پلەنارلىق سەسسيا بارىسىندا قازاقستان دەلەگاتسياسىنىڭ باسشىسى ەقىۇ ءىس باسىنداعى اۆستريا توراعالىعىنا قولداۋ بىلدىرە وتىرا, قازاقستان پرەزيدەنتى نۇرسۇلتان نازارباەۆتىڭ باستاماسىمەن شاقىرىلعان 2010 جىلعى ەقىۇ ءسامميتىنىڭ استانا دەكلاراتسياسىندا بەكىتىلگەندەي, تۇتاس جانە بولىنبەيتىن ەۋرواتلانتيكالىق جانە ەۋرازيالىق قاۋىپسىزدىك قاۋىمداستىعىن ىلگەرىلەتۋگە باعىتتالعان ينكليۋزيۆتى ۇنقاتىسۋدىڭ ماڭىزدىلىعىن اتاپ ءوتتى.
ق.ءابدىراحمانوۆ قاۋىپسىزدىك سالاسىندا اعىمداعى جانە بولاشاقتاعى قاۋىپ-قاتەرلەرگە بايلانىستى, سونىڭ ىشىندە اۋماقتىق جانجالداردى رەتتەۋ, اسكەري بەلسەندىلىكتىڭ ءوسۋى, اسكەردىڭ ءبىر جەرگە جينالۋى جانە ونىڭ كەسىرىنەن ەقىۇ اۋماعىندا تۋىندايتىن اسكەري قاقتىعىستاردىڭ قاۋپىنە قاتىستى قۇرىلىمدىق ۇنقاتىسۋعا جاعداي جاسالعانىنا توقتالدى.
قازاقستان سىرتقى ىستەر ءمينيسترى لاڭكەستىككە اپاراتىن زورلىق-زومبىلىق ەكسترەميزمنىڭ الدىن الۋعا ارنالعان «دوڭگەلەك ۇستەلدە» جاھاندىق لاڭكەستىككە قارسى كۇرەس كواليتسياسى (جەلى), بۇۇ جاھاندىق لاڭكەستىكپەن كۇرەس ستراتەگياسى, لاڭكەستىك پەن زورلىق-زومبىلىق ەكسترەميزمگە قارسى جاھاندىق ءىس-ارەكەت كودەكسى مەن لاڭكەستىك ۇيىمداردىڭ تۇتاس ءتىزىمىن قۇرۋ تۋرالى ەلباسىنىڭ باستامالارىن ۇسىندى. سونىمەن بىرگە, قازاقستاننىڭ لاڭكەستىككە قارسى كۇرەس بويىنشا شارالارى, ءۇشىنشى جانە قوعامدىق سانانى جاڭعىرتۋ باعدارلامالارى مەن «كيبەر قالقان» باستاماسى جونىندە ماعلۇمات بەردى.
قازاقستان سىرتقى ساياسات ۆەدومستۆوسى باسشىسىنىڭ ۆەناعا ساپارى اياسىندا وتكەن كەزدەسۋلەرى مەن ەقىۇ دەباتتارىنا قاتىسۋى قازاقستان پرەزيدەنتىنىڭ بەيبىتشىلىك, قاۋىپسىزدىك پەن تۇراقتى دامۋعا باعىتتالعان باستامالارىنىڭ وزەكتىلىگى مەن قاجەتتىلىگىن كورسەتىپ بەردى.
