اقتوبە, اقمولا, قوستاناي, قاراعاندى, پاۆلودار جانە شىعىس قازاقستان وبلىستارىنان, سونداي-اق استانا مەن الماتى قالالارىنان كەلگەن 12-16 جاس ارالىعىنداعى 60 سپورتشى مەن جەتى جاتتىقتىرۋشى سپورتتىق لاگەردە باس قوستى. بالالارعا ارنالعان جازعى ساۋىقتىرۋ شاراسىنىڭ ۇيىمداستىرۋشىسى – قازاقستان رەسپۋبليكاسىنىڭ «شاڭعى جارىسىنىڭ ۇلتتىق فەدەراتسياسى» قب بالالارعا ارناپ سان ءتۇرلى باعدارلاما ازىرلەدى. سپورتشى بالالار باسسەيندە شومىلىپ, ۆولەيبولدان ءوزارا سايىسقا ءتۇستى. ناتيجەسىندە, اقمولا وبلىسىنىڭ كومانداسى ءبىرىنشى ورىندى قانجىعاسىنا بايلادى. سونىمەن قاتار, ولار اتپەن سەرۋەندەپ, ۇستەل تەننيسىن ويناپ, شاڭعى روللەرلەرىندە كوماندالىق جارىسقا قاتىسۋعا مۇمكىندىك الدى. ەلىمىزدىڭ ءار ايماعىنان كەلگەن جاسوسپىرىمدەردىڭ قۋانىشىندا شەك جوق. سەبەبى, وسى تەكتەس لاگەر ەلىمىزدە بۇرىن-سوڭدى بولماعان ەدى.
– قازىرگى ۋاقىتتا بالالاردىڭ كوبى بوس ۋاقىتتارىن ۇيالى تەلەفونعا تەلمىرۋمەن وتكىزەتىنى بەلگىلى. ال لاگەردە ولار ءبىر-بىرىمەن جاقىن ارالاسىپ, اڭگىمەلەسىپ شۇيىركەلەسەدى. جالپى, سپورت لاگەرىندە قانداي دا ءبىر ىسپەن اينالىسىپ, جارىستارعا قاتىسقان كەزدە بوس جۇرۋگە ۋاقىتتارى بولمايدى. سوڭعى ۋاقىتتا جاستاردىڭ سپورتقا دەگەن قىزىعۋشىلىعى ەسەلەپ ارتىپ كەلەدى. قازىرگى كەزدە كىمدە-كىم سپورتپەن اينالىسسا, ول مادەنيەتتى, سالاماتتى, سىپايى ءارى پاراساتتى ادام دەگەن باعا بەرىلەدى. العاشقى كۇننەن باستاپ وسى قاسيەتتەردىڭ بارلىعىن جاس شاڭعىشىلاردىڭ بويىنا سىڭىرۋگە تىرىستىق, – دەيدى قازاقستان شاڭعى جارىسى ۇلتتىق فەدەراتسياسىنىڭ باس حاتشىسى اندرەي نەۆزوروۆ.
ايتا كەتسەك, اتالعان لاگەر ىلە الاتاۋى جوتاسىنىڭ بەتكەيىنەن 1500 مەتر بيىكتىكتەگى بىرەگەي جەردە, تالعار قالاسىندا ورىن تەپكەن. بيىل العاش رەت قولعا الىنعان يگى باستامانى ۇيىمداستىرۋشىلار جىل سايىن جازعى دەمالىستا ءداستۇرلى تۇردە وتكىزەمىز دەپ وتىر.
ارمان وكتيابر,
«ەگەمەن قازاقستان»
الماتى
