«27 شىلدەدەگى جاعدايعا سايكەس 548,2 ملن تەڭگە ءتۇستى. ونىڭ ىشىندە اۋدارىمداردىڭ ۇلەسى 38, ال جارنالاردىڭ ۇلەسى 62 پايىزدى قۇرايدى. ايتا كەتەرلىگى, 48 پايىزى وسى جىلدىڭ ەكىنشى جارتىجىلدىعىنداعى جەكە كاسىپكەرلەردىڭ اۆانستىق تولەمدەرى بولىپ ەسەپتەلەدى», دەدى ول.
ونىڭ ايتۋىنشا, اۋدارىمدار مەن جارنالاردى تولەۋ جاعىنان كوش باسىندا ەلىمىزدىڭ 4 ءوڭىرى تۇر. ولار: شىعىس قازاقستان, قاراعاندى, قوستاناي جانە الماتى وبلىستارى. اتالعان 4 ءوڭىردىڭ اۋدارىمدارى قورعا تۇسكەن قارجىنىڭ 49 پايىزىن قۇرايدى. 27 شىلدەدەگى جاعداي بويىنشا قاراجاتتى 235 مىڭ جەكە تۇلعا اۋدارعان.
«جەدەل مالىمەتتەرگە سايكەس, شىلدەدەگى جالپى تۇسىمدەردىڭ كولەمى 800 ملن تەڭگەدەن اسىپ جىعىلادى. اۋدارىمدار مەن تولەمدەر تولەگەن جەكە تۇلعالاردىڭ سانى 384 مىڭ ادامنان استى. ءبىزدىڭ بولجامعا قاتىستى ايتار بولسام, تامىز ايىندا قورعا تۇسەتىن تۇسىمدەردىڭ كولەمى ارتۋى ءتيىس. سەبەبى شىلدە ايىنىڭ تولەمدەرىن اۋدارۋ مەرزىمى تامىز ايىندا اياقتالادى. سوندىقتان ءبىز تامىزدا شامامەن 4,5 ملرد تەڭگە تۇسەدى دەپ وتىرمىز. وسى جىلعى بازالىق اۋدارىم 27 ملرد تەڭگەنى قۇراماق», دەدى ەلەنا باحمۋتوۆا.
