الاڭ يەلەرى ءا دەگەننەن-اق ويىن تىزگىنىن ءوز قولىنا الدى. باستاپقى ون مينۋتتا پولياكتاردى ورتا تۇستان ۇزاتا قويمادى. ال 5-مينۋتتا پاتريك ءتۆۋماسيدىڭ ەسەپ اشاتىن مۇمكىندىگى بولىپ ەدى. بىراق ونىڭ وڭ قاپتالدان باعىتتاعان دوبى نە سوققى ەكەنى, نە ارىپتەستەرىنە جىبەرگەن پاسى ەكەنى تۇسىنىكسىز بولىپ قالدى.
بۇل كەزدەسۋ جاراقاتسىز اياقتالماي قويمادى. كەزدەسۋدىڭ 16-مينۋتىندا كەزەكتى دوپقا تالاس كەزىندە دجوردجە دەسپوتوۆيچ جاراقات الىپ قالىپ, الاڭنان كەتۋىنە ءماجبۇر بولدى. ونىڭ ورنىنا رومان مۇرتازاەۆ شىقتى.
"استانانىڭ" باستاپقى 25 مينۋتتا ءبىر ەمەس ەكى گول سوعاتىن مۇمكىندىگى بولدى. دميتري شومكو باستاعان شابۋىل دا گولمەن اياقتالۋى ءتيىس ەدى. الايدا, سوڭعى ساتتە لاسلو كلياينxايسلەردىڭ باعىتتاعان سوققىسى تىم بيىك كەتتى.
ال "لەگيا" العاشقى تايمنىڭ ورتاسىنا تامان شابۋىلدارىن جيىلەتتى. نەبارى ەكى مينۋتتىڭ ىشىندە موكين قاقپاسىنىڭ الدىندا ەكى قاۋىپتى ءسات ۇيىمداستىردى. الدىمەن, 29-مينۋتتا دومينيك ناگي يگور شيتوۆتان ايلاسىن اسىرىپ بارىپ دوپتى قاقپا ماڭايىنا جىبەرگەندە, شابۋىلدى اياقتايتىن ەشكىم بولماي قالدى. ارتىنشا, اۋەلەي كەلگەن ايىپ دوبىنا دا "لەگيا" ويىنشىلارى ءبىرىنشى جەتىپ, ءدال سوققى باعىتتاعان. بىراق الەكساندر موكيننىڭ جانكەشتىلىگىنىڭ ارقاسىندا گول سوعىلمادى.
فۋتبولداعى "سەن سوقپاساڭ ساعان سوعادىنىڭ" كەرى كەلىپ, "استانا" سەگىز مينۋتتا "لەگياعا" ەكى گول دارىتىپ ۇلگەردى. 37-مينۋتتا ايىپ الاڭىنداعى تارتىستى ساتتە كونگولىق شابۋىلشى جۋنيور كابانانگا جاقىن بۇرىشتى ءدال كوزدەپ, العاشقى گولدى سالدى. ال ءبىرىنشى تايمنىڭ اياقتالۋىنا ساناۋلى سەكۋندتار قالعاندا سەرىكجان مۋجيكوۆتىڭ پاسىنان كەيىن يۆان ماەۆسكي شامامەن 20 مەتر قاشىقتىقتان تۋرا سوققى باعىتتاپ, باسىمدىقتى ارتتىرا ءتۇستى.
كەزدەسۋدىڭ ەكىنشى 45 مينۋتىن پولشالىقتار جاڭا قارقىنمەن باستادى. باس باپكەرى ياتسەك ماگەرادان جاڭا نۇسقاۋلار العانى كورىنىپ تۇردى. ءتورشىنىڭ ىسقىرىعى ەستىلىسىمەن بىردەن العا ۇمتىلىپ, ەكى گولدىڭ ەسەسىن قايتارۋعا تىرىسىپ باقتى. ال ابدىراپ قالعان "استانا" فكتبولشىلارى جانكۇيەرلەرىنىڭ قولداۋى ارقاسىندا ەستەرىن جيىپ, ويىندى اقىرىنداپ ءوز قولىنا الا باستادى. پاتريك تۆۋماسي, جۋنيور كابانانگا جويقىن سوققىلارىن جيىلەتتى. 55-مينۋتتا بۇرىشتاما دوبىنان كەيىن ءۇشىنشى گول دا سوعىلعان ەدى, بىراق سوڭعى ساتتە كابانانگا ويىننان تىس قالعان ەكەن.
جەرلەستەرىمىز مۇنىمەن دە توقتامادى. 58-مينۋتتا تۆۋماسي اسقان جىلدامدىقپەن قارسى شابۋىلعا شىققان ەدى. بىراق سوڭعى ساتتە كونگولىق ارىپتەسىنە دوپتى ءدال جەتكىزە المادى. اراعا ون مينۋت سالىپ, "لەگيانى" ءۇشىنشى مارتە قاپى قالدىراتىن مۇمكىندىك تۋىپ ەدى, بۇل جولى دا ساتتىلىك جولداس بولمادى. بۇل ويىندا ادىلەتسىزدىك تە ورىن الىپ جاتتى. العى شەپتە ونەر كورسەتكەن ەكى شابۋىلشىمىزدى قاقپا ماڭىندا ءتۇرلى تاسىلمەن قۇلاتىپ جاتسا دا اربيتر ءۇنسىز قالىپ جاتتى. تورەشىنىڭ وسىنداي شەشىمىنە نارازى بولعان xالىق بىرگە "پەنالتي" دەپ ون ءبىر مەترلىك ايىپ دوبىن بەلگىلەۋدى تالاپ ەتىپ تۇردى.
ماتچتىڭ سوڭعى ون بەس مينۋتىندا "استانانىڭ" قارقىنى باسىلىپ قالىپ ەدى. وسىنى ۇتىمدى پايدالانعان ۆارشاۆالىقتار 79-مينۋتىندا ارماندو ساديكۋدىڭ ارقاسىندا ەسەپ ايىرماسىن قىسقارتىپ كەتتى. ال قالعان ۋاقىتتا ستانيمير ستويلوۆ وسى ەسەپتى ساقتاۋدى ءجون كورىپ, شابۋىل شەبىندە جۇرگەن رومان مۇرتازاەۆتىڭ ورنىنا ەۆگەني پوستنيكوۆتى شىعاردى. دەگەنمەن, كەزدەسۋدىڭ اياقتالۋىنا ساناۋلى مينۋتتار قالعاندا پاتريك تۆۋماسي ءۇشىنشى گولدى سالىپ, ۆارشاۆاداعى ويىننىڭ الدىندا باسىمدىقتى ارتتىردى.
ايان ءابدۋالي,
"ەگەمەن قازاقستان"
