«سامۇرىق-قازىنا» ۇاق» اق جانە «سامۇرىق-قازىنا كونتراكت» جشس ۇيىمدارىنىڭ رەسمي سايتتارىندا 64 تاۋار, جۇمىس جانە قىزمەتتەن تۇراتىن ءتىزىم جاريالاندى. اتالعان ءتىزىم بويىنشا قاجەت دۇنيەنى ۇلتتىق كومپانيالار بۇدان بىلاي تەك الدىن الا بىلىكتىلىك راسىمىنەن وتكەن ۇيىمداردان ساتىپ الاتىن بولادى. قۇجات اقتىق ەمەس, ول ءاردايىم تولىقتىرىلىپ وتىرادى. الداعى ۋاقىتتا ۇلتتىق كومپانيالاردىڭ بارلىق ساتىپ الۋ ىستەرى الدىن الا بىلىكتىلىگى بويىنشا ىرىكتەۋ تىزىمىنە ەنگەن كاسىپكەرلەردىڭ اراسىندا عانا جۇرگىزىلەدى.
مىڭنان استام جەكەمەنشىك قازاقستاندىق كومپانيا الدىن الا بىلىكتىلىگى بويىنشا ىرىكتەۋدەن ءوتىپ, «سامۇرىق-قازىنا» حولدينگىنىڭ سەنىمدى جەتكىزۋشىلەرىنىڭ پۋلىنا كىردى. ولاردىڭ اراسىندا جاڭاوزەن قالاسىندا ورنالاسقان, مۇناي كومپانيالارىنا قۇرىلىس-مونتاج جۇمىستارى بويىنشا قىزمەت كورسەتەتىن «نۋر-بارس.ن» جشس بار. ماڭعىستاۋ وبلىسىنداعى بۇل ۇيىمنىڭ قارجى ديرەكتورى ايناگۇل احمەتدينوۆا جەتكىزۋشىلەردى ىرىكتەۋدىڭ جاڭا قۇرالىنا قاتىستى ءوز ويىمەن ءبولىستى. «بىزگە الدىن الا بىلىكتىلىگى بويىنشا ىرىكتەۋدەن ءوتۋ وڭاي بولعان جوق. بىراق قايتا تاپسىرماي, ءبىرىنشى رەتتەن سوڭ ماقساتىمىزعا جەتتىك. بۇل وتە دۇرىس قۇرال دەپ ويلايمىن. مىسالى, ءبىز ءوز كەمشىلىكتەرىمىزدى كورىپ, ولاردى تۇزەتتىك. تەحنيكالىق اۋديت – وتە قيىن پروتسەدۋرا, ودان ءوتۋ بيزنەسىمىزگە پايداسىن تيگىزدى», دەپ اتاپ ءوتتى ول.
الدىن الا بىلىكتىلىگى بويىنشا ىرىكتەۋ راسىمىنەن «Kaztranscom» جشس دە ءوتتى. بۇل – ينتەرنەت جەلىسى, تەلەفون, جۇيەلىك ينتەگراتسيا جانە تەلەكوممۋنيكاتسيالىق قۇرال-جابدىققا تەحنيكالىق قىزمەت كورسەتۋ سەكىلدى دۇنيەلەردى ۇسىناتىن تەلەكوممۋنيكاتسيالىق كومپانيا. حولدينگتىڭ بىلىكتى جەتكىزۋشىلەرىنىڭ پۋلىنا كىرۋ اتالعان ۇيىمعا «سامۇرىق-قازىنانىڭ» سەنىمدى سەرىكتەسى مارتەبەسىنە يە بولۋعا مۇمكىندىك بەردى.
ء«يا, الدىن الا بىلىكتىلىگى بويىنشا ىرىكتەۋ – بۇل ۇلكەن جۇمىس, كوپ ەڭبەكتى قاجەت ەتەدى. جالپى العاندا, ءبىز ۇلكەن كۇش سالىپ قينالمادىق, سەبەبى, ۇيىمدا حالىقارالىق ستاندارتتارعا ساي مەنەدجمەنت جۇيەسى بار, بارلىق بيزنەس-ۇدەرىستەر رەتكە كەلتىرىلگەن. ءتورت حالىقارالىق ISO ستاندارتى بويىنشا سەرتيفيكاتتالعانبىز. اتالعان قۇجاتتاردى تاپسىرۋدا قيىندىقتار بولمادى», دەيدى باسقارۋشى ديرەكتور – كومپانيا فيليالدارىنىڭ قىزمەتىن ۇيلەستىرۋشى قارلىعاش سۇلتانبەكوۆا.
