتكىزدى. ءاليحان بايمەنوۆ ءوز كەزەگىندە اكادەمياعا حابتىڭ مەرزىمدى باسىلىمى – مەملەكەتتىك قىزمەت رەفورماسى مەن پراكتيكاسى حالىقارالىق جۋرنالىنىڭ قىتايداعى اكىمشىلىك رەفورمالارعا ارنالعان ارنايى شىعارىلىمىن تارتۋ ەتتى. تاراپتار بىرلەسكەن شارالاردىڭ تيىمدىلىگىن اتاپ ءوتىپ, ولاردىڭ الداعى پەرسپەكتيۆالارىن, ونىڭ ىشىندە مەملەكەتتىك قىزمەتكەرلەر الەۋەتىن كوتەرۋ, عىلىمي زەرتتەۋلەر جاساۋ, عىلىمي ەڭبەكتەر مەن زەرتتەۋلەر ناتيجەلەرىمەن الماسۋ ماسەلەلەرىن تالقىلادى.
مەملەكەتتىك باسقارۋ بويىنشا بۇل سەمينار بريكس (برازيليا, رەسەي, ءۇندىستان, قىتاي, وار) ەلدەرى باسشىلارىنىڭ بيىل قىركۇيەكتە سيامەندە وتەتىن كەزدەسۋى قارساڭىندا وتكىزىلدى.
