مادەني شارا تۇركيا رەسپۋبليكاسىنىڭ مادەنيەت جانە تۋريزم مينيسترلىگىنە قاراستى تۇركى الەمى مۋزىكالىق ءانسامبلى مەن استانا قالاسى فيلارمونياسىنىڭ سيمفونيالىق وركەسترىنىڭ قاتىسۋىمەن ءوتتى.
قوس وركەستردى اۆستريادا ءبىلىم العان, «التىن تاياقشا» ديريجەرلار بايقاۋىنىڭ گران-پري يەگەرى ەرنار نۇرتازين جۇرگىزدى. سونىمەن قاتار, تۇركيانىڭ بەلگىلى انشىلەر چيدەم گۇردال مەن دجەم گۇردال ونەر كورسەتتى. ولار قازاقتىڭ بەلگىلى «دۋداراي», تۇرىكتىڭ «تەڭىزدەگى كەش», «وتكەنىم – جۇرەگىمدەگى ءبىر جارا» اتتى اندەرىن ورىندادى.
– ەكسپو ارقىلى قازاق ەلىنىڭ اتاعى قازىرگىسىنەن دە شارىقتايتىنى انىق. بۇل كورمە كوپتەگەن سالالاردا, اسىرەسە مادەنيەت باعىتىندا قازاقستان مەن وزگە ەلدەردىڭ قارىم-قاتىناسىن جاقىنداتا تۇسەدى دەپ سەنەمىن. سونىمەن قاتار, ءبىز ەكى كونتسەرت وتكىزۋدى جوسپارلاپ وتىرمىز. العاشقىسى بۇگىن وتسە, ەكىنشىسى ەرتەڭ, ياعني 21 شىلدەدە ەكسپو الاڭىنداعى تۇركيا ۇلتتىق پاۆيلونىندا ۇيىمداستىرىلادى – دەدى چيدەم گۇردال.
شاراعا جينالعان قاۋىم ەكى ەلدىڭ ۇلتتىق, ەسترادالىق اندەرىن تىڭداپ قايتتى. بۇل كونتسەرت قازاقستان مەن تۇركيانىڭ دوستىعىنا ارنالعاندىقتان ءانشى دجەم گۇردال قازاق حالقىنىڭ ۇلتتىق اسپابى – دومبىرادا ونەر كورسەتتى.
– تۇركيالىقتار ءۇشىن قازاق حالقىنىڭ ورنى قانشالىقتى ەكەنىن وسى كەشتەن بايقاۋعا بولادى. ايتا كەتەرلىك ءبىر جايت, ءبىز قازاق ەلىن اتا جۇرتىمىز دەپ بىلەمىز. وسىعان بايلانىستى بولار سوڭعى كەزدەرى ءبىزدىڭ ەلدە دومبىراعا دەگەن قىزىعۋشىلىق ارتىپ كەلەدى. ىستانبۇلدا قازىر دومبىرا تارتۋدى ۇيرەتەتىن ارنايى مەكتەپتەر اشىلدى, – دەدى دجەم گۇردال.
ايتا كەتەيىك, 2016 جىلدىڭ 26 قازانىندا ءدال وسى اتاۋمەن, ياعني «قازاقستان – تۇركيا دوستىق اۋەندەرى» اتتى قازاقستان تاۋەلسىزدىگىنىڭ 25 جىلدىعىنا ارنالعان كونتسەرت وتكەن بولاتىن. وندا ديماش قۇدايبەرگەنوۆ, كامشات جولدىباەۆا, گۇلنۇر ورازىمبەتوۆا, اقەركە تاجىباەۆا, حانزادا توبى ونەر كورسەتكەن ەدى. ال بۇگىنگى شارا سونىڭ جالعاسى رەتىندە دە ەلوردا تۇرعىندارى مەن قوناقتارىنا تارتۋ ەتىلدى.
بۇدان بولەك, ۇيىمداستىرۋشىلار كونتسەرتتە كورەرمەندەرگە ارنايى لوتورەيا تاراتىپ, تۇرىك اۋە جولدارى كومپانياسى «Turkish Air» تاراپىنان بەرىلەتىن ىستانبۇلعا بارىپ قايتۋ بيلەتتەرى ويناتىلادى.
ايان ءابدۋالي,
«ەگەمەن قازاقستان»
