ەسكە سالا كەتسەك, «اليۋمينستروي» شاعىن اۋدانىنداعى ەكى قاباتتى ۇيلەر پاۆلودارداعى اليۋميني زاۋىتىنىڭ قىزمەتكەرلەرى ءۇشىن سالىنعان. 60 جىلدىق تاريحى بار نىساندار ابدەن ەسكىرىپ, قيراۋعا شاق قالدى. اتالمىش تۇرعىن ءۇي كەشەنىنىڭ اۋماعىندا وسىلايشا ارقايسىسى 8 پاتەردەن 159 ءۇي بوي كوتەردى. شاعىن اۋدانداعى 1272 پاتەردە 4 مىڭعا جۋىق ازامات تۇرادى. ولاردىڭ كەيبىرەۋلەرى ادام تۇرۋعا جارامسىز. سوندىقتان, بىرنەشە جىل بۇرىن ەسكى ۇيلەر سۇرىلە باستادى. ال ولاردىڭ ورنىندا «سارىارقا» دەپ اتالعان جاڭا شاعىن اۋدان سالىنا باستادى. تۇرعىنداردىڭ ماسەلەسىن وڭتايلى شەشۋ جۇمىستارى «نۇرلى جەر» باعدارلاماسى اياسىندا جاندانا ءتۇستى.
پاۆلودار قالالىق قۇرىلىس باسقارماسىنىڭ مالىمەتىنشە, جاڭا شاعىن اۋداندا 9 قاباتتى 40 ءۇي سالىنادى. 4200 پاتەر حالىق يگىلىگىنە بەرىلەدى.
«بيىلعى جىلى جالپى اۋماعى 26,2 مىڭ شارشى مەتردى قۇرايتىن تۇرعىن ۇيلەردىڭ قۇرىلىسى جالعاسىن تابادى. پاتەر سانى – 374. جالپى, وبلىس ورتالىعىندا ءبىر جىلدا كەم دەگەندە 10 ءۇيدىڭ قۇرىلىسى جۇرگىزىلەدى», - دەيدى پاۆلودار وبلىستىق قۇرىلىس, جولاۋشىلار كولىگى جانە اۆتوموبيل جولدارى باسقارماسى باسشىسىنىڭ مىندەتىن اتقارۋشى رۇستەم رايىسوۆ.
جاڭا اۋداندا بالاباقشالار, حالىققا قىزمەت كورسەتۋ جانە الەۋمەتتىك-مادەني نىساندار سالىنادى.
«قازىرگى ۋاقىتتا 8 ءۇي سالىندى. كەزەكتە تاعى 4 ءۇي بار. 2020 جىلعا قاراي «سارىارقا» شاعىن اۋدانىندا 40 نىسان بوي كوتەرەدى. قۇرىلىس بارىسىندا مودەلدەۋ مەن ۇيلەردى سالۋ كەزىندە يننوۆاتسيالىق تەحنولوگيالار قولدانىلادى», - دەيدى پاۆلودار وبلىسى اكىمىنىڭ ءبىرىنشى ورىنباسارى دۇيسەنباي تۇرعانوۆ.
ايتا كەتەيىك, بۇگىنگى كۇنگە دەيىن بۇل شاعىن اۋداندا 583 پاتەر قولدانىسقا بەرىلدى. كوپقاباتتى ۇيلەردىڭ ءبىر بولىگى پاۆلودارداعى تۇرعىن ءۇي كومبيناتىنىڭ ماتەريالدارىنان سالىنادى. كاسىپورىن ەكى جىل بۇرىن فينن تەحنولوگياسى نەگىزىندە جۇمىسىن باستادى. قازىرگى كەزدە شاعىن اۋداندا ينجەنەرلىك ينفراقۇرىلىمنىڭ قۇرىلىسى قاتار جۇرگىزىلىپ جاتىر.
