عىلىم كوميتەتىنىڭ توراعاسى بولاتبەك ءابدىراسىلوۆتىڭ ايتۋىنشا, بايقاۋعا قاتىسۋ ءۇشىن وتىنىمدەر 20 شىلدە مەن 1 قىركۇيەك ارالىعىندا بايقاۋدىڭ رەسمي سايتىندا (www.meninarmanym.kz) قابىلدانادى. جانە وعان 14 پەن 29 جاس ارالىعىنداعى ورتا مەكتەپتىڭ جوعارى سىنىپ وقۋشىلارى, كوللەدج بەن كاسىپتىك-تەحنيكالىق مەكتەپ وقۋشىلارى, ۇكىمەتتىك ەمەس ۇيىمداردىڭ وكىلدەرى, جوو-نىڭ ستۋدەنتتەرى, جاس جاڭاشىلدار قاتىسا الادى.
«بۇل جوبا ن.ءا.نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا كورسەتىلگەن يدەيانىڭ ءىس جۇزىندە ىسكە اسىرىلۋى بولىپ تابىلادى», دەدى بولاتبەك ءابدىراسىلوۆ.
ايتا كەتەتىن تاعى ءبىر جايت, بايقاۋعا قاتىسۋ تەگىن. جانە جوبالاردى اقپاراتتىق, ءبىلىم, تەحنولوگيالىق, ەكولوگيا جانە الەۋمەتتىك-مادەني باعىتتار بويىنشا جولداۋعا بولادى. سپيكەرلەردىڭ سوزىنشە, بىرەگەي ءارى قوعامعا پايدالى الەۋمەتتىك جوبا ۇسىنعان ۇمىتكەر جۇلدەگەر بولىپ تابىلادى. قوعام قايراتكەرلەرى, ساياساتكەرلەر مەن كاسىپكەرلەردەن قۇرالعان قازىلار القاسى 1 اي بويى كەلىپ تۇسكەن جۇمىستاردى سارالاپ, جوبا جەڭىمپازىن انىقتايدى. بايقاۋدا باعى جانعان جەڭىمپاز 5 000 000 تەڭگەنى يەلەنەدى.
راۋان قايدار,
«ەگەمەن قازاقستان»
