بيىل ەلوردادا اۋقىمدى «Astana Innovations Challenge» ستارتاپ-مارافونى ىسكە قوسىلعان بولاتىن. ءىس-شارانى استانا قالاسى اكىمدىگى اتىنان «استانا Innovations» اق MOST بيزنەس-ينكۋباتورىمەن بىرلەسە وتىرىپ, «شەۆرون» كومپانياسىنىڭ قولداۋىمەن ۇيىمداستىردى. بۇل جاس يننوۆاتورلار مەن ونەرتاپقىشتارعا ارنالعان جوبا. ياعني, مۇنداي شارالار ارقىلى جاس دارىنداردىڭ ۇزدىك يدەيالارىن جۇزەگە اسىرۋعا مۇمكىندىك اشا وتىرىپ, جاستاردى قالا ءومىرىن جاقسارتۋعا ۇلەس قوسۋعا شاقىرادى. جوبا اياسىندا جىلدىڭ سوڭىنا دەيىن تاقىرىپتىق باعىتى ءارتۇرلى 4 ستارتاپ ۋيكەند جانە 2 حاكاتون ۇيىمداستىرۋ كوزدەلگەن. جەكسەنبى كۇنى سونىڭ العاشقى ۋيكەندتى قورىتىندىلاندى.
شارانىڭ تاقىرىبى كوممۋنالدىق شارۋاشىلىقتىڭ, كولىك پەن قالا ەكولوگياسىنىڭ تۇيتكىلدى ماسەلەلەرى سالاسىنداعى يننوۆاتسيالىق شەشىمدەر ويلاپ تابۋمەن بايلانىستى بولدى. قورىتىندىسىندا ەڭ پەرسپەكتيۆالى دەگەن 3 ستارتاپ-جوبا انىقتالىپ, ولار ءوزارا 500 000 تەڭگە جۇلدە قورىن ءبولىستى. سونىمەن قاتار, جەڭىمپاز-كوماندالار MOST بيزنەس-ينكۋباتورى نەگىزىندە قارقىندى اكسەلەراتسيا باعدارلاماسىنان ءوتۋ, جوبانى بيزنەس-جەبەۋشىلەر قاۋىمداستىعى مۇشەلەرى الدىندا تانىستىرۋ, قارجىلاندىرۋدى العانعا دەيىن جوبانىڭ سۇيەمەلدەنۋى جانە جوبالاردى ەلوردادا ەنگىزۋ مۇمكىندىگىن الدى.
ءبىرىنشى ورىندى مەملەكەتتىك بيۋدجەتتىڭ ەلەكتر ەنەرگياسىن تولەۋگە كەتەتىن شىعىستارىن ازايتۋ تۋرالى ماسەلەنى شەشۋگە باعىتتالعان «دەربەس كوشە جارىعى» جوباسىمەن «Sun project» كومانداسى يەلەنسە, ەكىنشى ورىندى «جاياۋ جۇرگىنشىلەر جولىنان مۇزدى جىلدام ءارى ۇقىپتى الىپ تاستاۋعا ارنالعان جيناقى مەحانيكالاندىرىلعان قۇرىلعى» جوباسىن تانىستىرعان «Ice Killers» كومانداسى جەڭىپ الدى. ءۇشىنشى ورىن «قالدىقتاردى جيناۋدى اۆتوماتتاندىرۋ جۇيەسى» جوباسىمەن «Tazalyk» كومانداسىنا بۇيىردى. سونىمەن قاتار, استانا قالاسىنىڭ اكىمى ءا.يسەكەشەۆتىڭ باستاماسىمەن اقىلدى ءۇي, پيك, اگروونەركاسىپتىك كەشەن جۇيەلەرىن اۆتوماتتاندىرۋ بويىنشا جوبالاردى ىسكە اسىراتىن «بىرەگەي باسقارۋ ءمودۋلى» جوباسىن تانىستىرعان «Double bro’s» كومانداسىنا ارنايى جۇلدە بەرۋ تۋرالى شەشىم قابىلداندى.
قورىتىندى سوزىندە استانا قالاسىنىڭ اكىمى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى مەملەكەت باسشىسى جولداۋىنىڭ ىسكە اسىرىلۋىنا ىقپال ەتەتىن مۇنداي ءىس-شارالاردى وتكىزۋدىڭ ماڭىزدىلىعىن, سونداي-اق, قازاقستاننىڭ يننوۆاتسيالىق دامۋىنداعى جاس ۇرپاقتىڭ بەلسەندىلىگى جوعارىلىعىن ەرەكشە اتاپ ءوتتى.
دينارا بىتىك,
«ەگەمەن قازاقستان»
