مينيستر تامارا دۇيسەنوۆانىڭ باستاماسىمەن قولعا الىنعان شارا الدىمەن قازىعۇرت اۋدانىنان باستالدى. اكتسيا اياسىندا ءوڭىر تۇرعىندارى تامىزدىڭ 2-سىنە دەيىن اتالمىش ۆەدومستۆا باسشىلارىنان تىكەلەي كەڭەس الا الادى, دەپ حابارلايدى قازاقپارات حاا ءتىلشىسى.
قازىعۇرت اۋدانىندا بولعان مينيسترلىك وكىلدەرى الدىمەن اۋدان اكتيۆىمەن, كەيىننەن جەرگىلىكتى كاسىپكەرلەرمەن كەزدەستى. الەۋمەتتىك كومەكتى جاڭعىرتۋ, «ورلەۋ» جوباسىنا قاتىسۋ, زەينەتاقى جۇيەسىنىڭ رەفورماسى, جۇمىس بەرۋشىلەر مەن جۇمىسشىلاردىڭ قۇقىعىن ساقتاۋ سىندى ماسەلەلەر بويىنشا پىكىر الماسىلدى.
ەڭبەك زاڭناماسىنداعى قازاقستاندىقتاردىڭ قۇقىعى مەن مەملەكەت تاراپىنان بەرىلەتىن سان الۋان كومەك تۇرلەرى كەڭىنەن ءتۇسىندىرىلدى. ءوز كەزەگىندە ۆەدومستۆا وكىلدەرى الەۋمەتتىك كومەك ماسەلەسى بويىنشا تۇرعىنداردى جەكە قابىلدادى.
جيىندا سونداي-اق مۇگەدەكتەردىڭ قۇقىعىن قورعاۋ, مۇمكىندىگى شەكتەۋلى جاندارعا ارناۋلى الەۋمەتتىك قىزمەتتەر كورسەتۋ جانە نىسانداردى مۇگەدەكتەرگە قولجەتىمدى بولاتىنداي ەتىپ, بەيىمدەۋ جايى دا ءسوز بولدى. مينيسترلىك وتكىزگەن ماڭىزدى شارا حالىقپەن بايلانىستى جەتىلدىرە ءتۇسۋ, «اشىق ۇكىمەت» يدەياسىن ىسكە اسىرۋداعى قادامداردىڭ ءبىرى بولدى.
