وبلىس ەكونوميكاسىنىڭ دامۋىنا سەرپىن بەرەتىن جالپى وڭىرلىك ءونىم كولەمى سوڭعى 6 ايدا 1,1 ترلن تەڭگەنى قۇراپتى. بۇل رەتتە نەگىزگى ۇلەستى ونەركاسىپ, اۋىل شارۋاشىلىعى مەن قۇرىلىس سالاسى قوسىپ وتىر. جالپى وڭىرىمىزدەگى ونەركاسىپ سالاسى وڭدەۋ, تاۋ-كەن, بۋ, ەلەكترمەن جابدىقتاۋ, گاز, بۋ بەرۋ جانە اۋا باپتاۋ ونەركاسىبىنەن قۇرالادى. سوڭعى 6 ايدا وڭدەۋ سالاسىندا 250,4 ملرد تەڭگەنىڭ ءونىمى وندىرىلگەن. ءوسىم نەگىزىنەن تاماق ونىمدەرىن ءوندىرۋ, فارماتسەۆتيكالىق, مەتاللۋرگيا, ماشينا جاساۋ, جەڭىل ونەركاسىپ ونىمدەرى ەسەبىنەن جۇزەگە اسىپ وتىر.
«وبلىسىمىزداعى يندۋستريالاندىرۋ كارتاسىنىڭ ەكىنشى بەس جىلدىعى جوسپارىنا ساي 135 جوبانى جۇزەگە اسىرۋ جوسپاردا بار. ونىڭ ىشىندە اعىمداعى جىلى 17 جوبانى ىسكە اسىرۋ كوزدەلۋدە. اتالعان 17 جوبانىڭ جالپى قۇنى – 37 ملرد تەڭگەنى قۇرايدى. ەگەر جوبالار تولىق ىسكە اسسا, 909 جاڭا جۇمىس ورنى اشىلاتىن بولادى», - دەيدى ارمان ءسابيتوۆ.
وڭىردە ساۋدا سالاسىندا دامۋ بايقالادى. سوڭعى 6 ايدا بولشەك ساۋدا اينالىمى 182,3 ملرد تەڭگەنى قۇراپ, 18 ملرد تەڭگەگە ارتقان. ال, سىرتقى ساۋدا اينالىمى 1,1 ملرد اقش دوللارىنا جەتسە, ونىڭ ىشىندە ەكسپورت – 468,3 ملن اقش دوللارىن, يمپورت – 620,6 ملن. اقش دوللارىن قۇراپ وتىر. ەكسپورتقا نەگىزىنەن ەت, تاماق ونىمدەرى, ءدارى-دارمەك, مەتالل, ماشينا, قۇرال-جابدىق, توقىما بۇيىمدارى شىعارىلۋدا.
ايتا كەتەيىك, وبلىستىڭ ەكسپورت قۇرىلىمىندا نيدەرلاندى, وزبەكستان, رەسەي, قىتاي جانە اۋعانىستان مەملەكەتتەرىنىڭ ۇلەسى مول.
