ادەمى ءارى ۆەلوسيپەدتەرىن جارىق شامدارمەن بەزەندىرگەن قاتىسۋشىلار ۆەلوشەرۋدى باستاماس بۇرىن بي بيلەپ, وزدەرىنە كوتەرىڭكى كوڭىل-كۇي سىيلادى. ارتىنشا, مارەگە كەلگەن اۋەسقويلار اراسىندا كوپتەگەن باعالى سىيلىقتار ويناتىلدى. ال ەڭ باستى سىيلىق - ۆەلوسيپەدتى نونا ەسىمدى الماتىلىق تۇرعىن جەڭىپ الدى.
- مەن وتە قۋانىشتىمىن. تۇنگى ۆەلوشەرۋگە العاش رەت قاتىسىپ, وسىنداي باعالى سىيلىق ۇتىپ الدىم. ءوزىمنىڭ جولداسىما وسى سپورتقا دەگەن قىزىعۋشىلىعىمدى ارتتىرعانى ءۇشىن العىس ايتامىن. سونىمەن قاتار, ۇيىمداستىرۋشىلارعا دا راحمەت ايتقىم كەلەدى, سەبەبى ءبىز ءۇشىن ارنايى جولداردى جاۋىپ, حالىقتى سالاۋاتتى ءومىر سالتىنا شاقىرۋدا. الداعى ۋاقىتتا دا ۆەلوشەرۋلەرگە مىندەتتى تۇردە قاتىساتىن بولامىز, دەدى نونا.
ايتا كەتەر جايت, بيىل ەكىنشى رەت وتكەن تۇنگى ۆەلوشەرۋ «سپورتتىق الماتى» بۇقارالىق سپورتتى دامىتۋعا ارنالعان باعدارلاما اياسىندا ۇيىمداستىرىلىپ وتىر. الداعى ۋاقىتتا, ۇيىمداستىرۋشىلار 8 ۆەلوشەرۋ وتكىزۋدى جوسپارلاۋدا.
