ەلباسىنىڭ «بولاشاققا باعدار – رۋحاني جاڭعىرۋ» ماقالاسىنداعى «پاتريوتيزم كىندىك قانىڭ تامعان جەرىڭە, وسكەن اۋىلىڭا, قالاڭ مەن وڭىرىڭە, ياعني تۋعان جەرگە دەگەن سۇيىسپەنشىلىكتەن باستالادى» دەگەن ماعىناسى تەرەڭ سوزدەر جاس ۇرپاقتى اتا-بابا اماناتىنا ادال بولۋعا , رۋحاني قۇندىلىقتاردى قاستەرلەۋگە جەتەلەيدى. تاۋەلسىزدىكتەن كەيىن دۇنيەگە كەلگەن بۋىن اتامەكەننىڭ قادىر-قاسيەتىن جاقسى تۇسىنەدى. وعان قاتىستى كەز كەلگەن اكتسيالارعا بەلسەنە قاتىسادى. ءبىر سوزبەن ايتقاندا, جالپىۇلتتىق ءپاتريوتيزمنىڭ كورىنىستەرىن بىلىممەن دە, ناقتى ىستەرمەن دە دالەلدەپ كەلەدى. سونىڭ ءبىر ۇلگىسىنە «تۋعان جەر» جانە «قازاقستاننىڭ 100 ەسىمى» جوبالارى اياسىندا ءوڭىر مەكتەپ وقۋشىلارى اراسىندا قۇرىلعان ەكسپەديتسيالىق توپتاردى اتار ەدىك. جۋىردا ولاردىڭ ءبىر لەگى ولكەنىڭ 13 اۋدانىن ارالاپ, تاريحي-مادەني ورىنداردى, كورىكتى جەرلەردى تاماشالاپ قايتتى.
– ەكسپەديتسيانىڭ باستى ماقساتى – جاستاردىڭ بويىندا ەلگە, جەرگە دەگەن سۇيىسپەنشىلىك سەزىمدى قالىپتاستىرۋ. ءبىز العاشقى ساپاردى ەسىل اۋدانىنان باستاپ, جۇرتشىلىق جادىندا «سارى اۋليە» ەسىمىمەن قاستەرلەنەتىن قۇلسارى باتىردىڭ باسىنا زيارات ەتتىك. بىلتىرلارى ونىڭ قورىمىنا ۇلكەن كەسەنە تۇرعىزىلعان بولاتىن. مۇنداي قاسيەتتى ورىندار وبلىستا كوپتەپ سانالادى, – دەيدى ءال-فارابي اتىنداعى مەكتەپ-ليتسەيدىڭ ديرەكتورى ك ۇلىمكوز سمايلوۆا.
ونىڭ جەتەكشىلىگىندەگى توپ ايىرتاۋ, ءۋاليحانوۆ, اقجار, اققايىڭ اۋداندارىندا بولىپ, 1100 شاقىرىم جولدى ەڭسەرگەن. اعىنتاي مەن قۇلسارى باتىر مازارلارى, ايعانىم قونىسى, شوقان ءۋاليحانوۆتىڭ مۇراجايى, قالماققىرىلعان توبەسى وقۋشىلارعا ەرەكشە اسەر ەتكەن. مىرزاعۇل اۋىلى جانىنداعى تەكە, ساۋمالكولدەگى يمانتاۋ مەن شالقار كولدەرى, تالدىساي وزەنى – ارقايسىسىنىڭ تىلسىم جۇمباقتارى مەن قاتپارلى سىرلارىن بىلمەككە قۇمارتقان.
ع. مۇسىرەپوۆ, تيميريازەۆ اۋداندارىنداعى ۇلىلار مەكەن ەتكەن, ءىزى قالعان كيەلى جەرلەرمەن ءجۇرىپ وتكەن.
جاس بالعىندار ولكەنىڭ ەرەكشە تاريحى, تاماشا ادامدارى, اسەم تابيعاتى, ساۋلەت ونەرى مەن مادەنيەتى جايلى تانىمدىق اقپاراتتار جيناستىرىپ, جەكە البوم قۇراستىرۋدى, قىسقامەتراجدى فيلم دايىنداۋدى كوزدەپ وتىر.
وڭىرىمىزدە باستاۋ العان ەتنوگرافيالىق ەكسپەديتسيا مۇنىمەن اياقتالماق ەمەس. الدا كيەلى تۇركىستان جەرىنە ساپار شەگىپ, تاريحي ەسكەرتكىشتەرمەن تانىسۋ جوسپارلانعان.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
