«الەۋمەتتىك مەديتسينالىق ساقتاندىرۋ قورى» اق وكىلى شىنار ءالجانوۆانىڭ ايتۋىنشا, بۇل بۇرىننان قولدانىستا بار تاجىريبە. ماۋسىم ايىنىڭ سوڭىندا قابىلدانعان وزگەرىستەر بويىنشا حالىق دەنساۋلىعى جانە دەنساۋلىق ساقتاۋ جۇيەسى كودەكسىنە قازاقستان اۋماعىندا تۇراقتى تۇراتىن شەتەلدىكتەر مەن ازاماتتىعى جوق تۇلعالار كەپىلدەندىرىلگەن تەگىن مەديتسينالىق كومەك كولەمىن پايدالانۋعا قۇقىلى دەپ جازىلعان. جالپى, ەلىمىزدە تۇراقتى تۇرىپ جاتقان شەتەلدىكتەردىڭ دەنىن كوبىنە بۇرىنعى كسرو مەملەكەتتەرىنىڭ ازاماتتارى قۇرايدى. ولاردىڭ كوبى بۇگىندە زەينەت جاسىندا. زەينەتكە شىقپاعاندارى وسىندا جۇمىس ىستەيدى, ەل قاتارلى سالىق تولەيدى. قازاقستاندا تۇراقتى تۇرۋ قۇقىعىنا يە بولۋ ءۇشىن ولار شامامەن 3 ملن تەڭگەگە جۋىق دەپوزيت تولەۋى ءتيىس (بۇعان بۇرىنعى قازاق كسر ازاماتتارى مەن ورالمان قانداستارىمىز كىرمەيدى).
شەتەلدىكتەردىڭ ساقتاندىرۋ جارناسىن تولەپ, ەل ازاماتتارىمەن بىرگە مەديتسينالىق قىزمەتتەردى پايدالانۋ تاجىريبەسى بارلىق وركەنيەتتى ەلدەردە بار ءۇردىس. بۇعان ليتۆا, ەستونيا جانە ەۋرووداقتىڭ وزگە دە ەلدەرىن مىسالعا كەلتىرۋگە بولادى.
سونىمەن قاتار, ءمامس شەڭبەرىندەگى قۇقىقتار مەن مىندەتتەر ەلىمىزدە قازاقستان رەسپۋبليكاسى راتيفيكاتسيالاعان حالىقارالىق كەلىسىمدەر نەگىزىندە ۋاقىتشا تۇراتىن شەتەل ازاماتتارى مەن ولاردىڭ وتباسىلارىنا دا بەرىلگەن. ولاردىڭ قاتارىندا ەۋرازيالىق ەكونوميكالىق وداق شەڭبەرىندەگى جۇمىس كۇشىنىڭ ەركىن ءجۇرىپ-تۇرۋىنا قاتىستى نورما دا بار. سەبەبى, قازاقستان وزگە مەملەكەتتەرمەن تىعىز ساياسي-ەكونوميكالىق بايلانىس ورناتقان مەملەكەت. سوندىقتان ءبىز حالىقارالىق كەلىسىم تالاپتارىن دا ورىنداۋعا مىندەتتىمىز. بىراق ولار كەپىلدەندىرىلگەن تەگىن مەديتسينالىق كومەك كولەمىنىڭ از عانا بولىگىن پايدالانا الادى. ناقتىراق ايتار بولساق, بۇل ازاماتتار اينالاسىنا قاۋىپ توندىرەتىن: ديفتەريا, قىزىلشا, قىزامىق, كوكجوتەل, سكارلاتينا, جەلشەشەك, ەپيدەميالىق پاروتيت, ا, ۆ, س سۇزەگى (پاراتيف), پوليوميەليت, تۇماۋدىڭ قالىپتان اۋىتقىعان تۇرلەرى, مەنينگوكوكك ينفەكتسياسى, تىرىسقاق, ءىش سۇزەگى, تۋبەركۋلەز, كۇيدىرگىنىڭ وكپەنى قابىندىراتىن ءتۇرى, وبا, ۆيرۋستى گەمورراگيالىق بەزگەك, ا, ە ۆيرۋستى گەپاتيتى, مالياريا سىندى اۋرۋلاردان تەگىن ەمدەلەدى.
ال جوعارىدا كورسەتىلگەن ساناتقا كىرمەيتىن وزگە شەتەلدىكتەر, مىسالى, قازاقستان اۋماعىنا ۆيزا ارقىلى نەمەسە جۇمىس ىستەۋگە كەلگەندەر عانا ءمامس جارناسىن تولەمەيدى. ولار ەل اۋماعىنا كىرمەس بۇرىن جەكەمەنشىك ساقتاندىرۋ ءپوليسىن ساتىپ الۋعا مىندەتتى.
دۋمان اناش,
«ەگەمەن قازاقستان»
