وسى جىلدىڭ 30 ءساۋىرى مەن 7 مامىرى ارالىعىندا تاشكەنتتە وتكەن ازيا چەمپيوناتىنىڭ قورىتىندىسىندا قازاقستان قۇراما كومانداسى 2017 جىلى گامبۋرگتە وتەتىن الەم چەمپيوناتىنا قاتىسۋ ءۇشىن 9 سالماق ساناتىندا ليتسەنزيا جەڭىپ العان.
ايتا كەتەرلىگى, وسى ايدا قازاقستان بوكس فەدەراتسياسىنا AIBA-دان 49 كەلى سالماق ساناتىندا الەم چەمپيوناتىنا قاتىسۋ قۇقىعىن جەڭىپ العان يندونەزيالىق بوكسشى كۆانگۋ لانگۋ ليتسەنزيادان باس تارتقاندىعى تۋرالى حابار جەتكەن بولاتىن. كۆانگۋ لانگۋ مەن قازاقستاندىق جومارت ەرجان تاشكەنتتە گامبۋرگكە جولداما ءۇشىن جۇدىرىقتاسىپ, يندونەزيالىق جەڭىپ كەتكەن ەدى. ەرەجەگە سايكەس بوكسشى جارىسقا قاتىسۋدان باس تارتسا, وندا ليتسەنزيا رەيتينگتە كەلەسى تۇرعان بوكسشىعا بەرىلەدى. قازاقستان بوكس فەدەراتسياسى AIBA ءوتىنىشىن قابىل الىپ, ۇلتتىق قۇراما كوماندامىزدىڭ مۇشەسى جومارت ەرجاننىڭ 2017 جىلعى الەم چەمپيوناتىنا قاتىساتىندىعىن راستادى. وسىلايشا, قازاقستان كومانداسى الداعى الەم چەمپيوناتىندا بارلىق سالماق ساناتى بويىنشا جارىس جولىنا شىعادى.
قازىرگى ۋاقىتتا جومارت كۇش جيناۋدا. گامبۋرگكە دەيىن ەلىمىزدىڭ قۇراما كومانداسى 2 جيىن وتكىزەدى. ونىڭ ءبىرى 12 شىلدە كۇنى الماتى وبلىسىنداعى بۇكىلالەمدىك بوكس اكادەمياسىندا باستالىپ كەتتى. ەكىنشى وقۋ-جاتتىعۋ جيىنى 10 تامىز كۇنى استانادا باستالادى.
