قازاق مەملەكەتتىك تسيركىنىڭ ديرەكتورى باقىت بوكەباەۆ بۇل سۋرەتتىڭ سىرىن بىلەتىن ادام بولسا, بايىرعى ونەر ورداسىنا ىرگەتاسى قالانعاننان بەرى قىزمەت ەتىپ كەلە جاتقان ومىربەك يسابەكوۆ ەكەندىگىن ايتىپ, بىزگە ءجون سىلتەدى. ول كىسى ءبىر كەزدەرى تسيركتەگى جولىن اكروباتيكادان باستاعان ەكەن. قازىر ومىربەك اعا قازاق مەملەكەتتىك تسيركىنىڭ شىعارماشىلىق دامۋ ءبولىمىن باسقارىپ وتىرعان جايى بار.
سونىمەن تسيركتە جارتى عاسىرعا جۋىق ەڭبەك ەتكەن قازاقستانىڭ مادەنيەت قايراتكەرى ومىربەك تازابەك ۇلى كۋبا ساپارى تۋرالى ىقىلاستانا بايانداپ, جارتى تىرلىگىمىزدى دەمدە بۇتىندەپ بەرگەنى.
فيدەل كاسترو
– قازاق تسيركىنىڭ تاريحىندا بۇل ءبىر عاجايىپ گاسترول بولدى! سوناۋ 1978 جىلى 60 ادامنان تۇراتىن ونەر ۇجىمى كۋباعا باقانداي ءتورت جارىم ايعا باردىق. ءبىز الماتىدان شىققاندا قوڭىر كۇز بولسا, قايتىپ لەنينگرادقا ورالعانىمىزدا تىزەدەن قار جاتتى. قازان مەن اقپان ايىنىڭ اراسىنا سوزىلعان گاسترول بارىسىندا كۋبانىڭ 14 پروۆينتسياسىن ارالاپ, بارلىق قالالارىندا كونتسەرت قويدىق.
ول كەزدە ءبىز دە وداقتىق مەملەكەتتىك تسيرككە قارايتىن ەدىك. الدىمەن كۋباعا ۇيىمداستىرۋشىلىق توپ ۇشىپ باردى. ودان كەيىن قازاقستان ارتىستەرىن يل-18 ۇشاعى الىپ ۇشسا, اتتار مەن تۇيەلەر, ايۋلار مەن اڭدار لەنينگرادتان گاۆاناعا كەمە ارقىلى 21 كۇن ىشىندە جەتكىزىلدى.
ايعا جۋىق كەمەدە شايقاتىلىپ, دۇرىس ازىقتانا الماعان تسيرك جانۋارلارى كۋباعا قاتتى جۇدەپ جەتتى. ولار تەڭىز اۋرۋىنا شالدىعىپ, ءبىر اپتادان كەيىن عانا الدەنە باستادى. ارتىستەر دە ۇزاق جولدان كەيىن ء بىر اپتاداي اۋىرىڭقىراپ ءجۇردى.
ءوز-وزىمىزگە كەلىپ العاننان كەيىن, جەرگىلىكتى كليماتقا بەيىمدەلىپ, ونەر كورسەتۋدى باستاپ كەتتىك. بارلىق قالالارداعى كونتسەرتتەرىمىز انشلاگپەن ءوتتى. قاي ارەنادا بولسىن كورەرمەندەرگە تولى بولدى. اسىرەسە, كۋبالىقتارعا ۇيرەتىلگەن تۇيەلەر, ايۋلار ءنومىرى, ياعني شولپان قوجامبەرديەۆانىڭ جانۋارلارى ۇنادى. اتتىڭ قۇلاعىندا ويناعان قازاق شاباندوزدارىنىڭ ونەرى ءتانتى ەتتى.
ەستەلىك ايتىپ وتىرعان بايىرعى تسيرك مايتالمانى ومىربەك يسابەكوۆتىڭ ەستەلىگىنە وسى ارادا مىنا دەرەكتى قوسا كەتۋدىڭ ارتىقتىعى بولماس.
كۋبادا سالتانات قۇرعان بۇل ايگىلى تسيرك باعدارلاماسى – 1972 جىلى اقىن جامبىل جاباەۆتىڭ 125 جىلدىق مەرەيتويىنا وراي جازىلعان, جاڭا تسيرك عيماراتىندا قويىلعان «تاڭعاجايىپتار جەرى» باعدارلاماسى بولاتىن.
باعدارلامانىڭ قويۋشى رەجيسسەرى كسرو حالىق ءارتىسى, ماسكەۋ وليمپياداسىنىڭ رەجيسسەرى بولعان ۆيلەم گولوۆكو بولسا, ميۋزيك-حولل ستسەناريىن جازعان ولجاس سۇلەيمەنوۆ پەن ولەگ لەۆيتسكي دە, «دالا قىزعالداقتارىن» ءبىرىنشى بولىپ ورىنداعان تسيرك ءانسامبلىنىڭ العاشقى ءانشىسى ناعيما ەسقاليەۆا ەكەندىگىن ايتۋ پارىز.
ال ەندى فيدەل كاسترو قالاي شاپاندى بولىپ ءجۇر دەگەن سۇراققا, نەگىزگى ايداردىڭ تاقىرىبىنا ورالساق, وقيعا بىلاي وربىگەن.
ارينە, قازاقستاننان بارعان تسيرك ارتىستەرى كۋبا باسشىسىمەن كوزبە-كوز جۇزدەسە الماعان. ەسەسىنە سول كەزدەگى كسرو-نىڭ كۋباداعى ەلشىسى نيكيتا تولۋبەەۆ قازاق تسيركى الىپ كەلگەن سالەمدەمەنى فيدەل كاستروعا ءوز قولىمەن تابىستاپ قانا قويماي, يىعىنا شاپاندى جابادى.
شىندىعىندا سول كەزدە الەمدىك دەڭگەيدەگى ساياسي قايراتكەر فيدەل كاسترونىڭ جانىندا ەلشى نيكيتا پاۆلوۆيچ تولۋبەەۆ تە بولعان. قانداي دا ءبىر سەبەپتەرمەن ونىڭ سۋرەتى فوتودان كەيىن قيىلىپ قالادى.
ال فيدەل كاسترو ۇلتتىق شاپانىمىزدى ىقىلاستانا كيىپ, ءوز كەزەگىندە سول كەزدەگى قازاقستاننىڭ ءبىرىنشى حاتشىسى دىنمۇحامەد قوناەۆقا سالەمدەمە رەتىندە قولتىراۋىننىڭ تەرىسىن بەرىپ جىبەرەدى. بۇل ۇلكەن اماناتتى تسيرك باسشىلارى كەزىندە ورىنداعان دا بولار.
وسىناۋ گاسترولدىك ساپاردىڭ تاعى ءبىر ارتىقشىلىعى, تاماشا سۋرەتتەر ەستەلىك رەتىندە تسيركتىڭ شەجىرەسىندە قالدى. فوتولاردى ءتۇسىرۋدى كسرو-نىڭ كۋباداعى ەلشىلىگى ۇيىمداستىرعاندىقتان, فوتولاردىڭ اۆتورى سول ساپارعا قاتىسقان, كۋا بولعان جانداردىڭ ەسىندە بولماۋى دا, قالماۋى دا زاڭدىلىق.
ايناش ەسالي,
«ەگەمەن قازاقستان»
الماتى
