– ءبىرىنشى ويىننان كەيىن, ءبىر گول عانا ايىرماشىلىقپەن ۇتىلۋىمىز بىزگە اۋىر سوققانى راس. ءوز الاڭىمىزدا ءبىرىنشى تايمدا ازداپ ابدىراپ قالدىق. باپكەرىمىز مارەك زۋبتىڭ نۇسقاۋىنان جاڭىلىپ قالعانداي بولدىق. الايدا, ۇزىلىستە جاتتىقتىرۋشىمىزدىڭ اقىل-كەڭەسى كەلەسى 45 مينۋتتى جاڭا قارقىنمەن باستاۋىمىزعا سەپتىگىن تيگىزدى. ەندى جاۋاپتى ماتچ باسقاشا باعىتتا ءوربيدى دەپ ۇمىتتەنەمىز. دەگەنمەن, «استانانىڭ» ءوز الاڭىندا جەڭىلمەي كەلە جاتقانىن دا بىلەمىز. بۇل كەزدەسۋدە ءبىز جىلدام گول جىبەرىپ الۋدان ساق بولۋىمىز كەرەك. استاناداعى ويىندا يۋرمالاداعى ەكىنشى تايمداعى ويىنىمىزدى كورسەتەمىز دەپ ويلايمىن.
– «استانادان» كىمدى ەرەكشە اتاپ وتەر ەدىڭىز؟
– ءبىرىنشى كەزەكتە قاپتالدا ونەر كورسەتەتىن پاتريك ءتۆۋماسيدى ەرەكشە اتاپ وتەر ەدىم. ونىڭ جىلدامدىعى, دالدىگى قاتتى ۇنايدى. وعان قارسى لاتۆيا چەمپيوناتىندا بىرنەشە رەت وينادىم. ونىڭ جىلدان جىلعا دامىپ جاتقانىن بايقاي تۇسكەندەي بولامىن. وتە جىلدام ءارى تەحنيكالىق جاعىنان مىقتى ويىنشى. قاي كەزدە قانداي شەشىم قابىلداۋ كەرەك ەكەنىن جىلدام ويلاي بىلەدى. سوققىسى جويقىن. سونداي-اق, دجۋنيور كابانانگانىڭ دا ورنى ەرەكشە. ناعىز شابۋىلشىعا ءتان قاسيەتتەر ونىڭ بويىندا بار دەپ سەنىمدى تۇردە ايتا الامىن. بۇدان بولەك «استانانىڭ» ورتالىق تۇسىنداعى ويىنشىلاردىڭ ءبىر-ءبىرىن كوزبەن-اق تۇسىنىسە ءبىلۋى تاڭ قالدىرماي قويمادى.
– يۋرمالاداعى ويىندا 1500-2000 جانكۇيەر عانا بولدى. ەرتەڭ سىزدەر 30 مىڭعا جۋىق جانكۇيەردىڭ الدىندا ونەر كورسەتەسىزدەر. جاساندى الاڭى تاعى بار. بۇل سىزدەرگە كەرى اسەرىن تيگىزبەي مە؟
– مەنىڭشە, بۇل قايتا وڭ اسەرىن بەرۋى كەرەك. ستاديونعا نەعۇرلىم كوبىرەك ادام جينالسا بولسا, ويىنشىنىڭ دا بار قىرىنان تانىلا تۇسۋىنە اسەرىن بەرەدى دەپ ويلايمىن. ال جاساندى الاڭعا كەلەر بولساق, ءبىز ماۋسىمنىڭ باسىن سينتەتيكالىق الاڭدا وينادىق. سوندىقتان بۇل دا بىزگە ەش قيىندىق تۋدىرمايدى دەپ ويلايمىن.
– باس باپكەردىڭ كوماندادان كەتۋى ۇجىمعا كەرى اسەرىن تيگىزبەي مە؟
– بۇل ەندى فۋتبول عوي. مۇندا ءبارى بولۋى مۇمكىن. باپكەرىمنىڭ كوماندادان كەتىپ بارا جاتقانى ارينە وكىنىشتى. بىراق اركىمنىڭ ءوز تاڭداۋى بار عوي. باپكەرىمە العىستان باسقا ايتارىم جوق. بىرگە ءجۇرىپ بىراز كەمشىلىكتەرىمدى تۇزەدىم.
ايان ءابدۋالي,
«ەگەمەن قازاقستان»
