جۋىردا عانا قازاقستان رەسپۋبليكاسى اۋىل شارۋاشىلىعى مينيسترلىگىنىڭ سۋ رەسۋرستارى كوميتەتىنىڭ توراعاسى يسلام ابىشەۆ باستاعان سۋ سالاسىنىڭ ءبىر توپ مامانى اقمولا وبلىسىنىڭ ەسىل اۋدانىندا بولدى. مەملەكەت باسشىسى ن.نازارباەۆتىڭ ارنايى تاپسىرماسى بويىنشا كوميتەت توراعاسى كوكتەم كەلسە ارناسىنان تاسىپ, ءوڭىردىڭ جانە پەتروپاۆل وبلىسىنىڭ كەي ايماعىن دا شايىپ كەتەتىن وزەن اۋماعىن باقىلاپ, قۇنى 13 ملرد. تەڭگەنى قۇرايتىن جاڭا جوبانى جەرگىلىكتى بيلىك وكىلدەرى جانە وسى سالانىڭ كانىگى ماماندارىمەن بىرگە اقىلداسىپ قايتتى. كارتاعا ءۇڭىلىپ, ءار جەرگە ءبىر توقتاپ ماڭايىن باقىلاعان مامانداردىڭ سوزىنەن ۇققانىمىز سۋ رەتتەۋىش ارقىلى الداعى جىلدارى توپان سۋعا توسقاۋىل قويىلماق. ياعني, 1 ملرد. تەكشە مەتر سۋدى ۇستاپ قالاتىن جاڭا قۇرىلعى جاقىن ماڭداعى, ءتىپتى, پەتروپاۆل وبلىسىنىڭ كەي ايماعىن تاسقىن سۋدىڭ قاۋپىنەن قورعاۋعا مۇمكىندىك بەرەدى.
- ارينە, بيىل عانا ويعا الىپ, ەسكەرىپ وتىرمىز دەپ ايتۋعا استە بولمايدى. اتالعان جوبا العاش 1975 جىلى قولعا الىنعان. بىراق, بارىمىزگە بەلگىلى, وتكەن عاسىردىڭ 80-جىلدارى كەڭەس وداعىنىڭ ەكونوميكالىق حال-احۋالىنىڭ تومەندەي باستاعان كەزى بولاتىن. ودان ءارى كسرو ىدىراپ, ەگەمەندىگىمىزگە قول جەتكىزدىك. ءدال سول ەس جيىپ, ەتەك-جەڭىمىزدى جيناي باستاعان ۋاقىتتا بىزگە حالىقتىڭ الەۋەتىن كوتەرۋ باستى ماقساتقا اينالىپ, مىنا جوبا كەيىنگە قالا بەردى. ونىڭ ۇستىنە بۇگىنگىدەي تەحنولوگيا دا, ماماندار دا بۇدان 20-25 جىل بۇرىن بولماعاندىقتان, سۋ رەتتەۋىشتى ورناتا سالۋ دا وڭاي شارۋا ەمەس. ماسەلەن, وسى اقمولا وبلىسىنىڭ ەسىل اۋدانى ارقىلى وتەتىن 16 كم. تەمىر جول, 70 كيلومەترگە دەيىن سوزىلىپ جاتقان ەلەكتر جەلىسى, بىرنەشە شاقىرىم اۆتوكولىك جولى مەن كوپىردى بۇزىپ اۋىستىرۋ مەملەكەتىمىزدى قانشاما شىعىنعا ۇشىراتاتىنىن باعامداي بەرىڭىز. ال, قازىر ەلىمىزدىڭ سۋ سالاسىندا ۇزاق جىلدىق تاجىريبەسى بار ماماندارى, گەودەزيستەر مۇنىڭ وڭتايلى شەشىمىن تاپتى,-دەيدى ي.ابىشەۆ.
قىركۇيەك ايىنىڭ سوڭىنا دەيىن جان-جاقتى تالقىلانىپ, قازىعى قاعىلاتىن جوبا كەلەسى جىلى تولىقتاي قولعا الىنباق. دەمەك, الداعى جىلداردان باستاپ ايماق تۇرعىندارى الاڭسىز ۇيىقتاپ, كۇنىن كۇلكىمەن, قۋانىشپەن وتكىزە الادى دەگەن ءسوز. سونداي-اق, ماماندار جينالعان سۋدى اۋىل شارۋاشىلىعى جانە كەلەشەكتە اشىلاتىن ءوندىرىس وشاقتارىنا پايدالانۋدى جوسپارلاپ وتىر.
ەرمۇرات نازار ۇلى,
اقمولا وبلىسى
