قوس وقيعا دا گولليۆۋد سەريالدارىنداعى قاندى قاساپتى ەسكە تۇسىرەدى. ەكى ءجاسوسپىرىم وزدەرى قۇرالىپتاس زامانداسىن تاياققا وڭدىرماي جىعۋمەن شەكتەلسە, ءبىر ءسارى. تراۆماتيكالىق پيستولەتپەن بىرنەشە رەت اتىپ, 39 سەكۋندقا عانا سوزىلعان ەكىتاراپتىق توبەلەس بارىسىندا ءزابىر شەگۋشى دەنە جاراقاتىن العان.
ال ەكىنشى وقيعا توپتىق جاعا جىرتىسۋعا جالعاسىپ, شولاق مىلتىقتان اتىلعان وقتان 19 جاستاعى ەربول حاميتوۆ دەگەن كوللەدج ستۋدەنتى اۋىر جاعدايدا اۋرۋحاناعا جەتكىزىلگەن.
№ 1 قالالىق اۋرۋحانانىڭ باس دارىگەرى گالينا مامەتوۆانىڭ ايتۋىنشا, ناۋقاستىڭ ءبىر اياعىن تىزەدەن كەسۋگە تۋرا كەلگەن. ءحالى ناشار. باسى جارىلىپ, تىستەرى سىنعان. جاپا شەگۋشىنىڭ اكەسى عالىمكەرەي قۇسايىنوۆتىڭ سوزىنە قاراعاندا, ۇستالعانداردىڭ اراسىندا قارۋ قولدانۋشىلار جوق كورىنەدى. قاشىپ كەتسە كەرەك. ول ناعىز قىلمىسكەرلەر جاۋاپكەرشىلىكتەن سىتىلىپ كەتە مە دەپ الاڭدايدى.
وبلىستىق ىشكى ىستەر دەپارتامەنتىنىڭ ءباسپاسوز قىزمەتى كۇدىكتىلەردىڭ ۇستالعانى, قىلمىستىق كودەكستىڭ 293-ءشى, 99-شى باپتارى بويىنشا «بۇزاقىلىق» جانە «كىسىگە قاستاندىق جاساۋ» قىلمىستىق ءىس قوزعالعانى جونىندە مالىمدەمە تاراتتى.
ءومىر ەسقالي,
«ەگەمەن قازاقستان»
