جوعارعى سوت جەمقورلىققا قاتىستى ىسكە تەك ناۆاز ءشاريفتىڭ عانا ەمەس, ونىڭ وتباسى مۇشەلەرىنىڭ دە قاتىسى بار دەپ تانىپ وتىر. ولاردىڭ قاتارىندا ۇكىمەت باسشىسىنىڭ قىزى جانە ەكى بالاسى بار. پرەمەر-ءمينيستردىڭ ىسىنە قاتىستى ۇكىمدى جوعارعى سوتتىڭ بەس مۇشەسى شىعاردى.
حالىقارالىق جۋرناليستىك زەرتتەۋلەر بىرلەستىگى بىلتىر 3 ساۋىردە داۋلى مالىمەتتەر جاريالاعان بولاتىن. وندا 200-دەن استام پاكىستان ازاماتىنىڭ وفشورلىق كومپانيالاردىڭ يەلەرى بولىپ تابىلاتىنى, ولاردىڭ ىشىندە پاكىستان پرەمەرى ناۆاز ءشاريفتىڭ بالالارى (ەكى ۇلى – حۋسەين مەن حاسان جانە قىزى – ماريام) جانە تۋىستارى بار ەكەنى ايتىلادى.
ناۆاز شاريف پاكىستان پرەمەر-ءمينيسترى لاۋازىمىن ءتورت رەت اتقارعان. ول 1990 جىلدىڭ قاراشاسىنان 1993 جىلدىڭ ساۋىرىنە دەيىن, 1993 جىلدىڭ مامىرىنان شىلدە ايىنا دەيىن, 1997 جىلدىڭ اقپانىنان 1999 جىلدىڭ قازان ايىنا دەيىن جانە 2013 جىلدىڭ شىلدەسىنەن قازىرگى ۋاقىتقا دەيىن پاكىستان ۇكىمەتىن باسقاردى.
