قازاقستاننان جانە كۇللى الەمنەن كەلگەن قوناقتار جاپونيانىڭ ءداستۇرلى جانە زاماناۋي مادەنيەتىمەن تانىسا وتىرىپ, بۇل مەملەكەتتىڭ دارا تارتىمدىلىعىن سەزىنە الادى.
جاپون پاۆيلونىنىڭ كوميسسارى ناكامۋرا تومياسۋدىڭ سوزىنشە, جاپونيا ەكسپو حالىقارالىق كورمەلەرى ارقىلى بۇكىل ادامزاتتىڭ الدىندا تۇرعان ماسەلەلەردى شەشۋگە باعىتتالعان وزىندىك يدەيالار مەن شەشىمدەردى ۇسىنىپ كەلەدى.
«استانا ەكسپو» حالىقارالىق كورمەسىندە ورنالاسقان جاپونيا پاۆيلونىنىڭ تاقىرىبى – «Smart Mix with Technology». ءتۇرلى ەنەرگيا كوزدەرىن ۇتىمدى قولدانۋ ارقىلى, ارزان ءارى قاۋىپسىز ەنەرگيانى قولدانۋدىڭ ماڭىزدىلىعىن بارشاعا تۇسىنىكتى تۇردە كورسەتكىمىز كەلەدى», دەيدى جاپونيالىق كوميسسار.
جاپونيا ۇلتتىق كۇنىنىڭ باستى سالتاناتى رەتىندە ارنايى قويىلىمدار مەن مادەني ءىس-شارالاردى اتاۋعا بولادى. ۇيىمداستىرۋشىلاردىڭ ايتۋىنشا, جاپوننىڭ ءداستۇرلى اسپاپتارىنىڭ ورىنداۋشىلارى تەك وسى كۇنگە ارناپ حيتيريكي, سياگۋحاتي (ۇرمەلى اسپاپتار) مەن كوتو (ىشەكتى اسپاپ) اسپاپتارىندا ونەر كورسەتەدى. سونىمەن قاتار, جاپونيانىڭ ءار ءوڭىرىنىڭ ءبيىن جاڭا تسيفرلى تەحنولوگيالارمەن بىرلەستىرىپ, قوناقتار قاتىسا الاتىن اۋديو-ۆيزۋالدى شوۋ ۇيىمداستىرىلادى. پاۆيلون قوناقتارىنا تاعى ءبىر جاعىمدى جاڭالىق – ۇلتتىق كۇن بارىسىندا قازاقستان رەسپۋبليكاسىنىڭ ەڭبەك سىڭىرگەن ءارتىسى روزا رىمباەۆا مەن تانىمال دومبىراشى اسىلبەك ەڭسەپوۆ ونەر كورسەتەدى.
«جاپونيا پاۆيلونىنا كەلۋشىلەردىڭ سانى 250 مىڭ ادامنان استى. جاپونيا پاۆيلونى كەلگەن قوناقتاردان ءاردايىم جىلى لەبىزدەر ەستيدى. ءبىزدىڭ پاۆيلون بەينەكورىنىستەر مەن سۋرەتتەردى قازاق تىلىندە ۇسىنادى. بۇل كەلگەن قوناقتارىمىزدىڭ كوڭىلىنەن شىعۋدا. ەكسكۋرسيا اياقتالعان سوڭ بارلىعى كەلىپ ريزاشىلىعىن بىلدىرەدى», دەيدى ناكامۋرا تومياسۋ.
جاپونيا ۇلتتىق كۇنىنىڭ باعدارلاماسى كەلەسى شارالاردان تۇرادى:
مەرەكەنىڭ اشىلۋ سالتاناتى مەن مادەني كورسەتىلىم (وتكىزىلەتىن ورنى: ۇلتتىق كۇن ساحناسى). ساعات 10:00-دەن باستاپ جاپون ۇلتتىق مۋزىكالىق اسپاپتارىنىڭ ارنايى قويىلىمى وتەدى.
جاپونيانىڭ ءداستۇرىن بەينەلەيتىن جاپون ءداستۇرلى مۋزىكا اسپاپتار كونتسەرتى «Japan culture stage wagakki» (وتكىزىلەتىن ورنى: ەنەرگيا حوللى). ساعات 15:00-دەن باستاپ ء«داستۇر دامي بەرەدى» دەگەن اتاۋمەن جاپون مۋزىكا ونەرىنىڭ بەدەلدى وكىلدەرىنىڭ قاتىسۋىمەن كونتسەرت وتەدى.
تەك وسى كۇندەرگە ارنالعان جاپونيا پاۆيلونىنىڭ ارنايى قويىلىمى:
جاپونيانىڭ جاڭا زامانىن بەينەلەيتىن ينتەراكتيۆتى اۋديو-ۆيزۋالدى قويىلىم «Dance viewsic en» (وتكىزىلەتىن ورنى: جاپونيا پاۆيلونى Zone I جانە Zone II زالدارى)
2025 جىلى ەكسپو حالىقارالىق كورمەسىن وتكىزۋگە كانديدات قالا وساكانى ناسيحاتتاۋ ءىس-شارالارى «OSAKA 2025 PR event» (وتكىزىلەتىن ورنى: ۇلتتىق كۇن ساحناسى, ساقينالى جەلەك جول).
«Japan day «Future Energy» Performance live by GISPRI» مادەني كورسەتىلىمى (وتكىزىلەتىن ورنى: ەنەرگيا حوللى).
ءسوزىنىڭ سوڭىندا ناكامۋرا تومياسۋ بارشا قوناقتاردى جاپونيا پاۆيلونىندا اسىعا كۇتەتىندىگىن جەتكىزدى.
ايگۇل شەرنياز,
«ەگەمەن قازاقستان»
