– شىنىمدى ايتسام, ءوز باسىم «استاناعا» قارسىلاس بولعانىمىزعا قۋانعان ەدىم. الايدا, 0:1 ەسەبىمەن جەڭىلگەنىمىز ازداپ قيىنداۋ بولدى. بىراق ەرتەڭگى ويىندا ءبارى باسقاشا بولادى دەگەن ويدامىن. ءبىز قورعانىسقا عانا كوڭىل ءبولىپ, ءوز مۇمكىندىگىمىزدى كۇتپەيمىز. ءوزىمىزدىڭ قۇرعان جوسپارىمىز دا بار. سونىمەن قاتار, ماتچقا 10 مىڭعا جۋىق جانكۇيەر كەلەدى دەپ ەستىدىم. بۇل جەردە ورىنسىز بولسا دا ءبىر سۇراق قويعىم كەلەدى. نە سەبەپتى وتىز مىڭ جانكۇيەر سىياتىن ستاديونعا از-اق ادام كەلىپ كورەرمەن بولماق؟ ارينە, ءبىز يسپانيانىڭ «اتلەتيكوسى» ەمەسپىز (كۇلدى). بىراق كوبىرەك ادام كەلەدى دەپ ۇمىتتەنەمىز.
– العاشقى ماتچتان كەيىن بىرقاتار اقپارات قۇرالدارى ءسىزدى جاقىن ارادا بەلارۋستىڭ «شاحتەر» كومانداسىنا اۋىسادى دەگەن مالىمەت تاراتتى. وسى تۋرالى قانداي پىكىر بىلدىرەسىز؟
– بۇل جەردە بىرنارسەنى ايتا كەتكىم كەلەدى. فۋتبولدا جىلدام شەشىم قابىلداۋ قاجەت كەزدەر بولىپ تۇرادى. بولاشاقتا بەلارۋستە جۇمىس ىستەيمىن دەگەن ويعا توقتالدىم. ازىرگە «سپارتاكتامىن», كوماندامنىڭ جەڭىسكە جەتۋى ءۇشىن بارىمدى سالامىن. ۇجىمداعى سوڭعى ويىندارىمنىڭ ءبىرى بولعاندىقتان «استانانى» جەڭۋ مەن ءۇشىن ماڭىزدىراق.
– دەمەك, بۇل ءسىزدىڭ «سپارتاكتاعى» سوڭعى ويىنىڭىز عوي؟
– بىلاي دەيىن, «شاحتەرمەن» كەلىسىم جاساماس بۇرىن «سپارتاكپەن» بىرگە ۆارشاۆاعا بارامىن دەپ كەلىسەمىن (كۇلدى).
– العاشقى ماتچ الدىندا پاتريك ءتۆۋماسيدى, يۆان ماەۆسكيدى ەرەكشە اتاپ ءوتتىڭىز. ال ويىننان كەيىن كىمدەر سىزگە ۇنادى؟
– ارينە, «استانادا» بىلىكتى ويىنشىلار جەتەرلىك. جارتىلاي قورعاۋشىلاردان بولەك, كابانانگانىڭ ويىنى ۇنادى. ونىڭ الەۋەتى جوعارى.
– قازاقستاندىق جانكۇيەرلەر «استانانى» سىرت الاڭدا ءىرى ەسەپپەن جەڭەدى دەپ ويلاعان. ال ءسىز ءۇشىن 0:1 بولىپ ۇتىلۋ قانشالىقتى قيىنعا سوقتى؟
– ءبىز گول جىبەرمەگەنىمىزدە سول قازىرگىدەن جاقسىراق ناتيجە بولار ەدى. ال «استانانىڭ» گول جىبەرمەۋى بالكىم بىزگە ساتتىلىك جولداس بولعان بولار. دەگەنمەن دە, گول سوقپاعان «استانانىڭ» كىناسى دەر ەدىم. سونىمەن قاتار, يۋرمالاداعى ماتچتان كەيىن استانالىقتاردىڭ الاڭ قۇرعاق بولدى دەگەن رەنىشىن ەستىدىم. قازاقستاندا مۇنداي ولقىلىق بولمايدى دەپ ويلايمىن.
– العاشقى ويىننان كەيىن نەگىزگى قۇرامعا وزگەرىس ەنگىزەسىز بە؟
– جوق, بۇل تۋرالى ەشنارسە ايتا المايمىن. قۇپيا بولىپ قالا بەرسىنشى.
– بولاشاعىڭىزعا قايتا ورالساق, وزىڭىزبەن بىرگە «شاحتەرگە» «سپارتاكتان» ويىنشىلار الىپ كەتەسىز بە؟
– ابدەن مۇمكىن. «استانادان» دا ويىنشىلار ساتىپ الىپ قالۋىم عاجاپ ەمەس (كۇلدى).
– العاشقى ويىندا قوس كومانداعا بارلىعى 10 سارى قاعاز كورسەتىلدى. بۇل ماتچتىڭ وتە دورەكى وتكەنىن بىلدىرمەيدى مە؟
– جوق, بۇل فۋتبولدىڭ ءبىر بولىگى. يرلانديالىق تورەشى بولادى دەگەن كەزدە مەن دە وسىلاي بولادى دەپ ىشتەي ويلاپ ەدىم.
– قاتەلەسپەسەم, استاناعا العاش رەت كەلىپ تۇرسىز. العان اسەرىڭىزبەن بولىسە وتىرساڭىز.
– قازاقستانعا العاش كەلىپ تۇرسام دا بۇل ەل تۋرالى, استانا تۋرالى كوپ نارسە بىلەمىن دەپ ايتا الامىن. ۇلى دالا ەلىندە مەنىڭ جاقىن دوستارىمنىڭ ءبىرى قىزمەت ەتكەن.
ايان ءابدۋالي,
«ەگەمەن قازاقستان»
