ەلىمىز وسى ۋاقىتقا دەيىن جەمقورلىق دەڭگەيىن تومەندەتۋ باعىتىندا ەلەۋلى قادامدار جاسادى. الەمدىك دەرتكە اينالعان جەمقورلىقپەن كۇرەستى ودان ءارى جانداندىرۋ ءىسىن ەلباسىنىڭ تاعى ءبىر پىسىقتاۋى بەكەر ەمەس. سەبەبى, قوعامدىق قاۋىپسىزدىكتى قامتاماسىز ەتۋ, دەنساۋلىق ساقتاۋ, ءبىلىم بەرۋ, تۇرعىن ءۇي-كوممۋنالدىق شارۋاشىلىعى ىسپەتتى كۇندەلىكتى ومىرىمىزگە بايلانىستى سالالارداعى جەمقورلىق اسا قاۋىپتى. بۇل سالالارداعى جەمقورلىق دەڭگەيىنىڭ جوعارى بولۋى ءوز كەزەگىندە مەملەكەتتىك ورگاندارعا دەگەن سەنىمدى تومەندەتەدى.
«قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋدا ەكونوميكالىق قىلمىستاردى ىزگىلەندىرۋ, ايىپپۇلدار مولشەرى مەن مەرزىمىن قيسىنعا ساي رەتتەۋ, كاسىپكەرلەردى قولداۋ, ت.ب. ماسەلەلەر كوتەرىلدى. سونىمەن بىرگە, جەكە مەنشىكتى قورعاۋعا, قۇقىق ۇستەمدىگىنە جانە بارشانىڭ زاڭ الدىندا تەڭدىگىن قامتاماسىز ەتۋگە باعىتتالعان رەفورمالاردى جەمىستى جالعاستىرۋ تاپسىرىلدى. بۇعان قوسا ەلباسى اكىمشىلىك جانە قىلمىستىق زاڭداردى ودان ءارى ىزگىلەندىرۋ قاجەتتىگىن دە ناقتىلادى. سەبەبى, سوڭعى كەزدەرى ەكونوميكالىق قىلمىستارعا قاتىستى باپتاردى ىزگىلەندىرۋ قاجەتتىگى بايقالۋدا.
قىلمىستىق كودەكستەگى ەكونوميكالىق قىزمەت سالاسىنداعى قىلمىستىق قۇقىق بۇزۋشىلىقتارعا ارنالعان تاراۋدا رەتتەۋدى قاجەت ەتەتىن جايتتار بار ەكەنىن ءومىردىڭ ءوزى كورسەتىپ وتىر. مىسالى, ازاماتتىڭ سالىقتان جالتارۋى, كەدەندىك تولەم-الىمداردىڭ دۇرىس تولەنبەۋى, تاۋار بەلگىسى نەمەسە ەكونوميكالىق شارۋاشىلىقتاعى قارىم-قاتىناس, جالعان كاسىپكەرلىك تە قۇزىرلى مەكەمە قۇزىرەتىندە شەشىلەتىن ىستەر. ەكونوميكالىق قىلمىستاردى قىلمىسسىزداندىرۋدى شاعىن جانە جەكە كاسىپكەرلەردى قورعاپ, ولارعا قولداۋ كورسەتۋدىڭ ءبىر امالى رەتىندە باعالاۋعا بولادى.
جولداۋداعى «تسيفرلى قازاقستان» باعدارلاماسىن ەرەكشە اتاپ وتكەن ءجون. بۇل تۇرعىدا جاڭا وندىرىستەردى قالىپتاستىرۋدىڭ ماڭىزدى ءبىر شارتى – يننوۆاتسيالاردى قامتاماسىز ەتۋ. سول سەبەپتى, ۇدەمەلى يندۋستريالدى-يننوۆاتسيالىق دامۋ باعدارلاماسى شەڭبەرىندە ءوندىرىس قۋاتتارىن ەسەلەۋ ايرىقشا ماڭىزعا يە. ەلباسى 3D پرينتەرلەر, ەلەكتروموبيلدەر ىسپەتتى جوعارى تەحنولوگيالىق وندىرىستەردى دامىتۋعا باسىمدىق بەرەدى. مۇنىڭ ارقاسىندا باسەكەگە قابىلەتتىگىمىز ارتارىنا تالاس جوق. جوعارىدا ايتقانىمىزداي, تولايىم تابىسقا جەتۋدە ادامي كاپيتالدىڭ ورنى ايرىقشا, دەمەك, جاستاردىڭ ءۇش ءتىلدى قاتار مەڭگەرۋى ەل بولاشاعىنا ىقپال ەتەدى. ياعني, ءبىز شەت ەلدەرگە ءبىلىمدى, بىلىكتى ۇرپاعىمىزبەن عانا تانىلا الامىز. بيىك ماقساتتار بارلىق دەڭگەيدە ۋاقىت پەن قوردىڭ, ونىڭ ىشىندە كادرلار رەزەرۆىن تالاپ ەتەتىنى انىق.
مەملەكەت باسشىسى ءدىني ەكسترەميزمدى ناسيحاتتاۋدىڭ الدىن الۋعا, اسىرەسە, ينتەرنەت پەن الەۋمەتتىك جەلىدە ونىڭ جولىن كەسۋگە اسا كوڭىل بولۋگە شاقىردى. جولداۋ بولاشاققا باعدارلانعان. ونى تابىستى جۇزەگە اسىرۋ جۇگى جاس ۇرپاققا جۇكتەلەدى. جولداۋدىڭ باستى ماقساتى – «قازاقستان-2050» ستراتەگياسىنىڭ مىندەتتەرىن جۇزەگە اسىرۋ. ەلباسى اتالعان ستراتەگيالىق باستاما «100 ناقتى قادام» ۇلت جوسپارىنىڭ نەگىزىندە ورىندالاتىنىن قاداپ ايتتى. جولداۋدى تاۋەلسىز ەلىمىزدىڭ تۇراقتى دامۋىنا جول اشاتىن, مەملەكەتىمىزدىڭ بارلىق سالاسىنا سەرپىن بەرەتىن, حالقىمىزدىڭ يگىلىگىنە باعىتتالعان, ناقتى ءىس-جوسپارعا نەگىزدەلگەن تاريحي قۇجات رەتىندە باعالاعان ءجون.
مانسۇرحان ماحامبەتوۆ,
ءماجىلىس دەپۋتاتى
