مەملەكەت 2010 جىلدان بەرى بىلىكتى كادرلارمەن, زاماناۋي ەمدىك جانە دياگنوستيكالىق قۇرىلعىلارمەن جابدىقتالعان ارنايى پويىزدى جولعا شىعارعان ەدى. بىلتىرعا دەيىن «دەنساۋلىق» پويىزدارى شالعايداعى 1 052 بەكەتكە بارىپ, 299 مىڭ تۇرعىندى, سونىڭ ىشىندە 70 مىڭنان استام بالانى دارىگەرلىك تەكسەرۋدەن وتكىزگەن. ونىڭ سىرتىندا 1,5 ميلليونعا جۋىق دياگنوستيكالىق ەمشارا, 4 مىڭ شاعىن امبۋلاتوريالىق وتا جاسالىپ, 19 تەلەمەديتسينالىق كەڭەس بەرىلگەن. سونداي-اق, اق جەلەڭدىلەر ادامداردىڭ بويىنان ولاردىڭ وزدەرى دە بىلمەي جۇرگەن 394 مىڭ دەرتتى انىقتاپتى.
قۇرامىندا تەراپەۆت, ستوماتولوگ, وفتالمولوگ, وتورينولارينگولوگ, حيرۋرگ, پەدياتر, گينەكولوگ, ەندوسكوپيست, كارديولوگ, نەۆروپاتولوگ سەكىلدى ماماندارى بار دارىگەرلىك بريگادا ونكولوگيالىق اۋرۋلاردى, تۋبەركۋلەز, قانت ديابەتى سەكىلدى اۋىر سىرقاتتاردى باستاپقى ساتىدا انىقتاۋدا ۇلكەن كومەگىن تيگىزىپ ءجۇر. مىسالى, ارنايى جابدىقتالعان زەرتحانالاردا قاننىڭ قۇرامىنداعى قانت مولشەرى بىرنەشە سەكۋندتا انىقتالادى. ناۋقاس جانداردىڭ قان جانە نەسەپ ساراپتاماسى, بيوحيميالىق تالداۋ دا شۇعىل دايىندالادى. مۇنىڭ ءبارى دياگنوزدى ءدال ءارى تەز قويۋعا مۇمكىندىك بەرەدى.
ەكى قۇرامعا بولىنگەن پويىزدىڭ «سالاماتتى قازاقستانى» بيىلعى 6 قاراشاعا دەيىن ورتالىق, سولتۇستىك, شىعىس جانە باتىس ايماقتاردى ارالاسا, «دەنساۋلىق» قۇرامى 20 جەلتوقسانعا دەيىن وڭتۇستىك جانە باتىس ايماقتارعا بارادى.
جولعا شىققان 96 كۇندە «دەنساۋلىق» پويىزدارى جۇزگە جۋىق تەمىر جول ستانساسىنىڭ تۇرعىندارىنا كومەك كورسەتكەن. ولاردىڭ ىشىندە قاراعاندى, ماڭعىستاۋ, شىعىس قازاقستان, اتىراۋ, قىزىلوردا جانە پاۆلودار وبلىستارىنان 5193 بالا بار.
دارىگەرلەرگە قارالعانداردىڭ جالپى سانى – 192 392. ناقتىراق, ايتساق, 157 013 تۇرعىن دياگنوستيكالىق تەكسەرۋدەن وتسە, 566 ازاماتقا امبۋلاتوريا جاعدايىندا وتا جاسالعان. ماممولوگ-ماماندارعا – 873 ايەل, ءتىس دارىگەرلەرىنە – 9949 ازامات قارالعان.
«سالاماتتى قازاقستان» مەديتسينالىق پويىزى وتكەن اپتادا شىعىس قازاقستان وبلىسىنداعى ساپارىن اياقتادى. قازىرگى كەزدە جىلجىمالى قۇرام پاۆلودار ءوڭىرىن, ال «دەنساۋلىق» پويىزى قىزىلوردا وبلىسىن ارالاپ ءجۇر, دەيدى «قازاقستان تەمىر جولى» ۇك» اق «الەۋمەتتىك جوبالار قورى» كورپوراتيۆتىك قورىنىڭ ديرەكتورى ەربول كەڭگىرباەۆ.
قىمبات توقتامۇرات,
«ەگەمەن قازاقستان»
