اتالمىش كورمەگە وزدەرىنىڭ باي مۇرالارىن اكەلگەن ۇجىمنىڭ ءبىرى – «تاڭبالى» قورىق-مۇراجايى. بۇل مەكەمە الماتى وبلىسى, جامبىل اۋدانى, قاراباستاۋ اۋىلىننىڭ ماڭىندا ورنالاسقان. ەلدى مەكەننىڭ ءدال ىرگەسىندە 3800 گەكتار القاپتى الىپ جاتقان «تاڭبالى» شاتقالى بار. مۇندا قولا داۋىرىنەن باستاپ, ءبىزدىڭ زامانىمىزعا دەيىنگى ارالىقتى قامتيتىن 5000-نان استام پەتروگليف ورنالاسقان. بۇل مۇرالار ورتالىق ازيانىڭ جارتاس ونەرىندەگى بىرەگەي قۇندىلىق بولىپ سانالادى ءارى 2004 جىلدان باستاپ يۋنەسكو-نىڭ بۇكىل الەمدىك مۇرالار تىزىمىنە ەنگەن.
مۋزەي قىزمەتكەرلەرى «تاڭبالى پەتروگليفتەر» اتتى جىلجىمالى كورمەگە تاس بەتىنە بادىزدەپ ويمىشتاعان تاڭبالاردىڭ ارتۇرىنەن ەكسپوناتتار ازىرلەپتى. اتاپ ايتقاندا, كورمە زالىنا – تاۋەشكى, بۇعى سياقتى دالا جانۋارلارىنىڭ بەينەسى مەن توتەمدىك تابىنۋ ارەكەتىنە ءتان شەڭبەرلى كۇنجۇيەسى سياقتى تاستاعى بەينەلەرمەن قاتار, قىش ىدىستار, ەسكى قورىمدارعا جۇرگىزىلگەن قازبا جۇمىستارى كەزىندە تۇسىرىلگەن ارتەفاكتىلەر مەن فوتودەرەكتەر, ت.ب. توپتاستىرىلعان.
كەلەسى زالداعى كورمەگە «ساق مادەنيەتى» دەگەن اتاۋ بەرىلىپتى. «ويتكەنى, مۇنداعى جادىگەرلەر الدىڭعى تاڭبالى تاس مادەنيەتىن كونە ساق مادەنيەتىمەن جالعاستىرۋشى ەكسپوزيتسيا رەتىندە ءبىرىن-ءبىرى تولىقتىرىپ تۇر», دەيدى «ەسىك» مەملەكەتتىك تاريحي-مادەني قورىق-مۋزەيىنىڭ عىلىمي قىزمەتكەرى اسەل امىربەكوۆا حانىم.
مۇندا دا الماتى وبلىسى اۋماعىنان جاڭادان تابىلعان, ءالى عىلىمي اينالىمعا ەنبەگەن جارتاس بەتىندەگى سۋرەتتەر قويىلىپتى. بارلىعى 35 بەينە-نىسان 5 توپقا ءبولىنىپ ورنالاستىرىلعان. بۇل تاسبەينەلەر «جەتىسۋ ولكەسىنە ءتان ساق مادەنيەتىنىڭ يدەولوگياسى مەن ميفولوگياسى» اتتى عىلىمي قولدانبالى جوبا اياسىندا جيناقتالىپ, زەرتتەلۋ ۇستىندە كورىنەدى.
ءۇشىنشى كورمە « ۇلىتاۋ الەمى» دەگەن اتپەن اشىلىپتى. مۇنداعى باستى يدەيالىق ماقسات – ۇلىتاۋ تابيعي-مادەني لاندشافتىسىنىڭ ەرەكشەلىگىن تانىستىرۋ ەكەن. كورمە زالىندا – ۇلىتاۋ ءوڭىرىنىڭ تىنىس-تىرشىلىگىمەن تانىستىراتىن فوتوكوللاجدار, تالدىساي قونىسىنىڭ فوتوپرەزەنتاتسياسى, «الەمدىك تاۋ» ارحەتيپى ىسپەتپەس ساق وبالارى مەن تاس مۇسىندەر فوتودەرەگى قاتارلى دۇنيەلەر قويىلعان. بۇل تاريحي-اقپاراتتىق قۇجاتتار « ۇلىتاۋ» قورىق-مۇراجايىنىڭ ەكسپوزيتسياسى قورىنان جەتكىزىلگەن.
بەكەن قايرات ۇلى,
«ەگەمەن قازاقستان»
سۋرەتتەردى تۇسىرگەن ورىنباي بالمۇرات,
«ەگەمەن قازاقستان»
