– ءبىزدى ماڭىزدى ويىن كۇتىپ تۇر. قازىر ءاربىر مينۋتىمىز ساناۋلى. كوماندامىز ەرتەڭ جوعارى دەڭگەيدە ونەر كورسەتۋى ءتيىس. العاشقى ماتچتا ۇتقانىمىزبەن, جاۋاپتى كەزدەسۋدىڭ وڭاي بولماسى انىق. ءبارىن جوسپارلى تۇردە جۇزەگە اسىرىپ, مۇمكىندىكتەرىمىزدى ءمۇلت جىبەرمەۋىمىز قاجەت.
– بۇل جولعى نەگىزگى قۇرام العاشقى ويىنعا قاراعاندا قانشالىقتى وزگەرۋى مۇمكىن؟
– يۋرمالاداعى ويىنعا قاراعاندا ايتارلىقتاي وزگەرىس بولادى دەپ ايتا المايمىن. سەبەبى, ءبىر اپتا ىشىندە جىگىتتەرمىز تولىعىمەن ءوز قالىپتارىنا كەلىپ ۇلگەردى.
– جاقىندا «سپارتاك» باپكەرى قىزمەتىنەن كەتتى. بۇل وزگەرىس لاتۆيالىقتارعا قانشالىقتى كەرى اسەرىن تيگىزۋى مۇمكىن؟ سونىمەن قاتار, العاشقى ويىندا قارسىلاستارىڭىزدىڭ قانداي باسىم تۇستارى بايقالدى؟
– مۇنداي وزگەرىستەر ۇجىمعا قانشالىقتى اسەر ەتەتىنى بەلگىسىز. الايدا, باس باپكەردىڭ قىزمەتىنەن كەتۋى جاقسى جاڭالىق دەپ ايتا المايمىن. «سپارتاك» وسال قارسىلاس ەمەس. بىراق ەكى كۇن ىشىندە وزگەرىس بولا قويادى دەپ ويلامايمىن. ال بىزگە باستىسى بوساڭسىماۋ كەرەك.
«سپارتاكتا» پوزيتسياسىن دۇرىس تاڭداي الاتىن ويىنشىلار جەتەرلىك. ءبىز شابۋىلدى ناتيجەلى اياقتاۋدى ويلاۋىمىز كەرەك. ارينە, ەڭ باستى ماقسات – كەلەسى كەزەڭگە جولداما الۋ. چەمپيوندار ليگاسىندا ءبارى ويناعىسى كەلەدى. سوندىقتان بۇل جەردە وڭاي قارسىلاس بار دەۋ قيسىنعا كەلمەس. ءار كوماندا جەڭىسكە جەتۋ ءۇشىن بارىن سالادى. ءبىز «استانا-ارەناداعى» جەڭىلىسسىز سەريامىزدى جالعاستىرامىز دەپ ۇمىتتەنەمىن. قولىمىزدان كەلسە ءبىرىنشى گول سوعۋعا تىرىسامىز, بولماسا, قاقپامىزعا دوپ جىبەرمەۋدى ماقسات ەتەمىز. بۇل كەزدەسۋدە 1:0 ەسەبىمەن جەڭسەك, سوعان قاتتى قۋانار ەدىم.
– ءۇشىنشى راۋندتىڭ جەرەبە ناتيجەسى تۋرالى قانداي ويداسىز؟
– بۇل جەردە ءبارى بەلگىلى دەپ ويلايمىن. «لەگيا» كەلەسى كەزەڭگە ءبىر تابان جاقىن تۇر. ازىرگە ءبارىن الدىن الا جوسپارلاۋعا بولمايدى. بۇل فۋتبول. مۇندا ءبارى بولۋى مۇمكىن. سول ءۇشىن بارلىق جايتقا الدىن الا دايىن بولۋىمىز كەرەك.
– «استانانىڭ» جازعى ترانسفەردەگى جۇمىسىنا كوڭىلىڭىز تولا ما؟
– جاڭادان ەكى ويىنشى كەلدى. ازىرگە توماسوۆتىڭ كەيبىر ماسەلەلەرگە بايلانىستى قاتىسا المايتىنى قيىنداۋ بولىپ تۇر. ءبىز تاعى ءبىر پوزيتسياعا جاڭا ويىنشى الۋدى جوسپارلاعان ەدىك. بىراق بۇل ويىمىز جۇزەگە اسپاي تۇر.
ايتا كەتەيىك, چەمپيوندار ليگاسىنىڭ ىرىكتەۋ كەزەڭىندە ەلوردالىق «استانا» لاتۆيانىڭ «سپارتاك» كومانداسىنا قارسى العاشقى ماتچتا 1:0 ەسەبىمەن جەڭىسكە جەتكەن بولاتىن. بۇل كەزدەسۋدە جالعىز گولدى پاتريك تۆۋماسي 73-مينۋتتا سوقتى.
ايان ءابدۋالي,
"ەگەمەن قازاقستان"
