قر باس پروكۋراتۋراسىنىڭ «وتباسىنداعى زورلىق-زومبىلىقسىز قازاقستان» پيلوتتىق جوباسىنىڭ ماقساتى - وتباسىنداعى جانجالدارعا توسقاۋىل قويىپ, شاڭىراق ىنتىماعىن ساقتاۋ. ەڭ الدىمەن, جۇمىسشى توپ شاھاردا بۇگىننەن باستاپ جۇمىسقا كىرىسكەن «داعدارىس ورتالىعىنىڭ» اشىلۋىن تاماشالادى. مەكەمە - وتباسىندا ءزابىر كورىپ, زورلىق-زومبىلىقتىڭ تاۋقىمەتىن تارتقان ازاماتتار مەن وتباسى مۇشەلەرىنە پسيحولوگيالىق, الەۋمەتتىك قولداۋ كورسەتەتىن بولادى. عيماراتتى ارالاپ كورگەن ە.سادىر ءاربىر شاڭىراق مەملەكەتتىڭ ءبىر بولىگى بولىپ تابىلاتىندىقتان, قوعامدى وركەنيەتتىلىككە جەتكىزۋ, ەڭ الدىمەن وتباسىنىڭ ومىردە دۇرىس باعىت الۋىنان باستالاتىنىن جەتكىزدى.
«بۇگىندە قازاقستاندا وتباسى-دەموگرافيالىق ساياساتقا ەرەكشە نازار اۋدارىلىپ وتىر. دەموگرافيالىق ءوسىمنىڭ جاقسارىپ, قازاقستان حالقىنىڭ سانى 18 ميلليون ادامعا جەتۋى جانە حالىقتىڭ ءومىر ءسۇرۋىنىڭ ورتاشا ۇزاقتىعى 10 جىلعا ۇلعايۋى – مەملەكەتتىڭ ءاربىر وتباسىعا قامقورلىق تانىتۋعا باعىتتالعان ەلباسىمىزدىڭ سارابدال ساياساتىنىڭ جەمىسى», - دەدى وبلىس اكىمىنىڭ ورىنباسارى.
ورتالىق قازاقستان رەسپۋبليكاسىنىڭ «قىزىل اي» قوعامىنىڭ قۇرامىندا ورنالاسىپ, «قورعاۋ-استانا» قورىنىڭ الەۋمەتتىك جوباسى اياسىندا جۇزەگە اسىرىلۋدا. جاڭادان اشىلعان ورتالىق عيماراتىندا قابىلداۋ, دارىگەر بولمەسى, قاجەتتى قۇرالدارمەن جابدىقتالعان پسيحولوگ, الەۋمەتتىك كابينەتتەر, جاتىن بولمەلەر, اسحانا, بالالار الاڭشالارى, مادەني تىنىعۋ بولمەلەرى قاراستىرىلعان.
مۇنان سوڭ, جۇمىسشى توپ شاھاردا بايىت ۇلى بابا كوشەسى بويىنان اشىلعان «مەديتسينالىق-پسيحولوگيالىق وڭالتۋ ورتالىعىندا» بولدى. ورتالىق پسيحوبەلسەندى زاتتاردى پايدالانۋشى ازاماتتارعا مەديتسينالىق-پسيحولوگيالىق كوررەكتسيا جۇمىسىن جۇزەگە اسىرادى. ورتالىقتا ناركولوگ, پسيحولوگ, پسيحوتەراپەۆت جانە الەۋمەتتىك قىزمەتكەرلەر ەمدەۋ ستاندارتتارىنا سايكەس ناركولوگيالىق جانە مەديتسينالىق كومەك كورسەتۋ كوزدەلگەن. مەديتسينالىق-پسيحولوگيالىق وڭالتۋ ورتالىعى كەلۋشىلەردى قۇزىرلى ورگانداردىڭ جولداماسى ارقىلى قابىلدايدى. 20 توسەك ورىنمەن قامتاماسىز ەتىلگەن ورتالىق تاۋلىك بويى جۇمىس جۇرگىزەتىن ستاتسيونارلىق مەكەمە بولىپ تابىلادى.
ال ءۇشىنشى ورتالىق - الەۋمەتتىك-پسيحولوگيالىق سۇيەمەلدەۋ قىزمەتى شىمكەنت قالاسى اكىمدىگىنىڭ حالىققا الەۋمەتتىك قىزمەت كورسەتەتىن قالالىق اۋماقتىق ورتالىعىنىڭ جانىنان اشىلدى. ورتالىقتا ءزابىر كورىپ, زورلىق-زومبىلىق تاۋقىمەتىن تارتقاندار, كەرەعار ءدىني اعىمداردان زارداپ شەككەندەرگە پسيحولوگيالىق قولداۋ كورسەتىلەدى. مۇندا ينتەرنەت جەلىسى ارقىلى سكايپ جۇيەسىمەن ونلايندى سۇحباتتاسۋ, كەڭەستەر الۋ شارالارى جوسپارلانعان.
