جىل سايىن «وپەرالياعا» قاتىسۋ ءۇشىن جۇزدەگەن ۇمىتكەر ءوتىنىم بەرەدى, ولاردىڭ ىشىنەن تەك 40 ادام عانا حالىقارالىق ادىلقازىلار الدىندا ونەر كورسەتۋ ءۇشىن تاڭدالادى. ءار كەزدەرى ۆوكالدىق جارىس الەمنىڭ ءتۇرلى قالالارىندا وتكىزىلىپ كەلەدى. وسى جىلى 17 ەلدەن كەلگەن ارتىستەر استاناعا ات باسىن بۇردى. پلاسيدو دومينگو داۋىس بەرۋگە قاتىسپايتىنى بەلگىلى, بىراق بارلىق بايقاۋ كەزەڭىندە انشىلەرگە بەلسەنە كومەك كورسەتەدى: ولاردىڭ شىعارماشىلىعى مەن ونەرىنە قاتىستى اقىل-كەڭەس بەرىپ, دۇرىس جولعا باعىتتايدى. ەڭ جاس ۆوكاليستەردىڭ پلاسيدو دومينگونىڭ لوس-اندجەلەس (اقش) پەن ۆالەنسيادا (يسپانيا) اشقان جاستار باعدارلاماسىنا قاتىسۋ مۇمكىندىگى بار. بىراق, وسىنداي باقىتقا يە بولعان جاندى بايقاۋدىڭ ۇيىمداستىرۋ كوميتەتى شەشەدى.
Rolex كومپانياسى «وپەراليا» بايقاۋىن وسىمەن 16 جىل قاتارىنان ماقتانىشپەن ۇسىنا وتىرىپ, ءوزىنىڭ ونەرگە ماڭگىلىك ادال ەكەنىن پاش ەتەدى. پلاسيدو دومينگو 1982 جىلدان باستاپ Rolex كومپانياسىنىڭ وكىلى بولىپ تابىلادى, جانە Rolex كومپانياسى كاسىبي كەمەلدەنۋگە ۇمتىلعان جاس دارىندى ورىنداۋشىلاردى قولداۋ اياسىن كەڭەيتۋگە قۋانىشتى.
ءداستۇر بويىنشا بايقاۋدىڭ فينالدىق كەزەڭىنىڭ رەسمي اشىلۋىنان كەيىن پ.دومينگو «استانا وپەرا» سيمفونيالىق وركەسترىنىڭ ديريجەرلىك پۋلتىنە جايعاستى. ەگەر الدىڭعى كەزەڭدەردە قاتىسۋشىلاردىڭ قازىلار الدىندا 2 تۋىندى ورىنداۋ مۇمكىندىگى بولسا, اقتىق سايىستا 14 قاتىسۋشى ءبىر وپەرالىق اريادان ازىرلەگەن.
سارسۋەلانى ۇزدىك ورىنداعانى ءۇشىن 5 قاتىسۋشى-ۇمىتكەر وپەرەتتاعا جاقىن وسى يسپان مۋزىكالىق-ساحنالىق جانرىنان ءبىر اريادان ورىندادى. ناتيجەسىندە, پلاسيدو دومينگونىڭ اناسى, پەپيتا ەمبيل دە دومينگو سىيلىعى جانە 10 مىڭ دوللار ادەلا زاحارياعا (سوپرانو, رۋمىنيا) بۇيىردى, ال ماەسترو دومينگونىڭ اكەسى, اعا-پلاسيدو دومينگو سىيلىعى مەن 10 مىڭ دوللاردى ماركو چاپوني (تەنور, يتاليا) الدى.
ريحارد ۆاگنەر مەن ريحارد شتراۋس وپەرالارىنان رەپەرتۋاردى ۇزدىك ورىنداعانى ءۇشىن اتاقتى شۆەد ءانشىسى بيرگيت نيلسون اتىنداعى قوسىمشا جۇلدە مەن 15 مىڭ دوللار كولەمىندەگى اقشالاي قاراجات وكسانا سەكەريناعا (سوپرانو, رەسەي) جانە بوريس پريگلگە (باس-باريتون, چەحيا) بۇيىردى.
وپەرا اريالارى مەن سارسۋەلا شىرقالعاننان كەيىن, بارلىق قاتىسۋشىلار پلاسيدو دومينگو جەتەكشىلىگىندەگى «استانا وپەرا» وركەسترىنىڭ سۇيەمەلدەۋىمەن ماەسترونىڭ ۇلى, كىشى-پلاسيدو دومينگو جازعان «وپەراليانىڭ» رەسمي ءانۇرانىن ورىندادى.
