اقىننىڭ الپىس جىلدىعىنا ارنالعان كەش تە ءوتتى. استانادا. «مولدىرەگەن باستاۋىڭ بوپ, باستاۋىڭ بوپ قالايىن» − دەپ جىرلاعانىنداي, كىل ءمولدىر ولەڭدەرى وقىلدى. بۇل جولى سايدىڭ تاسىنداي جاس اقىندار شىقتى ساحناعا. تابيعاتتى اداممەن, ادام تاعدىرىمەن شەندەستىرىپ جىرلايتىن, جىلدىڭ بارلىق مەزگىلىنە ارنالعان ولەڭدەرىنەن مۇڭ مەن ساعىنىشتىڭ, ادەمى اڭساۋلاردىڭ, جىپ-جىلى مەيىرىمنىڭ لەبى ەسىپ تۇراتىن, ۇلتتىق مەنتاليتەتىمىزدىڭ ەرەكشەلىكتەرىن «مەنىڭ درامام», «ادام», «ەركەك», «انانىڭ ايداھارى بار», ء«بىزدىڭ ەلدىڭ جىلقىسى كىل كوكمويناق» اتتى كوپتەگەن درامالىق جىرلارمەن بەدەرلەگەن اقىننىڭ تۋىندىلارى وقىرمانداردىڭ جۇرەگىنە جەتىپ جاتتى.
كەش بارىسىندا اقىن تۋرالى ون مينۋتتىق دەرەكتى فيلم كورسەتىلدى. ن.ءجانتورين اتىنداعى ماڭعىستاۋ وبلىستىق مۋزىكالىق-دراما تەاترىنىڭ ارتىستەرى ونىڭ بىرلىك پەن ەرلىكتى تۋ ەتكەن تۇركى جۇرتىنىڭ ءومىر ءسۇرۋ قالىبىن, ار-يمان, وبال-ساۋاپ, باق پەن سور ۇعىمى جايلى تۇسىنىگىن جوعارى دەڭگەيدە جىرلاعان «عايشا ءبيبى» پوەماسىنان شاعىن تەاترلاندىرىلعان كورىنىس قويدى.
ماڭعىستاۋ وبلىسىنىڭ اكىمى ەرالى توعجانوۆ اقىنعا قۇتتىقتاۋ ءسوزىن ارنادى. بىرلىك پەن ەلدىكتى جىرلاعان ونىڭ ولەڭدەرى حالىق جۇرەگىنەن ماڭگى ورىن الاتىنىنا توقتالدى. ەسەنعالي اقىننىڭ الپىس جىلدىعىن ماڭعىستاۋ توپىراعىندا وتكىزبەك نيەتتەرىن مالىمدەدى. وسى كەشتە بىرقاتار انشىلەر اقىننىڭ سوزىنە جازىلعان ءان-جىرلاردى ورىندادى. ەلەنا ابدىحالىقوۆا «سىڭار قۇسىم», اماندىق كومەك ۇلى «كوكمويناقتىڭ ءۇيىرى», ەسەنبەك قۇليەۆ «ەسەنتاي وزەنى» ءان-جىرلارىمەن ورتاعا شىقتى.
ء"بىزدىڭ ەلدىڭ جىلقىسى كىل كوكمويناق. ۇيىرىمەن اعاكەم كىردى وتقا ايداپ. اق جالىننىڭ ىشىندە القىن-جۇلقىن, الاسۇرا شىڭعىرىپ ءجۇر كوپ بەيباق» دەپ باستالاتىن ايگىلى جىرىندا اعاسى تۇسىندە كوكمويناق ايعىردىڭ ءۇيىرىن وتقا ايداپ كىرەتىن. اقىن «تىم بولماسا قۇتقارشى ق ۇلىندى انا» دەپ كوك ايعىرعا ءتىل ءبىتىپ سويلەگەنىن, ونىڭ داۋسىن اكەسىنىڭ داۋسىنا ۇقساتقانىن, سوڭىندا اكە دە, اعا دا جايىنا قاپ, ءوزى تۇنگە كىرىپ جوعالعانىن جىرلاعان. بۇل ولەڭدى كوزىقاراقتى كەز كەلگەن ادام تەك جىلقىنىڭ ەمەس, ەلدىڭ تراگەدياسى دەپ تە تۇسىنەدى. جالپى, ونىڭ ولەڭدەرىندە كوكمويناق, كوكج ۇلىن, قاراكوك اتتى جىلقىلار كوپ كەزدەسەدى. «ات – ەر قاناتى» دەپ جىلقىنى سەرىك قىلعان, ساحارانى تۇلپارلارىنىڭ تۇياعىمەن دۇبىرلەتكەن كوشپەندى قازاق رۋحىنىڭ بيىك بولۋىنا ەڭ ءبىرىنشى سەبەپكەر – جىلقى دەسەك ونشا قاتەلەسپەيمىز. ال اقىن ەلىنىڭ جىلقىلارى جاي ەمەس, «اتاسى قۇلان, اناسى بۇلان» كىل كوكمويناق جىلقى. كوكمويناق جىلقىنى يدەالداۋ ارقىلى رۋح كوتەرۋدى ماقسات ەتكەن ولەڭ بۇل. اقىننىڭ الپىس جىلدىعىنا ارنالعان كەشتىڭ ء«بىزدىڭ ەلدىڭ جىلقىسى كىل كوكمويناق» اتالۋىنىڭ دا سىرى وسىندا بولسا كەرەك. كەشتى جۇرگىزگەن «دارىن» مەملەكەتتىك جاستار سىيلىعىنىڭ يەگەرى, ماڭعىستاۋلىق ايتۋلى اقىن سۆەتقالي نۇرجان وسى ولەڭدى وقىعاندا توبە قۇيقامىز شىمىرلاپ وتىردى.
كەش سوڭىندا ساحناعا ولەڭسۇيەر قاۋىمنىڭ «قانداي جاڭا جىرلار جازدى ەكەن» دەگەن قىزىعۋشىلىقپەن ىزدەپ ءجۇرىپ وقيتىن سۇيىكتى اقىنى, كەش يەسى ەسەنعالي راۋشاننىڭ ءوزى شىقتى. كەشتى ۇيىمداستىرۋشىلارعا ريزاشىلىعىن ءبىلدىردى. جاستارعا العىسىن ايتتى. بۇل كۇندە مارقۇم بولعان اقىن اعالارىنا دەگەن ساعىنىشىن سەزدىردى. بەيداۋا ءبىر سەزىمدەرگە ەرىك بەرەتىن «توعىز قايىق» ولەڭىن وقىدى. سوڭىندا كەش بىتسە دە, اقىندى ساحنادان جىبەرگىسى كەلمەي, دۇركىرەتە قول سوعىپ كورەرمەن تۇردى.
ايگۇل سەيىل,
«ەگەمەن قازاقستان»
