ەل مەن ەلدىڭ بايلانىسىن بەكەمدەۋگە باعىتتالعان مۇنداي باستامالارعا مەملەكەتتىك ورتالىق مۋزەيى ۇدايى ۇيىتقى بولىپ جۇرگەنى ايان.
بۇل كورمەنىڭ ءمانىسى مىنادا. ءابسوليۋتتى مونارحيالىق باسقارۋ جۇيەسىن ۇستاناتىن ساۋد ارابياسى تاريحىنىڭ جارقىن تۇستارىنان سىر شەرتەتىن كورمەدە ساۋد ارابياسىنىڭ ءۇشىنشى كورولى فەيسال يبن ابدۋل-ءازيز ءال ساۋدتىڭ (1906-1975 جج.) تۇتىنعان جەكە زاتتارى مەن وعان قاتىستى مۇراعاتتىق قۇجاتتار قويىلدى.
1964-1975 جىلدارى بيلىك قۇرعان فەيسال يبن ابدۋل-ءازيز ءال ساۋد «ساۋديتتەر» اۋلەتىنەن شىققان. ساۋديتتەر اۋلەتى شامامەن 1446 جىلدان باستاۋ الادى. قازىرگى تاڭدا ەلدەگى ءابسوليۋتتى بيلىككە يە جالعىز وتباسى, ال ساۋد ارابياسى اۋلەت اتىمەن اتالاتىن الەمدەگى ءۇش ەلدىڭ ءبىرى (باسقالارى – ليحتەنشتەين جانە يوردانيا).
كورول فەيسالدىڭ بيلىگى جۇرگەن ءداۋىردىڭ مۇراسى ۇلان-عايىر: جاھاندانۋعا باعىتتالعان اۋقىمدى رەفورمالاردى جۇرگىزۋدىڭ ناتيجەسىندە ساۋد ارابياسىنىڭ قوعامى تۇبەگەيلى وزگەرگەنى بەلگىلى. ەلدە جوسپارلاۋ جۇيەسى بەكىتىلدى, سول كەزدە قابىلدانعان سالماقتى زاڭدارعا ساۋد ۇكىمەتى بۇگىندە دە جاڭا زاڭ جوبالارىن دايىنداۋدا يەك ارتادى. فەيسال يبن ابدۋل-ءازيز ءال ساۋد ءوز ەلىندە بىرقاتار اۋقىمدى ساياسي جانە ەكونوميكالىق رەفورمالاردى تابىستى جۇزەگە اسىرىپ, ەلدىڭ الەۋەتىن ارتتىرۋدا ۇلكەن ءىس تىندىرعان كەمەل باسشى, ۇلى مارتەبەلى كورول بولدى. وسىنداي دارىندى باسشى, دارا تۇلعانىڭ ەلى ءۇشىن تىندىرعان ءاربىر ءىسى حالىقارالىق دەڭگەيدە تەرەڭ تانىپ بىلۋگە, زەرتتەپ زەردەلەۋگە ابدەن لايىق.
كورمە مادەنيەت جانە سپورت مينيسترلىگىنىڭ قولداۋىمەن كورول فەيسال اتىنداعى يسلامدىق زەرتتەۋلەر ورتالىعىمەن بىرلەسە ۇيىمداستىرىلدى.
كورمە ەكى ەل اراسىنداعى ساياسي-ەكونوميكالىق ىقپالداستىقتى نىعايتۋعا, مادەني ىنتىماقتاستىقتى قالىپتاستىرۋعا باعىتتالعان.
ايناش ەسالي,
«ەگەمەن قازاقستان»
الماتى
