ول كورمە الاڭىن الدىمەن قازاقستان پاۆيلونىنان باستادى. پلاسيدو دومينگو ەڭ ءبىرىنشى قۇرمەتتى قوناقتارعا ارنالعان كىتاپقا جىلى لەبىزدەرىن جازىپ, قولتاڭباسىن قالدىردى. وسىدان كەيىن "نۇر الەم" ىشىندەگى "قازاقستاننىڭ قوناقجايلىلىعى" تاقتايشاسىنا كوز جۇگىرتتى. مۇندا ول "قوناقاسى", "اۋىز تيۋ", "قوناقكادە", "ات مىنگىزىپ, شاپان جابۋ", "سارقىت", "بەل كوتەرەر" سەكىلدى ۇلتىمىزدىڭ سالت-داستۇرىمەن قىسقاشا تانىسىپ ءوتتى. قازاق xالقىنىڭ وسىنداي دارxان مىنەزىنە, سالت-داستۇرىنە دەگەن تاڭدانىسىن جاسىرا الماعان ءانشى ەرىكسىز "fantastic" دەۋمەن عانا بولدى.
ال ەرتەگىدە ايتىلاتىن سامۇرىق قۇستىڭ جۇمىرتقاسى ورنالاسقان الىپ اعاشتىڭ ماكەتىنە كەلگەندە "بايتەرەك" عيماراتىنىڭ سىرىنا ىشتەي قانىق بولدى.
«استاناعا وسىمەن ەكىنشى رەت كەلىپ وتىرمىن. العاش كەلگەنىمنەن-اق قازاق xالقىنىڭ قوناقجايلىلىعىن سەزىندىم. "نۇر الەم" پاۆيلونىن ارالاعانىمنان كەيىن قازاق ۇلتىنىڭ دارxان كوڭىلدى مىنەزىنىڭ, سىرىن ۇققانداي بولدىم. ال ەكسپو-دان العان اسەرىمدى سوزبەن ايتىپ جەتكىزە المايمىن. بەينە ءبىر وزگە الەمگە نەمەسە بولاشاققا ەنىپ كەتكەندەي كۇيدە قالىپ وتىرمىن. وسىعان دەيىن تالاي كورمەگە قاتىستىم, كونتسەرتتەرىمدى وتكىزدىم. بىراق بۇل ەكسپو ولاردان ەرەكشە», دەدى وپەرا ءانشىسى.
«نۇر الەم» پاۆيلونىنان شىعار الدىندا ول فونتانعا تيىن لاقتىرىپ, ىشتەي تىلەك تىلەدى. ال وزىمەن بىرگە ەرىپ كەلگەن نەمەرەسى ەڭ جوعارعى قاباتتا ورنالاسقان شىنى ەدەننىڭ ۇناعانىن ايتتى. ەكسپو اۋماعىندا تاعى دا اۆستريا, گەرمانيا, سونداي-اق تۋعان ەلى يسپانيانىڭ پاۆيلوندارىن ارالاپ شىقتى.
«بىرەر كۇن بۇرىن عانا ەلوردامىزدا پلاسيدو دومينگونىڭ «وپەراليا» كونكۋرسى ءوتتى. ول ەكسپو-نىڭ كوركىنە كورىك بەرگەندەي بولدى. بۇگىن وتباسىمەن بىرگە كەشەن اۋماعىنا كەلىپ وتىر. مۇنداي الەمگە تانىمال تۇلعالاردىڭ جىلى لەبىزىن ءبىلدىرۋى ءبىز ءۇشىن ۇلكەن قۋانىش», دەدى مادەنيەت جانە سپورت ءمينيسترى ارىستانبەك مۇحاممەدي ۇلى.
ايتا كەتەيىك, پلاسيدو دومينگو استاناعا بىرەر اپتا بۇرىن كەلگەن بولاتىن. بۇگىنگە دەيىن ونىڭ دۇنيە جۇزىنە بەلگىلى «وپەراليا» بايقاۋى ۇيىمداستىرىلدى. وسىعان وراي ەلورداداعى «وپەرا جانە بالەت» تەاترى عيماراتىندا ءانشىنىڭ قاتىسۋىمەن ارنايى ءباسپاسوز-كونفەرەنتسياسى ۇيىمداستىرىلعان بولاتىن. ول ەڭ ءبىرىنشى قازاقستان استاناسىنا توعىز جىل بۇرىن كەلگەنىن, وسى ۋاقىت ارالىعىندا باس قالانىڭ ادام تانىماستاي وزگەرىپ كەتكەنىن مالىمدەدى.
ونىڭ ايتۋىنشا, «وپەراليا» بايقاۋى ارقىلى قاتىسۋشىلاردىڭ ونەرى العا جىلجىپ, الەمگە تانىلا باستايدى. ءوز سوزىندە ول «وپەراليانىڭ ەڭ العاشقى, ياعني 1993 جىلعى جەڭىمپازى شۆەتسيالىق نينا شتەمەندى مىسالعا كەلتىرگەن بولاتىن. سونىمەن قاتار, ول «وپەرالياعا» قاتىسۋشىلاردىڭ ءبىلىمىن شىڭداۋ ءۇشىن اركەز كومەك بەرىپ تۇراتىنىن ايتقان. ال استانادا وتكەن بايگەگە الەمنىڭ 17 ەلىنەن 40 دارىندى ءانشى قاتىستى.
بۇل سىنعا قازاقستان اتىنان «استان وپەرانىڭ» ءسوليسى, بىرنەشە حالىقارالىق بايقاۋلاردىڭ جەڭىمپازى ماريا مۋدرياك, سونداي-اق, راسۋل جارماعانبەتوۆ, دامير سادۋاقاسوۆ, ستانيسلاۆ لي قاتىسقان بولاتىن. ال اقتىق باسەكەگە ماريا مۋدرياك جولداما الدى. قازىلار القاسى مەن كورەرمەندەردىڭ داۋىس بەرۋى قورىتىندىسى بويىنشا وتانداسىمىز ءۇشىنشى ورىنعا يە بولعان ەدى.
ايان ءابدۋالي,
"ەگەمەن قازاقستان"
