«قازاقستاننىڭ ترياتلون فەدەراتسياسىنىڭ اتىنان بارلىق قاتىسۋشىلار مەن ۇيىمداستىرۋشىلاردى جانە جانكۇيەرلەردى قازاقستان رەسپۋبليكاسىنىڭ تۇڭعىش اشىق چەمپيوناتىنىڭ اشىلۋىمەن قۇتتىقتايمىن. ۇزاق قاشىقتىققا ارنالعان ترياتلون بۇكىل الەمدە كەڭىنەن تانىمال جانە ول ءبىزدىڭ ەلىمىزدە دە سولاي. ءبىز كەشە عانا وسى جەردە, ترياتلون پاركىندە ITU (International Triathlon Union) ۇيىمىنىڭ قولداۋىمەن وتكەن ترياتلوننان ازيا كۋبوگىنىڭ ىرىكتەۋ كەزەڭىن تاماشالاپ كەلدىك. اتالمىش سپورت ءتۇرىن بۇدان ءارى قاراي تانىتا ءتۇسۋ ءۇشىن Ironman جارىسىن وتكىزۋ قاجەت بولاتىن»,-دەدى كارىم ءماسىموۆ ترياتلوننان قر چەمپيوناتىنىڭ استاناداعى اشىلۋىندا.
ونىڭ سوزىنشە, جۋىردا عانا WTC (World Triathlon Corporation) ۇيىمىمەن استانادا Ironman سەرياسىنىڭ ستارتاپتارىن وتكىزۋ جونىندە ۇزاقمەرزىمدى كەلىسىمگە قول قويىلدى.
«بۇگىنگى جارىسقا قاتىسۋشىلاردىڭ بارلىعىن قۇتتىقتايمىن! سىزدەرگە كەلەسى جىلدىڭ شىلدەسىندە Ironman 70.3 Astana جارىسى وتەتىن تراسسانى سىناپ كورۋدىڭ قايتالانباس مۇمكىندىگى تۋىپ تۇر. سىزدەرگە «جولدارىڭىز بولسىن!» دەپ تىلەيمىز»,-دەپ قورىتتى كارىم ءماسىموۆ.
وسىعان دەيىن حابارلانعانىنداي, 30 شىلدەدە ازيا كۋبوگىنىڭ اياسىندا ترياتلوننان قازاقستان چەمپيوناتى باستالدى. وعان 200 سپورتشى قاتىسۋدا. اتالمىش سپورت دوداسىنا كاسىپقوي سپورتشىلار دا اۋەسقويلار دا قاتىسۋدا. (ولار سۋدا 1,9 كم قاشىقتىقتى ءجۇزىپ ءوتىپ, ۆەلوسيپەدپەن 90 كم جەردى ءجۇرىپ ءوتىپ, جارتىلاي مارافونعا (21,1 كم) جۇگىرۋلەرى كەرەك. وسىنىڭ بارلىعى ءبىر جارىستىڭ اياسىندا بولادى)
جەكەلەگەن جارىستارمەن قاتار كوماندالىق ەستافەتا دا وتەدى. شاقىرىلعان قوناقتاردىڭ اراسىندا تانىمال سپورتشىلار بار. مىسالى, ولاردىڭ قاتارىندا ۆەلوشاباندوز, وليمپيادا چەمپيونى, ترياتلەت الەكساندر ۆينوكۋروۆتىڭ ەسىمىن اتاۋعا بولادى.
