ەكسپو-2017 كورمەسىن بۇگىنگە دەيىن وڭتۇستىك قازاقستان وبلىسىنان 1200 وقۋشى تاماشالاعان. شىمكەنت قالالىق ءبىلىم ءبولىمى باسشىلىعىنىڭ مالىمەتىنشە, وقۋشىلارعا بارلىق جاعداي جاسالۋدا. ءاربىر 10 بالاعا ءبىر جەتەكشى مەن 2 دارىگەر مامان بەكىتىلگەن. ال ولار استانادا نازارباەۆ ۋنيۆەرسيتەتتىڭ جاتاقحاناسىنا جايعاسادى. ساياحاتتىڭ العاشقى كۇنىندە وقۋشىلار كورمەنىڭ باستى نىسانى – «نۇرلى الەم» ۇلتتىق پاۆيلونىن, شەتەلدىكتەر ۇسىنعان زاماناۋي تەحنولوگيانىڭ جاڭا جەتىستىكتەرىن تاماشالاپ, ەنەرگيا-قۋات كۇشىن الاتىن تىڭ جوبا – جەكە ايماقپەن تانىستى. ەكىنشى كۇنىندە ەلورداداعى بىرقاتار مادەني وشاقتار – ۇلتتىق مۋزەي مەن بەيبىتشىلىك جانە كەلىسىم سارايى, «استانا-بايتەرەك» مونۋمەنتى, تۇڭعىش پرەزيدەنت ساياباعى سەكىلدى اۋقىمدى نىسانداردى ارالادى.
حالىقارالىق كورمەگە كەلگەن وقۋشىلارعا بەس كۇندىك باعدارلاما بەكىتىلگەن. وندا بالالار جول ءجۇرۋ بيلەتتەرى مەن 4 مەزگىل تاماقپەن تەگىن قامتىلدى. ال كورمەگە بارىپ, يگى باستاماعا قاتىسىپ قايتقان شاكىرتتەردىڭ ءبىلىم مەن عىلىمعا, قوعامعا دەگەن قۇرمەت-قۇشتارلىعى ەسەلەنگەنىن بايقاۋعا بولادى. «بۇكىل الەم كوز تىككەن شاراعا كەلگەندىگىمنەن بولار, ۇلكەن قوبالجۋ ۇستىندەمىن جانە بۇل – مەن ءۇشىن مارتەبە. العان اسەرىمدى سوزبەن ايتىپ جەتكىزە المايمىن. مۇندا شەتەلدىك ونەرتاپقىشتاردىڭ جەتىستىگىمەن تانىسىپ, جاڭا تەحنولوگيانىڭ كەڭ مۇمكىندىكتەرىن سارالادىم. بولاشاقتا عالىم بولعىم كەلەدى. ەلىمنىڭ يگىلىگى ءۇشىن عىلىمي زەرتتەۋلەر جۇرگىزىپ, دامىعان ەلدەرمەن تەرەزەمىز تەڭ بولۋى جولىندا قىزمەت ەتۋ – ماقساتىم», دەيدى №7 مەكتەپ-ليتسەيدىڭ وقۋشىسى اسەل مۇسىرەتالى.
«بۇگىن ءبىز توعىزىنشى لەكپەن كەلدىك. ءاربىر لەك سايىن 150 مەكتەپ وقۋشىسى قامتىلادى. بارلىعى – شىمكەنت قالاسىنىڭ بالالارى. ال 24 شىلدەدەن باستاپ ءبىز وبلىس بويىنشا مەكتەپ وقۋشىلارىن اكەلەمىز. وڭتۇستىك قازاقستاندا 2 مىڭ وقۋشىنىڭ بيلەتتەرى دە, جول شىعىندارى دا بيۋدجەتتەن تولەنىپ وتىر. سەبەبى, ول بالالار – الەۋمەتتىك جاعىنان از قامتىلعان وتباسىلاردىڭ مۇشەلەرى», دەيدى تۋريستىك فيرما وكىلى عاني نازاربەك. ونىڭ ايتۋىنشا, ەكسپو-نى كورگەن بالالار ۇلكەن اسەر الىپ قايتادى. ەنەرگيانىڭ قالاي جانە قاي جەردە وندىرىلەتىنىن, ەنەرگيا ۇنەمدەۋدىڭ ماڭىزدىلىعىن تۇسىنە باستايدى. پويىزبەن قايتىپ بارا جاتقاندا كورگەن-بىلگەندەرىن تالقىلايدى, ءتىپتى ءوز جوبالارىن جاساۋعا قۇلشىنىس ءبىلدىرىپ جاتادى.
«ولاردى ادەيى اڭگىمەگە تارتىپ, مۇمكىندىگىنشە سۇحباتتاسامىن. بالالار نە ءتۇيدى ەكەن, سونى بىلگىم كەلەدى. ولار يدەيالارىن ورتاعا سالادى. «مىنانى ىستەسەم قالاي بولادى ەكەن؟» دەپ, تىڭ تۋىندىلارىن ۇسىناتىندار دا بار. سول كەزدە ساپاردىڭ بەكەر كەتپەگەنىنە كوزىم جەتەدى», دەپ جالعادى ءسوزىن ع.نازاربەك.
اسحات رايقۇل,
«ەگەمەن قازاقستان»
