– 2016 جىلى قاراعايلى اۋدانىنا سۋ تارتتىق, – دەيدى نيكولاي لۋكين. – جوبانى قولعا العان ۇيىمنىڭ اكىمشىسى رەتىندە مەن بۇل قۇرىلىس-جوندەۋ جۇمىستارىن مەردىگەر مەكەمە دۇرىس ورىندادى دەپ ايتا الامىن. جان-جاقتى تەكسەرگەن مەكەمەلەردىڭ تالاپ-تىلەكتەرى تۇگەلدەي ەسكەرىلدى. قاراعايلىدا ەكى ارالىق ستانسانى جارىقتاندىرۋ جۇمىستارى عانا قالىپ وتىر. جانە قارجاۋباي ۇلى كوشەسى مەن پاۆلودار قالاسىنا شىعاتىن تراسسانى اسفالتتاۋ جۇمىستارى دا الداعى ۋاقىتتىڭ ەنشىسىندە.
سونىمەن, «نۇرلى جول» باعدارلاماسى بويىنشا 2017 جىلى سەمەيدە زاتون اۋماعىنداعى قۇرىلىس-جوندەۋ جۇمىستارىنان بولەك, قاينار اۋىلىنىڭ دا سۋ جۇيەلەرىن جوندەۋ ماسەلەسى تۇر. جانە ۆوستوچنىي كەنتىنە سۋ قۇبىرىن تارتۋ, ءشۇلبى كەنتىندەگى سۋ تازالاۋ قوندىرعىسىن جوندەۋدەن وتكىزۋ كەرەك. شۇلبىدەگى سۋ تازالاۋ قوندىرعىسىنىڭ قۇرىلىس جۇمىستارى وسىدان ءبىر اي بۇرىن باستالسا كەرەك. وسى ۋاقىت ارالىعىندا جۇمىسشىلار جۇمىس كەستەسىنەن ءبىرشاما قالىپ قويىپتى. اقشالاي شاققاندا بۇل كەشىگۋ 139 ملن تەڭگە بولىپ شىعادى ەكەن. جانە ۆوستوچنىي كەنتىنىڭ دە سۋ قۇبىرىن جوندەۋ جۇمىستارى ءبىراز كەشىگۋدە.
– قاينار اۋىلىنداعى كۇردەلى جاعداي دەپۋتاتتاردىڭ باستى نازارىندا, – دەدى «نۇر وتان» پارتياسىنىڭ سەمەي قالالىق فيليالى توراعاسىنىڭ ورىنباسارى زۋلفيا جاماليتدينوۆا, – دەپۋتاتتاردىڭ سىنعا العاندارىنان مىسالعا كەلتىرسەك, اۋىلدا سۋ قۇبىرلارىن تارتۋ مۇلدە دۇرىس قولعا الىنباپتى. قايناردىڭ كوشەلەرى قازىلعان كۇيى تۇر. قازىلعان جەردىڭ ۇزىندىعى 18 شاقىرىمدى قۇرايدى. تەك 5,5 شاقىرىمىنا عانا قۇبىرلار سالىنعان. بۇل جەردە ەندى نە تەحنيكا, نە جۇمىسشىلار جوق. ال ادامدار قازىلعان كوشەلەردەن ابايلاپ جۇرۋگە ءماجبۇر, بالالارى نە وزدەرى شۇڭقىرعا ءتۇسىپ كەتىپ, جازىم بولار دەپ قورقادى.
– بۇل ءۇشىن مەردىگەرلەردى جاۋاپكەرشىلىككە شاقىرامىز, – دەدى نيكولاي لۋكين, – ەگەر ءبىز كەلىسىمشارتتى بۇزىپ, قايتادان تەندەر جاريالاساق, قاينار اۋىلىنىڭ قۇبىرى كەلەر جىلدىڭ سوڭىندا دا بىتپەۋى مۇمكىن. سەبەبى, وسىنداي كونكۋرستاردىڭ ءوتۋ مەرزىمى ۇزاق. «نۇرلى جول» باعدارلاماسى بويىنشا 2017 جىلعا جوبالانعان كوپتەگەن قۇرىلىس جانە جوندەۋ جۇمىستارىنىڭ سوزىلىپ كەتىپ, ۋاقتىلى اياقتالماۋىنا سەبەپ بولىپ وتىر. ءبىز بيىل كونكۋرس اياقتالعان سوڭ, شىلدە ايىنىڭ سوڭىندا عانا كەلىسىمشارتتى بەكىتتىك. ءسويتىپ, مەردىگەرلەر جۇمىسقا جاز اۋا كىرىستى.
– ءبىز پارلامەنت ءماجىلىسىنىڭ دەپۋتاتتارى الدىندا مەملەكەتتىك تاپسىرىس جانە ساتىپ الۋ تۋرالى زاڭدىلىقتاردىڭ كونكۋرستىق شارتتارىن وزگەرتۋ تۋرالى ماسەلەنى ۇنەمى ايتۋدامىز, − دەدى «نۇر وتان» پارتياسىنىڭ سەمەي قالالىق فيليالى توراعاسىنىڭ ورىنباسارى زۋلفيا جاماليتدينوۆا, – ءتىپتى كەشە عانا ءماجىلىس دەپۋتاتى ۆاسيلي ولەينيك كەلدى. تاعى دا وسى كونكۋرس مەرزىمىن نازارعا الۋدى ۇسىندىق. قازىرگى ۋاقىتتاعى مەملەكەتتىك تاپسىرىس بويىنشا وتەتىن كونكۋرس مەرزىمدەرىنىڭ ەداۋىر سوزىلىپ كەتەتىندىگىنە وراي بولىنگەن قارجىعا اتقارىلاتىن جۇمىستار كەشىگىپ جاتادى. ءسويتىپ, كوبىنە اسىعىستىقپەن اتقارىلعان جۇمىستاردىڭ ساپاسى ناشار بولىپ شىعىپ, مەملەكەت قارجىسى قايتادان شىعىن بولادى.
راۋشان نۇعمانبەك
سەمەي
