شارادا اسا اۋىر قىلمىس جاساعانى ءۇشىن ازاماتتىقتان ايىرۋ مۇمكىندىگىن قاراستىراتىن زاڭناماعا ەنگىزىلگەن وزگەرىستەر تۋرالى ءسوز بولدى. «مەملەكەت باسشىسى «قر كەيبىر زاڭنامالىق اكتىلەرىنە ولاردى قر كونستيتۋتسياسىنىڭ نورمالارىنا سايكەس كەلتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا ۋاقىتىلى قول قويدى» دەگەن نۇرلان ەرمەكباەۆ ەندى تەرروريستىك جانە باسقا دا اسا اۋىر قىلمىس جاساعان قازاقستاندىقتار ازاماتتىعىنان ايىرىلاتىنىن ايتتى. بۇگىندە شەتەلدەردەگى لاڭكەستەر لاگەرىندە قازاقستاننىڭ 500 ازاماتى بار. تۋعان جەرىن تاستاپ, شەتەلگە تەرروريستىك قۇرىلىمدارعا قاتىسۋعا كەتكەن ادامدار وتانىنا وپاسىزدىق جاساعاندارعا تەڭەلەدى.
ەلباسى قازاقستان حالقى اسسامبلەياسىنىڭ XXV سەسسياسىندا جانە يمامدارمەن كەزدەسۋى كەزىندە ءوزىنىڭ ءجۇرىس-تۇرىسىمەن, سىرتقى كەلبەتىمەن قوعامدى جىكتەۋگە تىرىساتىن ادامداردى ايىپتاعان ەدى. ازاماتتاردى قانداي دا ءبىر ءدىندى نەمەسە ءدىني اعىمدى ۇستانۋى بويىنشا بولۋگە جانە ءوزىنىڭ ءدىني كوزقاراستارىن ادەيى جارنامالاۋعا جول بەرمەۋ تۋرالى دا از ايتىلىپ جۇرگەن جوق. زاڭ جوباسىندا قوعامدىق جەرلەردە ادامنىڭ بەت-كەلبەتىن تانۋعا كەدەرگى كەلتىرەتىن كيىمدەردى كيۋگە زاڭمەن تىيىم سالۋ ۇسىنىلادى. «قىزداردىڭ بەتتەرىن تۇمشالاپ قارا كويلەك كيۋى داستۇرىمىزگە دە, ۇلتىمىزعا دا جات نارسە. بۇل ءبىزدىڭ سانا-سەزىمىمىزگە دە, زاماناۋي دامىعان ەلدىڭ قوعامدىق ءتارتىپ پەن قاۋىپسىزدىك تالاپتارىنا دا سايكەس كەلمەيدى. بۇل تاياۋ شىعىس ەلدەرىنىڭ سول ايماقتىڭ اۋا-رايى مەن تۇرعىندارىنىڭ مادەني-تاريحي ادەت-عۇرىپتارى مەن سالت-داستۇرىنەن تۋىنداعان ايەلدەردىڭ ءداستۇرلى كيىمى», - دەپ اتاپ ءوتتى مينيستر.
سەمينارعا قاتىسقان اتىراۋ وبلىسىنىڭ اكىمى نۇرلان نوعاەۆ ەلىمىزدەگى قوعامدىق كەلىسىم, ساياسي تۇراقتىلىق, ۇلتارالىق, دىنارالىق كەلىسىم ەلباسى ساياساتىنىڭ جەمىسى ەكەنىنە توقتالدى. «مەملەكەت باسشىسى ءاردايىم تۇراقتىلىق ماسەلەسىن, حالىقتىڭ ءال-اۋقاتىن ارتتىرۋعا باعىتتالعان ءىس-شارالاردى جۇزەگە اسىرۋدى ءوز باقىلاۋىندا ۇستاپ وتىر. وبلىستى مەكەندەگەن جۇزگە جۋىق ءولت وكىلدەرى, كوپتەگەن كونفەسسيا وكىلدەرى بىرلىكپەن قىزمەت اتقارىپ كەلە جاتىر. ءار ايماقتا جاسالىپ جاتقان جۇمىستار جونىندە تاجىريبە ورتاعا سالىنىپ, پىكىر الماسىپ, وزەكتى ماسەلەنى بىرلەسىپ شەشۋگە باعىتتالعان مۇنداي شارالاردىڭ ماڭىزى زور», - دەدى ن.نوعاەۆ.
جيىندا باتىس وڭىرىندەگى ءدىني احۋال جايلى كەڭىنەن ايتىلدى. قر ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم دەپارتامەنتى ديرەكتورىنىڭ ورىنباسارى ز. ماقسۇتوۆا, اتىراۋ وبلىستىق پروكۋرورىنىڭ ورىنباسارى س. شالاباەۆ, اتىراۋ وبلىستىق ءدىن ىستەرى جونىندەگى باسقارما باسشىسى ق. كوشقاليەۆ, باتىس قازاقستان وبلىستىق ءدىن ىستەرى جونىندەگى باسقارما باسشىسى س. عيززاتوۆ, اقتوبە وبلىستىق ءدىن ىستەرى جونىندەگى باسقارما باسشىسى ج. قالماعانبەت, ماڭعىستاۋ وبلىستىق ءدىن ىستەرى جونىندەگى باسقارما باسشىسى ە. ەسبەرگەنوۆتەر بايانداما جاسادى. جۇمىس ساپارى بارىسىندا مينيستر ن. ەرمەكباەۆ قۇقىق قورعاۋ ورگاندارىنىڭ باسشىلارىمەن, اۋداندىق جانە وبلىستىق اكىمدىك جانىنداعى انتيتەرروريستىك كوميسسيا توراعالارىمەن, دەسترۋكتيۆتىك ءدىني اعىمدى ۇستانۋشىلارمەن كەزدەستى.
باقىتگۇل باباش,
«ەگەمەن قازاقستان».
اتىراۋ.
