«استانا» — «لەگيا». ءبىزدى نە كۇتىپ تۇر نەمەسە پولياكتاردى قالاي جەڭەمىز؟

1. «استانا» — «لەگيا» اراسىنداعى ەكى ماتچقا قۇرىلعان ستراتەگيا, ءوز الاڭىندا جانە قوناقتا ءارتۇرلى فۋتبول ويناۋ قانشالىقتى ماڭىزدى؟ ەكى كلۋب كەلەسى كەزەڭ تاعدىرىن ءبىرىنشى ويىندا شەشە الا ما؟

2. «استانانى» ءبىرىنشى ويىندا قانداي ەسەپ قاناعاتتاندىرادى؟

3. «استانا» «لەگياعا» قارسى ويىنعا دايىن با؟

نۇرعازى ساساەۆ, استانا قالالىق فۋتبول فەدەراتسياسى سايتىنىڭ باس رەداكتورى:

1. «لەگيا» سياقتى قارسىلاسپەن بارلىق ماسەلەنى ءبىرىنشى ويىندا شەشە سالۋ مۇمكىن ەمەس. قارسىلاستى جاقسىلاپ زەرتتەپ, ونىڭ وسال تۇستارىن تابۋ قاجەت. ماسەلەن, پولياكتاردىڭ وڭ قانات لاتەرالى اۋىر قوزعالادى, وسى فاكتوردى پايدالانۋعا بولادى. ال جالپى, «لەگيا» ۇيىمداسقان كوماندا. ءساتتى قورعانادى, شابۋىلعا جىلدام كوشەدى. سايىپ كەلگەندە, تالعات بايسۋفينوۆتەن كەڭەس الۋعا بولادى. ول باسقارعان تۇستا قازاقستان قۇراماسى پولشامەن تەڭ وينادى, سول كەزدە «لەگيانىڭ» بىرنەشە فۋتبولشىسى ويناعان بولاتىن.

2. ءوز الاڭىمىزدا كوبىرەك شابۋىلعا شىعىپ, قورعانىسقا بەكەم تۇرۋ كەرەك. «استانانىڭ» باپكەرلەر شتابى ءوز الاڭىندا جەڭىستى كوزدەپ وتىر دەپ ويلايمىن. مەنىڭشە, يۋرمالانىڭ «سپارتاگىنا» قارسى جاۋاپ ويىندا «استانا» ادەيى باسەڭ وينادى, بۇكىل كارتاسىن اشىپ تاستاماۋعا بەكىندى. سول ويىندا «لەگيانىڭ» بارلاۋشىلارى تريبۋنادا وتىردى دەگەن اقپاراتتار بار. سول ماتچتاعى «استانانىڭ» ويىن ساپاسى پولياكتاردى الداندىرۋعا قاراتىلعان مانەۆر. مەنىڭشە, «استانا» ءوز ۇيىندە جەڭىس ءۇشىن وينايدى, وعان قول جەتكىزەدى دە. 2:0 بولادى دەپ ۇمىتتەنەم. باستىسى — وسى ويىندا گول جىبەرىپ الماۋ.

3. ءالى تولىق دايىن ەمەس. دايىن دەپ ايتۋعا بولمايدى. ءبىز ءالى جاڭا ويىنشا مارين توماسوۆتى كورگەن جوقپىز. ال ۆەنگر لاسلو جاقسى ويناپ ءجۇر. گراحوۆاتس جاقسى باستاپ ەدى, قازىر ءتىپتى كورىنبەي كەتتى. قورعانىس قىراعى بولۋعا مىندەتتى. كوبىنەسە ەۋروكۋبوگتاردا استانالىقتاردىڭ قورعانىسى ورەسكەل قاتەلىكتەر جىبەرىپ جاتادى.

ءانۋار ءابدىراحمانوۆ, sports.kz رەسپۋبليكالىق سپورت پورتالىنىڭ ءتىلشىسى:

1. ەڭ الدىمەن «استانانى» اۋىر ەكى ويىن كۇتىپ تۇرعانىن اتاپ وتەيىن. ءبىر ويىندا ەشقانداي ماسەلە شەشىلە قويمايدى. العاشقى ماتچتىڭ ءوز الاڭىمىزدا ءوتۋى پولياكتارعا قول كەلۋى مۇمكىن. ال ءوز الاڭىندا «لەگيا» جانكۇيەرلەرىنىڭ كوز الدىندا ءبىرىنشى ويىندا جىبەرگەن قاتەلىكتەرىن تۇزەتۋ مۇمكىندىگى بار. «لەگيا» — وتە قيىن قارسىلاس. ەۋروكۋبوگتىڭ وتكەن ماۋسىمىندا «لەگيا» چەمپيوندار ليگاسىنىڭ توپتىق كەزەڭىندە ويناپ, «رەال مادريد» سەكىلدى توپ كلۋبپەن ۇپاي بولىسكەن بولاتىن. «استانا» دا وسال ەمەس, ارينە, ەۋروكۋبوكتاردا ءبىرىنشى جىل ويناپ جاتقان جوق. ءبىزدىڭ كوماندا كۇشتى قارسىلاستاردى قالاي جەڭۋگە بولاتىنىن بىلەدى.

