سوڭعى جىلدارى بىرقاتار مەملەكەتتەردە قۇرامى دارۋمەندەرگە باي ستەۆيانى اۋىل شارۋاشىلىعى داقىلى رەتىندە كوپ مولشەردە ءوسىرۋ قولعا الىنۋدا. بۇعان سەبەپ تە جوق ەمەس. تابيعي قانت الماستىرعىشتىڭ قاينار كوزى بولىپ تابىلاتىن ونىڭ كەپتىرىلگەن جاپىراعىنىڭ قارا بازارداعى ءبىر كيلوگرامىنىڭ قۇنى 340 اقش دوللارىنا ساۋدالانۋدا. ال, سۇيىق كونتسەنترات كۇيىندەگى كەلىسىنىڭ باعاسى 306 دوللار تۇرسا, ءبىر كەلى تابلەتكا تۇرىندەگىسى 5 مىڭ اقش دوللارىنا جۋىق سوماعا ساتىلۋدا.
پەداگوگيكالىق ينستيتۋتتىڭ حيميا-بيولوگيا فاكۋلتەتىنىڭ ستۋدەنتتەرى قۇنى قىمبات ستەۆيانى قازاقستاندا ءوسىرىپ, ودان ءونىم الۋدى وڭتايلى جولعا قويۋعا نيەتتى. وسىعان وراي, جاس عالىمدار تاراز قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ مۇعالىمدەرىمەن بىرلەسىپ ارنايى عىلىمي-زەرتتەۋ جۇمىستارىن جۇرگىزۋدە.
– ماقساتىمىز – ەلىمىزدىڭ ءوندىرىس سالاسىنا تابيعي قانت الماستىرعىش كوزى رەتىندە پايدالانىلاتىن ستەۆيا وسىمدىگىن ەندىرۋ ءۇشىن بيوتەحنولوگيالىق كوبەيتۋ ادىستەرىن جەتىلدىرۋ. بۇل ءوز كەزەگىندە ودان الىناتىن ءدارى-دارمەك ونىمدەرىنىڭ قاراپايىم ازاماتتار ءۇشىن قولجەتىمدى بولۋىنا سەپ بولماق, – دەيدى جوبا اۆتورلارى.
ستەۆيا جىلۋ سۇيگىش بولعاندىقتان ول قازاقستاننىڭ كليماتىنا ءتوزىمسىز ءارى ونۋگە بەيىمسىز كەلەدى. وسىعان بايلانىستى ستۋدەنتتەر ونى وقۋ ورنىنىڭ جىلىجايىندا كوبەيتۋدى ماقسات ەتىپ وتىر.
ايتا كەتەيىك, قازىرگى كۇندە كەشەن اۋماعىندا بۇدان بولەك قياردىڭ «ديرەكتور», «كۋراج», «فەنومەن», «مەرەنگو», «كريستينا» سياقتى سورتتارى, راۋشان مەن قىزعالداقتىڭ سيرەك سۇرىپتارى جانە اقجەلكەن, ءتاتتى بۇرىشتار وسىرىلۋدە. ينستيتۋت ستۋدەنتتەرى عىلىمي جەتەكشىلەرىنىڭ باقىلاۋىمەن كوكونىستەر مەن جەمىس-جيدەكتەرگە اگروتەحنيكالىق كۇتىم جاساپ, باپتايدى. بۇگىنگە دەيىن مۇندا مىڭعا جۋىق ستۋدەنت تاجىريبە جيناقتاعان.
– جىلىجاي پايدالانۋعا بەرىلگەننەن بەرى وقۋ ورنىنىڭ «بيولوگيا» ماماندىعىندا وقيتىن بىلىمگەرلەرى ءۇشىن وندىرىستىك تاجىريبەدەن ءوتۋ ماسەلەسى تۇبەگەيلى شەشىمىن تاپتى. تەوريانى تاجىريبەمەن ۇشتاستىرۋ بولاشاق مامانداردىڭ تولىققاندى ءبىلىم الۋىنا مول مۇمكىندىك بەرەتىنى بەلگىلى. باۋ-باقشا داقىلدارىن كۇتۋ مەن ءوسىرۋدىڭ, جەردى اگروتەحنيكالىق شارالارعا ساي باپتاۋدىڭ قىر-سىرىن جەتە مەڭگەرگەن جاستار ەڭبەك نارىعىندا سۇرانىسقا يە, – دەپ اتاپ ءوتتى اۋىل شارۋاشىلىعى عىلىمدارىنىڭ دوكتورى, پروفەسسور جاقسىباي تولەۋباەۆ.
