پاتەراقىنىڭ قىمباتتىعىنان باستاپ, قوجايىننىڭ قاتال تالاپتارى مەن پاتەردەن پاتەرگە اۋىسىپ ءجۇرۋدىڭ مورالدىق قيىندىقتارىنا دەيىن قامتىپ, جەلى وقىرماندارىنىڭ جان-جۇيەسىن ەلجىرەتتى. ول جازبالاردى ۇناتىپ, پىكىر ءبىلدىرىپ, ءتىپتى بولىسكەن ادامداردىڭ دا قاراسى مول بولدى. ءتىپتى تانىمال جۋرناليستەر, بلوگەرلەر, ۇستازدار, اقىن-جازۋشىلار جەكە جازبا ارناپ, باسپانا ماسەلەسىن كوتەرگەن حەشتەگكە قاتىستى ءوز پىكىرلەرىن ءبىلدىردى. سەبەبى تۇسىنىكتى. باسپانا زارى – الەۋمەتكە ورتاق ۇلكەن ماسەلە. الگى جازبالاردىڭ ءبىرى بولماسا ءبىرى ماسەلە شەشەتىن ءتيىستى ورگانداردىڭ جۇمىسىنا قىلداي بولسا دا اسەر ەتىپ جاتسا, ءبىز قۋانامىز. بىراق, بۇل جەردە مەنىڭ ايتقىم كەلگەنى باسقا نارسە.
ۇلى دالا – قازاق ءۇشىن كيەلى دە ۇلكەن ۇعىم. ول – التايدان قارا تەڭىزگە دەيىنگى ارالىقتاعى قازاقتىڭ ء ومىر سۇرگەن مەكەنى. ۇلى دالا – ەركىندىكتە عۇمىر كەشكەن رۋحى كوتەرىڭكى جاۋىنگەر حالقىمىزدىڭ, قان مايداندارداعى ۇلى جەڭىستەرىمىزدىڭ سيمۆولى, وعان قوسا رۋحاني كەڭىستىگىمىز. ۇلى دالانى ءبىز بىرلىگى جاراسقان ەلسىز, سالتاناتتى كوشسىز, ات تۇياعىنىڭ ءدۇبىرىنسىز ەلەستەتە المايمىز. ميىمىزدا ابدەن ورنىعىپ, قاستەرلى ۇعىمعا اينالعان « ۇلى دالانى» ەلگە تەلۋ تۋرالى ەلباسىنىڭ ەكى جىل بۇرىنعى ۇسىنىسى دا ەستە. ول قازاقستاننىڭ حالىقتىق اتاۋى « ۇلى دالا ەلى» بولۋى كەرەكتىگىن ايتقان ەدى. ۇلتتىڭ جادىندا ءومىر ءسۇرىپ كەلە جاتقان ۇعىم جاڭعىرىپ, سونىڭ شەڭبەرىندە ءبىرشاما جاقسى يدەيالار دا تۋىنداۋدا. ال, ەندى مىنا « ۇلى دالا كۆارتيرانتىنىڭ» ءجونى مۇلدە بولەك. بۇل – ۇلى دالانى ۇلىقتاۋ دا, ۇلى ۇعىمعا قۇرمەت تە ەمەس. «كۆارتيرانتتى» قوساقتاۋ ارقىلى ەلەڭ ەتكىزەرلىك ءسوز تاپقانعا قۋانىپ, الەۋمەتكە ونى وتكىزۋدىڭ ۇتىمدى ءتاسىلى شىعار؟ وسىدان ءبىراز بۇرىن ءبىر جاس ءانشىنىڭ « ۇلى دالا بالاسى» دەگەن اتپەن ەفيردەن تۇسپەي قويعانىن كورگەندە « ۇلى دالانى» قيقىمداي بالانىڭ مەنشىگى قىلعان قۇدىرەتتى كۇش نە بولدى ەكەن دەپ ويلاپ ەدىك. ەندى مىنا حەشتەگتى كورىپ قولعا قالام الماۋعا بولمادى. مەيلى, پىكىرىمە قارسى بولاتىندار ترەندتى ايتىپ, برەندتى ءتۇسىندىرىپ ءبىراز اقىل ايتار. بىراق, كىم-كىمنىڭ دە ۇلى ۇعىمداردىڭ قادىرىن قاشىرۋعا, كۇلكى ەتۋگە نەمەسە كوز الدىمىزدا الاسارتۋعا قاقىسى جوق.
ايگۇل سەيىلوۆا,
«ەگەمەن قازاقستان»
