الماتى وبلىسى, الاكول اۋدانىندا وتكەن دۋاتلون دوداسىنا قر مادەنيەت جانە سپورت ءمينيسترى ارىستانبەك مۇحامەدي ۇلى قاتىسىپ, جينالعانداردى جارىستىڭ اشىلۋ سالتاناتىمەن قۇتتىقتادى. مينيستر باسەكەگە باستان-اياق قانتىسىپ, بولىسىپ قانا قويماي, جارىس جولىنا شىققان 64 قاتىسۋشىنىڭ قاتارىندا ساپقا تۇردى. سونىمەن بىرگە, بۇل شاراعا ارنايى وليمپيادا ويىندارىنىڭ جەڭىمپازدارى ەرماحان يبرايموۆ, دانيار ەلەۋسىنوۆ جانە ادىلبەك نيازىمبەتوۆ كەلدى.
استانا مەن الماتى قالاسىنان, وبلىس ورتالىعىنان, سونداي-اق, وسى ولكەدەگى بەس اۋداننان كەلگەن سپورتشىلار تۋريستىك ولكە سانالاتىن الاكولدىڭ تازا اۋاسىندا سپورتپەن اينالىسۋ جانعا داۋا دەگەن پىكىردە. دۋاتلونعا قاتىسۋشىلار جارىس جولىنا 2 – 12 – 2 جۇيەسى بويىنشا شىقتى. ياعني, شاقىرىمنان ەكى مارتە جۇگىرۋ ارالىعىنداعى 12 شاقىرىمدى ۆەلوسيپەدپەن باعىندىردى. جارىستا سپورتشىلار جاس ەرەكشەلىكتەرىنە قاراي ءتورت توپقا ءبولىندى. جارىسقا كاسىپقويلارمەن بىرگە, الاكول جاعاسىنا دەمالۋعا كەلگەن تۇرعىندار دا قاتىسىپ, جارىس كوركىن قىزدىردى.
اشىلۋ سالتاناتىندا قر مادەنيەت جانە سپورت ءمينيسترى ارىستانبەك مۇحامەدي ۇلى, الاكول اۋدانىنىڭ اكىمى الىبەك جاقانباەۆ, قۇرمەتتى قوناقتار – وليمپيادا جۇلدەگەرلەرى لەبىزدەرىن جەتكىزىپ, ءوڭىر تۇرعىندارىن سپورتپەن شۇعىلدانۋعا, شاقىردى.
جارىسقا حالىقارالىق دارەجەدەگى باس تورەشىسى يۋري پورتنياگين تورەلىك ەتكەن جارىستىڭ ءۇش ساتىسىنان دا سۇرىنبەي وتكەن مينيستر جۇلدە قورىنان باس تارتتى. ۆەلوجارىس پەن جۇگىرۋدەن باسەكە قىزىپ جاتقان تۇستا ءۇشارال قالاسىندا ورنالاسقان زەينەپ قويشىباەۆا اتىنداعى اۋداندىق مادەنيەت ۇيىندە جەرگىلىكتى ونەرپازدار ونەر كورسەتىپ جاتتى.
جارىس قورىتىندىسى بويىنشا, 16 – 29 جاس ارالىعىندا قۇدايبەرگەن زەينوللاەۆ ءبىرىنشى بولىپ مارە سىزىعىن كەستى. ال 30 – 39 جاستاعى ۇمىتكەرلەر اراسىندا قايرات شايمۋردين, 40 – 49 جاس ارالىعىندا ءسابيت تايمەكەنوۆ توپ جاردى. جەڭىمپازدارعا مينيستر التىن مەدال, العىس حاتتار مەن باعالى سىيلىقتار تابىس ەتتى. جۇلدەلەردى سالتاناتتى تابىستاۋ راسىمىنە ۆيتسە-مينيسترلەر ساكەن مۇسايبەكوۆ پەن اسقار باتالوۆ, اكتەر ءادىل احمەتوۆ, سازگەر رەنات گايسين سىندى سپورت پەن ونەر جۇلدىزدارى دا اتسالىستى.
جەڭىمپازداردىڭ ەڭ جاسى الەم ءتورت, ال ءادىل بەس جاستا. تەمىرقۇلوۆتار وتباسىنان شىققان اعايىندى قوس ءبۇلدىرشىندى ارىستانبەك مۇحامەدي ۇلى ءوزى قۇتتىقتاپ, قولىنا كوتەرىپ قوشەمەت كورسەتتى. مينيستر ماراپاتتاۋدان كەيىن جۋرناليستەرگە سۇحبات بەرىپ, الاكول اۋدانىنىڭ اكىمدىگىنە سپورتتىق شارانى جوعارى دەڭگەيدە ۇيىمداستىرعانى ءۇشىن العىس ايتتى. سونداي-اق, جەتىسۋدىڭ جاقۇتى سانالاتىن الاكول جاعاسىندا ءتۋريزمدى دامىتۋ كەزەك كۇتتىرمەيتىن ماسەلە ەكەنىن تىلگە تيەك ەتىپ, كول ماڭىنداعى 500 مىڭ ادامدى قابىلداي الاتىن 144 تۋريستىك نىسان تۋرالى كەڭىنەن ءتۇسىندىرىپ ءوتتى.
سپورتتىق شارا اياقتالعان سوڭ مينيستر جاعاجايداعى كۇردەلى جوندەۋ جۇمىستارىمەن تانىسىپ, اقتوعايداعى تەمىرجول بەكەتى مەن ەلەكتر پويىزىنىڭ تۋريستەر ءۇشىن ماڭىزدىلىعى تۋراسىندا ءسوز قوزعادى. ءمينيستردىڭ ايتۋىنشا, ەگەر بۇل جوبالار تولىق جۇزەگە اسقان جاعدايدا قازاقستان مەن رەسەيدەن كەلەتىن تۋريستەر سانى بىرنەشە ەسەگە ارتپاق. مينيستر ساپار اياسىندا الماتى قالاسى مەن وبلىستا ورنالاسقان بىرنەشە تۋريستىك اگەنتتىك جەتەكشىلەرىمەن, دەمالىس ايماقتارىنىڭ باسشىلارىمەن كەزدەسىپ, ىشكى ءتۋريزمدى دامىتۋ توڭىرەگىندە تۋىنداعان ساۋالدارعا جاۋاپ بەردى.
الماس ءنۇسىپ,
«ەگەمەن قازاقستان»
الماتى وبلىسى
