بەس گەكتار اۋماقتى الىپ جاتقان «نۇرلى جول» ساياباعىنىڭ جانىندا دراما تەاتر, وڭالتۋ ورتالىعى, نازارباەۆ مەكتەبى, جەكپە-جەك سارايى, ورتالىق باسسەين, و.رىپاكوۆا اتىنداعى جەڭىل اتلەتيكالىق مانەج سىندى سپورتتىق-مادەني نىساندار ورىن تەپكەن. جاسىل جەلەككە ورانعان ساياباقتىڭ قاق ورتاسىندا «نۇرلى جول» مونۋمەنتى ورنالاسقان. جوبا اۆتورى سارسەن سەيىتوۆتىڭ ايتۋىنشا, تۋىندى ەلىمىزدەگى بەرەكە-بىرلىك پەن ىرىس-ىنتىماقتى پاش ەتەدى. مەملەكەتىمىزدىڭ تۋى تۇستەس ستەللانىڭ قوس باعاناسى ءبىر جاعىنان ەۋروپا مەن ازيانىڭ ءتۇيىسۋىن بەينەلەسە, ەكىنشى جاعىنان, وسكەمەندەگى ەرتىس پەن ءۇلبى وزەندەرىن بەدەرلەيدى. ۇزىندىعى 22 مەتر مونۋمەنتتىڭ توبەسىنەن قالىقتاعان قىران بەينەسىن كورۋگە بولادى.
«مۇنداي دەمالىس ورنىن تاماشالاۋدىڭ ءوزى ءبىر عانيبەت. بۇل ساياباق وسكەمەن قالاسىنىڭ تۇرعىندارى مەن قوناقتارىنىڭ كوڭىلىنەن شىعادى دەپ ويلايمىن. ءوندىرىستى شاھاردا تاعى دا ءبىر جاسىل جەلەكپەن كومكەرىلگەن ورىننىڭ پايدا بولعانى قۋانتادى», - دەدى پرەزيدەنت.
ەلباسى ساياباق ءىشىن ارالاپ, زەينوللا ساماشەۆ, ابدەش تولەۋباەۆ, كارل بايپاقوۆ سىندى ارحەولوگتارمەن, وڭىردەگى ءىرى كاسىپورىندار مەن كاسىپكەرلەرمەن كەزدەسكەننەن كەيىن ايماقتىڭ قوعامدىق ۇيىمدارىنىڭ وكىلدەرىمەن تىلدەستى.
ەڭ الدىمەن ءسوز العان قازاقستان-امەريكا ەركىن ۋنيۆەرسيتەتىنىڭ پرورەكتورى مارينا كيكينا جاقىندا استاناعا ارنايى بارىپ, ەكسپو كورمەسىن تاماشالاپ, ەرەكشە اسەر الىپ قايتقانىن ايتتى.
«مەن سەمەي وڭىرىنەن كەلدىم. ءسىزدىڭ جاسامپاز ەڭبەگىڭىزدىڭ ارقاسىندا ەلىمىزدىڭ اسىعى الشىسىنان ءتۇسىپ تۇر. كۇرمەۋى قيىن ماسەلەلەردىڭ بارلىعى سارىارقا تورىندە شەشىمىن تاۋىپ جاتىر. قازىرگى ۋاقىتتا تورتكۇل دۇنيەنىڭ نازارى استانادا ءوتىپ جاتقان ەكسپو كورمەسىندە. كورمەنى ءوزىم دە تاماشالاپ قايتتىم. قالاشىقتىڭ قاق ورتاسىندا قازاقستان پاۆيليونىنىڭ قاسقيىپ تۇرعانىن كورىپ قاتتى قۋاندىم. بۇل – عاجاپ دۇنيە. ەكىنشى ايتارىم, قازىرگى تاڭدا قاسيەتتى سەمەي قالاسى كۇننەن كۇنگە كوركەيىپ كەلەدى. «نۇرلى جول» باعدارلاماسى مەن ءسىزدىڭ جاقىندا عانا جاريالانعان «رۋحاني جاڭعىرۋ: بولاشاققا باعدار» ماقالاسىنىڭ اياسىندا اۋقىمدى جۇمىستار جۇرگىزىلىپ جاتىر. قازىر سەمەيدە 20 كوپ قاباتتى ءۇي, 5 مىڭ ورىندىق «اباي ارەنا» ستاديونى سالىنىپ جاتىر. قالا حالقى بۇعان ريزا», - دەدى بۇدان كەيىن ءسوز تىزگىنىن العان سەمەي قالاسىنىڭ ارداگەرلەر كەڭەسىنىڭ توراعاسى امانتاي دوعالاقوۆ.
مەملەكەت باسشىسى سەمەي ءوڭىرىن اركەز نازارىنان تىس قالدىرمايتىنىن, قالادا جاسالىپ جاتقان جۇمىستاردىڭ بارلىعىن باقىلاپ وتىراتىنىن ايتىپ, قازىرگى تاڭداعى شىعىس قازاقستاننىڭ دامۋ قارقىنىنا جوعارى باعا بەردى.
«شىعىس ءوڭىرىن ەرەكشە جاقسى كورەمىن. بۇل – ۇلى ابايدىڭ, شاكارىمنىڭ, مۇحتاردىڭ ەلى. ءوندىرىستى ءوڭىر, يندۋستريالدى ولكە. اۋىل شارۋاشىلىعى وركەن جايعان ايماق. وبلىستىڭ دامۋ قارقىنى قۋانتادى. ايماقتىڭ بيۋدجەتى دە اۋقىمدى. وبلىس بيۋدجەتىنىڭ 60 پايىزى الەۋمەتتىك سالاعا باعىتتالىپ وتىر. اسىرەسە دەنساۋلىق پەن ءبىلىم سالاسىنا بولىنەتىن قارجى جىلدان جىلعا ۇلعايىپ كەلەدى. ءوڭىر 99 پايىز بالاباقشامەن قامتىلعان. بۇل – ەلىمىز بويىنشا ەڭ جوعارى كورسەتكىش. بيزنەستىڭ الەۋمەتتىك جاۋاپكەرشىلىگى اياسىندا دا از جۇمىستار اتقارىلىپ جاتقان جوق», - دەگەن پرەزيدەنت ەكسپو حالىقارالىق كورمەسىنىڭ ماڭىزدىلىعىنا توقتالىپ, بارشا قازاقستاندىقتاردى اۋقىمدى شارانى تاماشالاۋعا شاقىردى
ازامات قاسىم,
«ەگەمەن قازاقستان»
وسكەمەن
سۋرەتتەردى تۇسىرگەن: ءماناپ مۇرزاتاەۆ