الدىن الا بىلىكتىلىگى بويىنشا ىرىكتەۋ قورداعى ساتىپ الۋ ءراسىمىن وتكىزۋدىڭ ساپاسىن ارتتىرۋ جانە جۇمسالاتىن ۋاقىتتى وڭتايلاندىرۋ ماقساتىندا ەنگىزىلىپ وتىر. جاڭا مەحانيزم باسەكەلەستىكتى ارتتىرىپ, جالعان كاسىپكەرلەر مەن بىركۇندىك كومپانيالار ءۇشىن كەدەرگى بولادى. پروتسەستى حولدينگتىڭ ساتىپ الۋ جۇيەسىنىڭ دامۋىنا جاۋاپ بەرەتىن «سامۇرىق-قازىنا كونتراكت» جشس جۇرگىزىپ, باقىلاپ وتىرادى.
«سامۇرىق-قازىنا كونتراكت» جشس الدىن الا بىلىكتىلىگى بويىنشا ىرىكتەۋ دەپارتامەنتىنىڭ ديرەكتورى ەلدار دوسكەنوۆتىڭ سوزىنە قاراعاندا, سەنىمدى جەتكىزۋشىلەر توبىن قالىپتاستىرۋ حالىقارالىق بيزنەستە كەڭ تارالعان ەكەن. بۇل ىرىكتەۋدەن وتكەن كاسىپكەرلەر حولدينگتىڭ ساتىپ الۋ جۇمىستارىنا كەم دەگەندە ءۇش جىل بويى قاتىسۋ مۇمكىندىگىنە يە بولادى.
ساراپشى تەندەرگە قاتىسۋ ءۇشىن ساتىپ الۋ سوماسىنىڭ 1%-ىنا تەڭ قاراجات تۇرىندەگى قامتاماسىزداندىرۋدى ەنگىزۋ بۇدان بىلاي قاجەت ەمەس ەكەنىن ىرىكتەۋدەن وتكەن كاسىپكەرلەرگە ارنالعان تاعى ءبىر وڭ جاڭالىق رەتىندە ءتۇسىندىردى. مىسالى, 500 ملن تەڭگەگە قىزمەت نەمەسە تاۋار ساتىپ الۋ ىسىندە جوعارىداعى سوما 5 ملن تەڭگەنى قۇرايدى. سونىمەن قاتار ەلەكتروندى جۇيە كومەگىمەن «سامۇرىق-قازىنا» حولدينگىنىڭ تاپسىرىس بەرۋشىلەرى وتكىزىپ جاتقان ساتىپ الۋ ىستەرى تۋرالى كاسىپكەرلەردى قۇلاعدار قىلىپ وتىرادى.
«الدىن الا بىلىكتىلىگى بويىنشا ىرىكتەۋدەن وتكەن ۇمىتكەر جەتكىزۋشىگە ءار ساتىپ الۋ بويىنشا تاعايىنداۋ (سايلاۋ) تۋرالى جارلىق, جارعى, زاڭدى تۇلعانى تىركەۋ تۋرالى كۋالىك سەكىلدى ستاندارتتى قۇجاتتار توپتاماسىن جيناۋدىڭ قاجەتى جوق. بۇل نوتاريالدى كۋالاندىرۋعا كەتەتىن شىعىندى بارىنشا ازايتىپ, تاپسىرىستى ورىنداي الاتىن ۇيىمدار قىزمەتىنەن ورىنسىز سەبەپتەرگە بايلانىستى باس تارتۋدىڭ الدىن الادى», دەپ ءتۇسىندىردى دوسكەنوۆ.
بۇگىنگى كۇنى ىرىكتەۋ جۇيەسىندە (www.pko.skc.kz) 6 مىڭداي قولدانۋشى تىركەلگەن. ىرىكتەۋدەن ءوتۋدى جوسپارلاپ وتىرعان ۇمىتكەر جەتكىزۋشىلەر «سامۇرىق-قازىنا كونتراكت» سايتىنداعى وقىتۋ ماتەريالدارىمەن تانىسا الادى.
اسحات رايقۇل,
«ەگەمەن قازاقستان»
