«تۋعان جەرگە تۋىڭدى تىك» تاقىرىبىنداعى جىر دوداسىنا رينات زايىتوۆ, جانسايا مۋسينا, رۇستەم قايىرتاي ۇلى, قۋانىش شارمانوۆ, قاليجان ءبىلداشوۆ, مۇحتار نيازوۆ, اسپانبەك شۇعاتاەۆ, اسەم ەرەجە, ماقسات اقانوۆ, شۇعايىپ سەزىمحان, تولەگەن جامانوۆ سىندى ەلىمىزدىڭ اقىندارىنان بولەك موڭعوليا (ەرلان داۋلەت ۇلى) مەن قىتاي (جارقىنبەك بەردىبەك ۇلى) مەملەكەتىنەن دە ايتىسكەرلەر قاتىستى.
حالىقارالىق ايتىستىڭ اشىلۋ سالتاناتىندا ءسوز العان تارباعاتاي اۋدانىنىڭ اكىمى دىلدابەك ورازباەۆ ءدۇلدۇل اقىنداردىڭ باسىن قوسقان ءسوز سايىسىنىڭ ەلباسىنىڭ «رۋحاني جاڭعىرۋ: بولاشاققا باعدار» ماقالاسىندا كورسەتىلگەن مىندەتتەردى جۇزەگە اسىرۋ اياسىندا ۇيىمداستىرىلعانىن, بۇل شارانى وسى ءوڭىردىڭ تۋمالارى تاستەكەەۆتەر اۋلەتىنىڭ قارجىلاندىرعانىن ايتتى.
ءجۇرسىن ەرمان جۇرگىزگەن جىر دوداسىندا اقىندار تۋعان جەر, وسكەن ەلگە قۇرمەت, ۇلتتىق داستۇرلەرىمىزدى ۇلىقتاۋ, وتكەنىمىزدى ۇمىتپاۋ سىندى وزەكتى تاقىرىپتاردى جان-جاقتى قاۋزاپ, كورەرمەننىڭ ىستىق ىقىلاسىنا بولەندى. ۇزىن سانى 12 اقىن قاتىسقان ونەر باسەكەسىندە اقسۋاتتىڭ تۋماسى رۇستەم قايىرتاي ۇلى بابىندا ەكەنىن بايقاتىپ, باس جۇلدەنى (2 ملن تەڭگە) قانجىعاعا بايلادى. ءبىرىنشى ورىندى رينات زايىتوۆ (1 ملن تەڭگە), ەكىنشى ورىندى جانسايا مۋسينا (750 000 تەڭگە), ءۇشىنشى ورىندى قىتايدان كەلگەن قانداسىمىز جارقىنبەك بەردىبەك ۇلى (500 000 تەڭگە) ەنشىلەدى. مۇحتار نيازوۆ جانە اسپانبەك شۇعاتاەۆ 300 000 تەڭگەنىڭ ارنايى سىيلىعىنا يە بولدى. بۇل ايتىستىڭ وزگە ايتىستاردان ءبىر ەرەكشەلىگى سول, ەكى اقىن قاليجان ءبىلدəش پەن شۇعايىپ سەزىمxانعا100 000 تەڭگەدەن ءبىر جىلدىق ستيپەنديا تاعايىندالدى.
سونىمەن قاتار وسى شارا اياسىندا بارقىتبەلدىڭ باۋرايىنداعى تارباعاتاي ءوڭىرىنىڭ وتكەنى مەن بۇگىنى تۋرالى سىر شەرتەتىن «تاريحقا تولى تارباعاتاي» اتتى كىتاپتىڭ تۇساۋكەسەر ءراسىمى ءوتتى.
ازامات قاسىم,
«ەگەمەن قازاقستان»
شىعىس قازاقستان وبلىسى
