باقىتجان ساعىنتاەۆ كرەمني بالقىتپاسىن شىعارۋ, تازارتۋ جانە قۇيۋ جۇزەگە اسىرىلاتىن وندىرىستىك تسەحتاردى ارالاپ شىقتى, سونداي-اق كرەمنيدى ارالىق ساقتاۋ قويماسىنا باردى.
«Tau-Ken Temir» جشس باسقارما توراعاسى مۇرات جۇكەنوۆ قر پرەمەر-ءمينيسترى باقىتجان ساعىنتاەۆقا تەحنولوگيالىق ۇدەرىستەردىڭ ەرەكشەلىكتەرى تۋرالى, سونداي-اق كاسىپورىندى دامىتۋ بويىنشا اعىمداعى جەتىستىكتەر مەن جوسپارلار تۋرالى باياندادى.
2018-2019 جىلدارى 1,5 ملرد تەڭگە سوماعا ينۆەستيتسيالىق باعدارلامانى ىسكە اسىرۋ جوسپارلانعان, ول شيكىقۇرامالىق ماتەريالدار قويماسىن سالۋدى, پاركتى جاڭارتۋدى جانە تەحنولوگيالىق جابدىقتاردى جاڭعىرتۋدى كوزدەيدى.
كاسىپورىندى دامىتۋ جوسپارلارى قر پرەزيدەنتى ن. نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىن ورىنداۋ اياسىندا ونەركاسىپتىك كاسىپورىنداردى تەحنولوگيالىق جاڭعىرتۋ بويىنشا قازاقستاندا جۇرگىزىلىپ جاتقان جۇمىسقا سايكەس كەلەدى.
«Tau-Ken Temir» جشس كاسىپورنى 2014 جىلى پايدالانۋعا بەرىلگەن جانە ەلەكترپەشتەر وندىرەتىن كوشباسشىلاردىڭ ءبىرىنىڭ بىرەگەي ەۋروپالىق جابدىعىنا يە. كاسىپورىننىڭ جوبالىق قۋاتى جىلىنا 24 مىڭ توننا مەتاللۋرگيالىق كرەمنيدى قۇرايدى. جوبانىڭ ارتىقشىلىعى تولىق ەكسپورتقا باعىتتالعاندىعى بولىپ تابىلادى. كاسىپورىن ونىمدەرى الىس جانە تاياۋ شەتەلگە, اتاپ ايتقاندا اقش, ەو ەلدەرىنە, رەسەي جانە بەلورۋسسياعا ەكسپورتتالادى, وعان قوسا ونىمدەگى قازاقستاندىق قامتۋ 80% قۇرايدى.
