ەلوردا تۇرعىندارى مەن قوناقتارىنا ارناپ سىر وڭىرىنەن 30-دان استام ءونىم تۇرلەرى جەتكىزىلدى. ونىڭ ىشىندە كۇرىش, ارا بالى, جەمىس-جيدەكتەر, كوكونىستەر بار.
– وتكەن جىلدان باستاپ باقشا ونىمدەرىن كورشىلەس رەسەي, قىرعىزستان ەلدەرىنە ەكسپورتقا شىعارىپ وتىرمىز. مىنە, وسىنداي ساپالى تاۋارلارىمىزدى ەكسپو كورمەسىن پايدالانىپ, ەلوردالىقتارعا دا ۇسىنۋدى ءجون كوردىك. ال قۇنى جاعىنا كەلەر بولساق, استانا اكىمدىگىمەن كەلىسە وتىرىپ, حالىققا قولايلى باعانى ۇسىنىپ وتىرمىز. بۇل جارمەڭكە ەلورداداعى كەز كەلگەن دۇكەننەن ارزان. تاعى ءبىر ايتارىمىز, بۇل ونىمدەر جەكە كاسىپكەرلەردىڭ تاۋارلارى, مەملەكەت ترانسپورت جاعىن قامتاماسىز ەتىپ وتىر, – دەدى قىزىلوردا وبلىستىق اۋىل شارۋاشىلىق باسقارماسىنىڭ باسشىسى باقىت جاقانوۆ.
قىزىلوردا وبلىسى جاھاندىق كورمە كەزىندە بارلىعى ءتورت جارمەڭكە جوسپارلاعان. بۇل جولى قۇنى 75 ملن تەڭگە بولاتىن ون ەكى كولىكپەن 200 تونناعا جۋىق ءونىم اكەلىندى. سىر وڭىرىنەن 26 تاۋار ءوندىرۋشىسى قاتىستى. وسىدان كەيىن 5-6 تامىزدا جانە 15-16 قىركۇيەكتە وتەدى. ول كەزدە ءونىم تۇرلەرى دە مول, باعا مۇنان دا تومەن بولماق.
قىزىلوردا مەن كۇرىش ەگىز ۇعىم, تۇتىنۋشىلار دا سونى كۇتەدى, سوندىقتان ۇيىمداستىرۋشىلار ونىمدەردىڭ ىشىندە كۇرىشكە باسا ءمان بەرىپ وتىر.
بۇل جارمەڭكەنى قىزىلوردا, اتىراۋ, اقمولا وبلىستارى بىرگە وتكىزىپ وتىر. اقمولا وبلىسى ءسۇت, ەت, جۇمىرتقا ونىمدەرىن جەتكىزسە, اتىراۋ تيىسىنشە تەڭىز ماڭايىندا ورنالاسقاندىقتان بالىق ونىمدەرىنە باسا ءمان بەردى.
جاز ايىنىڭ العاشقى ونىمدەرى قالاعا اۋىل شارۋشىلىعىنىڭ بەرەكەسىن الا كەلگەندەي. جارمەڭكەدەگى ادامداردىڭ قاتارى دا قالىڭ, ءبارى دە كوڭىلدى. ويلاعاننان تومەن باعاعا قالاعاندارىن الىپ, قالعاندارىنا كوز تويعىزىپ, كوڭىل سۋارىپ ارالاپ ءجۇر.
ايان ءابدۋالي,
«ەگەمەن قازاقستان»