2. ءبىرىنشى ويىننىڭ «استاناعا» ۆارشاۆادا وڭاي بولاتىن ەسەبى — 3:0. بۇعان ناتيجەگە قالاي قول جەتكىزۋگە بولاتىنى تۋرالى ستويلوۆ باس قاتىرسىن.

3. ەۋروكۋبوكتا كەز كەلگەن كوماندا ءوز مۇمكىندىكتەرى شەگىنەن دە ارتىق ونەر كورسەتۋى ءتيىس. ءبىزدىڭ كوماندانىڭ پروبلەمالارى بار, ول, ستانيمير ءباسپاسوز كونفەرەنتسيالارىندا ۇنەمى ايتاتىنىنداي, شابۋىلعا ءساتتى نۇكتە قويۋ. «استانا» ءار ويىندا قاجەتىنشە قولايلى ءسات تۋىنداتادى, بىراق ولاردى گولعا اينالدىرۋدا كەمشىن تۇستارى بايقالىپ جاتادى.

ناعي باقىتبەكوۆ, kazfootball.kz جوباسىنىڭ جەتەكشىسى:

1. «لەگيا» — وتە مىقتى قارسىلاس. چەمپيوندار ليگاسى مەن ەۋروپا ليگاسىنىڭ توپتىق كەزەڭدەرىنىڭ تۇراقتى قاتىسۋشىسى. پولشانىڭ سوڭعى جىلداعى تۇراقتى چەمپيونى. بىراق «استانا» دا سوڭعى 3 جىلدا ايتارلىقتاي جەتىلە ءتۇستى, ەۋروپا تاجىريبەسىن الدى, «الپاۋىتتاردىڭ ۇرەيى» اتاندى. ەكى ويىنعا قۇرىلعان ەرەكشە ستراتەگيا قاجەت دەگەنگە كەلىسەمىن. ۇيدەگى نەمەسە قوناقتاعى ويىن ماڭىزدى دەۋگە بولمايدى. پولياكتارمەن وتەتىن ەكى ويىننىڭ اراسىندا ەلوردالىق ۇجىمنىڭ كۇنتىزبەسىندە باسقا ويىننىڭ بولماۋى وتە ماڭىزدى. ەكى ويىنعا قويىلعان ستراتەگياعا قاتىستى ايتارىم –  «استانا» ءوز الاڭىندا دا, قوناقتا دا ءوز ويىنىن ويناۋى ءتيىس دەپ سانايمىن. مەنىڭشە, كوماندالاردىڭ مۇمكىندىكتەرى 50/50.

2. ەۋروكۋبوگتاردا قاشاندا ءبىرىنشى ويىندى سىرت الاڭدا وتكىزگەن ءجون دەپ ەسەپتەلەدى. بىراق جەرەبە ءبىرىنشى ويىندى ءبىزدىڭ الاڭعا بەلگىلەدى, مۇندا باستىسى — گول وتكىزىپ الماۋ. قوناقتاعى گولدىڭ مۇنداي ويىندارداعى ءمانى جوعارى, بىزگە ءبىرىنشى ويىندا 1:0 نەمەسە 2:0 ەسەپپەن جەڭۋ كەرەك. ال قوناقتا قالاي ويناۋ كەرەكتىگىن «استانا» كلۋبى جاقسى بىلەدى. چەمپيوندار ليگاسىنىڭ ىرىكتەۋ تۋرنيرىندەگى كيپردىڭ اپوەل-ىنە قارسى ويىندى ەسكە الىڭىز. سول كەزدە ءبىزدىڭ كوماندا ءبىرىنشى ويىندى ءوز الاڭىندا وتكىزىپ, 1:0 ەسەبىمەن ۇتتى. سودان كەيىن جانكۇيەرلەردىڭ 80-90 پايىزى ەكى ويىن ناتيجەسى بويىنشا كيپرلىكتەرگە باسىمدىق بەرىپ, اپوەل ءوز الاڭىندا «استانانى» ءىرى ەسەپپەن ۇتىپ, ەشقانداي مۇمكىندىك قالدىرمايدى دەگەن ەدى. ال «استانا» قوناقتا ۇلگىلى ويىن ورنەگىن كورسەتىپ, ەۋروپا چەمپيوندار ليگاسىنىڭ توپتىق كەزەڭىنە شىققان بولاتىن. قازىر دە جاعداي سولاي. «لەگيا» فاۆوريت, ءبىرىنشى ويىندا گول وتكىزىپ الماۋ, مۇمكىندىگىنشە كوپ دوپ سوعۋ وتە ماڭىزدى.

3. «استانا» دايىن. ءبىزدىڭ كوماندا تاجىريبەلى, ەلىمىزدەگى ۇزدىك باپكەرلەر قۇرامى وسىندا جينالعان. ءبىزدىڭ تاعى ءبىر باسىمدىعىمىز – قال ەل بىرىنشىلگى قىزۋ شاعىندا. قازاقستانداعى ۇزدىك مەنەدجمەنت تە — «استانادا». جاڭا بيىكتەرگە شىعۋ ءۇشىن بارلىعى دايىن.