فينالدىق كەزەڭ اياقتالعان سوڭ, ادىلقازىلار عانا ەمەس, سونداي-اق كورەرمەندەردىڭ دە سۇيىكتى قاتىسۋشىسىنا داۋىس بەرۋ مۇمكىندىگى بولدى. الدىن-الا بەرىلگەن قىزىل جانە كوك ءتۇستى كارتوچكالاردى بايقاۋعا قاتىسۋشىلاردىڭ سۋرەتتەرى بەكىتىلگەن ارنايى قوراپتارعا تاستادى. Rolex كومپانياسىنىڭ وكىلى Rolex قول ساعاتى تۇرىندەگى كورەرمەن كوزايىمى جۇلدەسىن ماريا مۋدرياك (سوپرانو, قازاقستان) جانە لەون كيم (باريتون, كورەيا رەسپۋبليكاسى) تابىس ەتتى.
وپەراليا قاتىسۋشىلارىنىڭ دەڭگەيى جىل سايىن ارتۋىنا بايلانىستى, بəسەكەلەستىك تە قىزا تۇسۋدە, بيىل استانادا وتكەن بايقاۋدا ماەسترو پلاسيدو دومينگو اقتىق سايىسقا جەتكەن, بىراق نەگىزگى اقشالاي قاراجاتقا قول جەتكىزە الماعان ءəربىر قاتىسۋشىنى 5000 دوللار كولەمىندە ىنتالاندىرۋ سىيلىعىمەن ماراپاتتاۋ تۋرالى شەشىم قابىلدادى. ىنتالاندىرۋ سىيلىعىنا: رۋپەرت ەنتيكناپ (كونترتەنور, ۇلىبريتانيا), سۋ يون پاك (سوپرانو, كورەيا رەسپۋبليكاسى), ۆلادا بوروۆكو (سوپرانو, رەسەي), ەممەت و’حەنلون (باريتون, اقش), رۋسلانا كوۆال (سوپرانو, ۋكراينا), داميانا ميتستسي (سوپرانو, يتاليا) يە بولدى.
ادەلا زاحاريا (سوپرانو, رۋمىنيا) جانە لەۆي سەكحاپان (تەنور, وڭتۇستىك افريكا) وپەرا ونەرىنىڭ حالىقارالىق «وپەراليا» بايقاۋىنىڭ ءبىرىنشى جۇلدە جەڭىمپازدارى اتانىپ, ەڭ جوعارعى 30 مىڭ دوللار كولەمىندەگى اقشالاي سىيلىققا يە بولدى. ەكىنشى ورىن جانە 20 مىڭ دوللار ماراپاتى كريستينا محيتاريانعا (سوپرانو, رەسەي) جانە داۆيدە دجۋستيگە (تەنور, يتاليا) بۇيىردى. ءۇشىنشى سىيلىق پەن 10 مىڭ دوللاردى ماريا مۋدرياك (سوپرانو, قازاقستان) جانە لەون كيم (باريتون, كورەيا رەسپۋبليكاسى) الدى.
- كوپتەگەن انشىلەر دايىندالعان, وقىعان بولۋى مۇمكىن, بىراق «وپەراليا» بولماعاندا ولار تۋرالى قاشان ءمالىم بولارىن كىم ءبىلسىن. مىنە, بۇل «وپەراليانىڭ» نەگىزگى مىندەتى – الەمگە جاڭا ارتىستەردى تانىتىپ, ولاردىڭ اتاقتى ەتۋ, - دەپ اتاپ ءوتتى ماەسترو دومينگو.
«وپەراليانىڭ» قۇرمەتتى قوناعى كسرو حالىق ءارتىسى بيبىگۇل احمەتقىزى تولەگەنوۆا بولدى. ول ءانشى, مۋزىكانت, ديريجەر پلاسيدو دومينگونىڭ الەمدىك دەڭگەيدەگى ەرەكشە دارىندى تۇلعا ەكەنىن اتاپ ءوتتى.
- «وپەراليا» بايقاۋىنىڭ قازاقستاندا, ەلوردامىزدا وتكەنى ءبىز ءۇشىن ۇلكەن قۇرمەت, وراسان زور ماقتانىش, - دەدى بيبىگۇل تولەگەنوۆا.
