ازىرگە چەمپيوناتتىڭ ءجۇزۋ بويىنشا ارالىق كەزەڭى اياقتالدى. كوماندالىق ەسەپتە «Astana Team» كومانداسىنىڭ سپورتشىسى ستانيسلاۆ رەدكو 21 مينۋت كورسەتكىشىمەن كوش باستادى. ودان كەيىن كاسىبي ساناتتاعى ءۇش سپورتشى - ۆيكتور زەمتسەۆ (ۋكراينا), يۆان تۋتۋكين (روسسيا) جانە ماكسيم كريات (قازاقستان) مارەگە جەتتى.
«جارىسقا تۇسكەن 155 ادامنىڭ ۇشەۋى عانا PRO ساناتىنا جاتادى, قالعاندارى - اۋەسقويلار. قاتىسۋشىلاردىڭ باسىم بولىگى ءۇشىن بۇل جاي عانا حوببي, وسىلايشا جۇمىستان تىس ۋاقىتتا دەمالادى», - دەيدى جارىستاردى حابارلاۋشى الەكساندر ولەينيك.
چەمپيوناتتا سپورت اۋەسقويلارى كاسىپقوي اتلەتتەرمەن قاتار 1,8 شاقىرىمدى ءجۇزىپ ءوتىپ, 90 شاقىرىمدى ۆەلوسيپەدپەن باعىندىردى جانە 21,5 شاقىرىمدى جۇگىرىپ ءوتتى.
