تۇرعىن ءۇي قۇرىلىسى كولەمى بويىنشا وبلىس استانا, الماتى قالالارىمەن جانە ماڭعىستاۋ وبلىسىمەن بىرگە كوشباسشىلار قاتارىندا. بۇل تۋرالى قىزىلوردا وبلىسىنىڭ اكىمى قىرىمبەك كوشەرباەۆ وبلىستىق ءماسليحاتتىڭ ەسەپتى سەسسياسىندا مالىمدەدى.
«حالىقتىڭ وزدەرىنىڭ جەكە تۇرعىن ۇيلەرىنىڭ كولەمى دە 74%-عا وسكەنىن ايتا كەتۋ كەرەك. بۇل جالپى حالىقتىڭ ءومىر ءسۇرۋ دەڭگەيىنىڭ ارتقانىن بىلدىرەدى. بيىل ءبىز «قىزىلوردا - جەزقازعان» تراسساسىنىڭ بويىندا تاعى 150 گا ۋچاسكەنىڭ تۇبەگەيلى جوسپارلاۋ جوباسىن ازىرلەۋدى اياقتادىق, بۇل تاعى 1200 وتباسىنىڭ ءوز تۇرعىن ۇيلەرىن سالۋىنا مۇمكىندىك بەرەدى», - دەپ اتاپ ءوتتى وبلىس اكىمى.
ءوڭىر اكىمدىگىندە حابارلاعانداي, نەسيەگە بەرىلەتىن تۇرعىن ءۇيدى حالىققا اناعۇرلىم قولجەتىمدى ەتۋ ءۇشىن «قازاقستاننىڭ تۇرعىن ءۇي قۇرىلىس جيناق بانكى» اق-نىڭ نەسيە بەرۋ كەزىندەگى باستاپقى جارنالارىن 30%-دان 15%-عا دەيىن تومەندەتۋ ماسەلەسى تالقىلانۋدا.
«حالقىمىزدىڭ الەۋمەتتىك-وسال توپتارىنىڭ مۇددەلەرىن قورعاۋ ماقساتىندا دا بىرقاتار شارالار اتقارىلىپ جاتىر. «تۇرعىن ءۇي قۇرىلىس جيناق بانكى» اق جاعدايدى باقىلاۋدا», - دەدى قىرىمبەك كوشەرباەۆ.
بيىلعى جىلدىڭ باسىنان بەرى مەملەكەتتىك قاراجات ەسەبىنەن 980 پاتەرگە ارنالعان 19 تۇرعىن ءۇي پايدالانۋعا بەرىلگەن, جىل سوڭىنا دەيىن بارلىعى 1809 پاتەرگە ارنالعان 41 كوپ پاتەرلى تۇرعىن ءۇيدى پايدالانۋعا بەرۋ جوسپارلانىپ وتىر, ونىڭ 11-ءى حالىقتىڭ از قامتاماسىز ەتىلگەن توپتارىنا ارنالعان (جالعا بەرىلەتىن تۇرعىن ءۇي).
