قازاق جانە ورىس تىلدەرىندە, سونىمەن قاتار اعىلشىن تىلىندە سۋبتيترلارى بار بۇل ديسكىنىڭ تۇساۋكەسەر ءراسىمىن «قازاقفيلم» كينوستۋدياسى, «CentauRus Rustem Abdrashev production» جانە «مەلومان» كومپانيالارى ۇيىمداستىرعان.
قازاق حاندىعىنىڭ 550 جىلدىعىنا وراي تۇسىرىلگەن «قازاق حاندىعى» كينوسەريالىنىڭ كينونۇسقاسى – «الماس قىلىش» ءفيلمى مادەنيەت جانە سپورت مينيسترلىگىنىڭ تاپسىرىسى بويىنشا جارىققا شىققان بولاتىن. بۇل اۋقىمدى جوبانىڭ يدەيا اۆتورى – ەلباسى ن.ءا.نازارباەۆ. ءفيلمنىڭ ستسەناريى ءىلياس ەسەنبەرليننىڭ «الماس قىلىش» رومانىنىڭ نەگىزىندە جازىلعان.
2017 جىلى 5 قاڭتاردا جالپىۇلتتىق پروكاتقا شىققان اتالمىش تولىقمەتراجدى كوركەم فيلم قازاقستاندىق پروكاتتا 72 ميلليون تەڭگەدەن استام قارجى جينادى. جالپى العاندا 2,5 مىڭنان استام سەانس, ونىڭ 60 پايىزى قازاق تىلىندە, 40 پايىزى ورىس تىلىندە كورسەتىلدى.
«الماس قىلىش» تاريحي كينوتۋىندىسىنىڭ DVD نۇسقاسىن ەلىمىزدىڭ اۋماعىندا «مەلومان» دۇكەندەر جەلىسى ارقىلى ساتىپ الۋعا بولادى. ودان بولەك, رۇستەم ءابدىراش «قازاق حاندىعى» سەريالىنىڭ ەكىنشى ماۋسىمىنىڭ ءتۇسىرىلىم جۇمىستارى قىركۇيەك ايىنان باستالاتىنىن قۋانا جەتكىزدى.
باعاشار تۇرسىنباي ۇلى,
«ەگەمەن قازاقستان»
الماتى
