كەزدەسۋ بارىسىندا مەملەكەت باسشىسىنا بيىلعى 7 ايدىڭ قورىتىندىسى بويىنشا ۇكىمەتتىڭ اتقارعان جۇمىسى جونىندە ەسەپ بەرىلدى.
قازاقستان پرەزيدەنتى ەلىمىزدىڭ ەكونوميكالىق دامۋ كورسەتكىشتەرى ءوسىپ كەلە جاتقانىن ايتىپ, مەملەكەتتىك جانە سالالىق باعدارلامالاردى ودان ءارى ىسكە اسىرۋدىڭ ماڭىزدىلىعىن اتاپ ءوتتى.
– مەنىڭ تاپسىرمام بويىنشا ەلىمىزدىڭ بىرنەشە ءوڭىرىن ارالاپ شىقتىڭىز. جالپى, تۇراقتى احۋال بايقالۋدا. الدىمىزدا ەگىن ورۋ ناۋقانى تۇر. ونى ءتيىستى دەڭگەيدە جۇرگىزۋىمىز قاجەت, – دەدى ەلباسى.
نۇرسۇلتان نازارباەۆقا 7 ايدىڭ قورىتىندىسى بويىنشا ەكونوميكانىڭ دامۋ بارىسى جانە باعدارلامالاردىڭ ارالىق ناتيجەلەرى جونىندە مالىمدەلدى.
– ەكونوميكالىق ءوسىم 4,2%-دى قۇراپ وتىر. ءوندىرىس سالاسىنداعى كورسەتكىشتەر مۇناي وڭدەۋ دەڭگەيى تومەندەگەن قىزىلوردا جانە ماڭعىستاۋ وبلىستارىنان باسقا ەلىمىزدىڭ بارلىق وڭىرىندە 100 پايىزدىق مولشەردەن استى. ءبىز قازىرگى ۋاقىتتا بۇل وڭىرلەرگە جاڭا رەزەرۆ كوزدەرىن جۇمىلدىرۋ ماسەلەسى بويىنشا جۇمىستار جۇرگىزىپ جاتىرمىز.
نەگىزگى كاپيتالعا ينۆەستيتسيا تارتۋ ماسەلەسى جونىندە. بىلتىرعى وسى كەزەڭمەن سالىستىرعاندا 3,7% ءوسىم بايقالۋدا.
بارلىق وڭىرلەردە كورسەتكىشتەر جاقسى. ينفلياتسيا دەڭگەيى بيىلعى ماۋسىم ايىمەن سالىستىرعاندا 0,1%-عا ءوستى. ازىق-ت ۇلىك باعاسى 0,5%-عا تومەندەگەنىن اتاپ وتكىم كەلەدى. جۇمىسسىزدىق دەڭگەيى 4,9%-دى قۇراپ وتىر, – دەپ باياندادى ب.ساعىنتاەۆ.
سونىمەن قاتار, پرەمەر-مينيستر يندۋستريالاندىرۋ باعدارلاماسىنىڭ ىسكە اسىرىلۋى جونىندە ەسەپ بەردى. ونىڭ اياسىندا بيىلعى ءبىرىنشى توقساننىڭ قورىتىندىسى بويىنشا 31 جوبا ىسكە قوسىلدى. ب.ساعىنتاەۆتىڭ مالىمەتىنە سايكەس, ەكىنشى توقساندا جاڭا 10 مىڭ جۇمىس ورنىن قامتيتىن 100 جوبانى ىسكە اسىرۋ جوسپارلانىپ وتىر.
– ەكونوميكانىڭ وسۋىنە «نۇرلى جول» باعدارلاماسىنىڭ جۇزەگە اسىرىلۋى زور ۇلەس قوسىپ وتىر. بيىل اۆتوموبيل جولدارىنىڭ قۇرىلىسىنا 356 ميلليارد تەڭگە قاراستىرىلعان. سونداي-اق, قازىر 600 شاقىرىم جول ىسكە قوسىلدى. جىل سوڭىنا دەيىن 469 شاقىرىم جول اقىلى بولماق. العاش رەت وسىنداي جۇيەگە قوسىلعان «استانا-بۋراباي» تاس جولى جىلىنا 1,5 ميلليارد تەڭگەگە دەيىن پايدا اكەلىپ, ونىڭ قۇرىلىسىنا جۇمسالعان قاراجاتتى اقتاپ وتىر. قازىر «استانا-تەمىرتاۋ» تاس جولىن وسى جۇيەگە قوسۋ جۇمىستارى جۇرگىزىلۋدە, – دەدى پرەمەر-مينيستر.
سونداي-اق, ب.ساعىنتاەۆ «نۇرلى جەر» باعدارلاماسىنىڭ ورىندالۋ ناتيجەلەرى تۋرالى باياندادى. ونىڭ اياسىندا بيىل 10,2 ملن شارشى مەتر تۇرعىن ءۇي سالۋ جوسپارلانعان. پرەمەر-ءمينيستردىڭ مالىمەتىنە سايكەس, ءبىرىنشى جارتىجىلدىقتىڭ قورىتىندىسى بويىنشا 5,5 ملن شارشى مەتردى قامتيتىن قۇرىلىس جۇمىستارى اياقتالعان.
مەملەكەت باسشىسىنا اۋىل شارۋاشىلىعىنداعى باعدارلامالاردىڭ ىسكە اسىرىلۋى تۋرالى ەسەپ بەرىلىپ, ەل ەكونوميكاسىن نەسيەلەندىرۋ جونىندە مالىمەت ۇسىنىلدى.
سوڭىندا قازاقستان پرەزيدەنتى ۇكىمەت پەن اكىمدەردىڭ الدىنا قويىلعان مىندەتتەردى ورىنداۋدى جالعاستىرۋدى تاپسىرىپ, بۇل رەتتە ءوسىمنىڭ وڭ قارقىنىن ساقتاۋدىڭ جانە بولىنگەن قاراجاتتى يگەرۋدىڭ ماڭىزدىلىعىنا توقتالدى.
– ۇكىمەت قىزۋ جۇمىس جۇرگىزىپ وتىر دەپ ەسەپتەيمىن. مەن جىلدى جاقسى ناتيجەلەرمەن قورىتىندىلاۋ ءۇشىن ءبارىڭىزدى ۇيىمشىلدىقپەن جۇمىس ىستەۋگە شاقىرامىن. تاۋەكەلدى تۇستار دا جوق ەمەس. ەنەرگيا تاسىمالداۋشىلارىمىزعا, شيكىزات ونىمدەرىنە دەگەن باعانىڭ وزگەرىسى. بالكىم, باتىستىڭ رەسەيگە قاتىستى سانكتسيالارى اسەر ەتەر. وسىنى ەسكەرۋ قاجەت, – دەدى ەلباسى.
سۋرەت پرەزيدەنتتىڭ باسپاسوز قىزمەتىنەن الىندى
