سالتاناتتى شارانى اشقان قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلى, «ۇلتتىق كينەماتوگرافيا ونەرى مەن عىلىمدارى اكادەمياسى» قوعامدىق بىرلەستىگىنىڭ پرەزيدەنتى ايمان مۇساقوجاەۆا, استانا قالاسىنىڭ اكىمى اسەت يسەكەشوۆ پەن «وسكار» جانە «التىن گلوۋبس» يەگەرى نيكولاس كەيدج بالالارعا ساتتىلىك تىلەدى. كوپتەگەن شەت ەلدىك كونكۋرستاردان جۇلدەلى ورىندار الىپ جۇرگەن «Celebrity» شوۋ-ميم بالالار تەاترىنىڭ قاتىسۋشىلارى ساحنالاعان كوڭىلدى سپەكتاكل فەستيۆال ءسانىن اشا ءتۇستى.
فەستيۆال كەزىندە قازاقستان, فرانتسيا, نيدەرلاند, قىتاي, اۋعانستان, يران, تۋنيس, پەرۋ, ءۇندىستان, مەكسيكا, يسپانيا, يتاليا, دانيا, گرۋزيا سىندى ەلدەردىڭ شىعارماشىلىق توپتارىنىڭ 15 ءفيلمى كورسەتىلەدى. كينوفورۋمنىڭ قازىلار القاسى قازاقستاندىق تالانتتى بالالاردان قۇرىلعان. ولار «ۇزدىك فيلم», «ۇزدىك ستسەناري», «ۇزدىك بالا بەينەسى» اتالىمدارى بويىنشا جەڭىمپازداردى انىقتايدى.
التى بالادان قۇرالعان قازىلار القاسىنىڭ توراعاسى نۇربەك سادۋاقاسوۆ استانا قالاسىنداعى №56 مەكتەپ-ليتسەيىنىڭ 11 سىنىپ وقۋشىسى. ول استانالىق «Celebrity» شوۋ-ميم بالالار تەاترىنىڭ بەلسەندى مۇشەسى. تەاتر ۇجىمى 2016 جىلى بولگاريادا وتكەن «Golden Dream» حالىقارالىق كونكۋرستا گران-پري, 2016 جىلى سوچي قالاسىندا وتكەن «كينوتاۆريك» ونەر فەستيۆالىندە باس جۇلدەگە يە بولعان.
«فەستيۆال وتە جوعارى دەڭگەيدە ءوتىپ جاتىر دەپ سەنىمدى تۇردە ايتا الامىن. وسى بەس كۇن بويى بالالار كونكۋرسىنا قاتىسىپ جاتقان كينو تۋىندىلاردى شىنايى باعالاپ, ۇزدىكتەرىن انىقتايتىن بولامىز. مەن ءۇشىن ەڭ ماڭىزدى – سيۋجەت بىرتۇتاستىعى مەن شىعارما ءتۇيىنى», دەيدى جاس توراعا.
ال قازىلار القاسىنىڭ ەڭ كىشكەنتاي مۇشەسى – ادەليا ابدۋللينا. ول قازاق ۇلتتىق مۋزىكا اكادەمياسىنىڭ 2 سىنىپ وقۋشىسى. قازىر بالالارعا ارنالعان ءازىل-سىقاق ءفيلمىنىڭ ءتۇسىرىلىم جۇمىستارىنا قاتىسىپ جاتىر.
ايا ءومىرتاي,
"ەگەمەن قازاقستان"
