جامبىلدا قوعامدىق كەلىسىم كەڭەسىنىڭ وتىرىسى ءوتتى

اۋەلى قوعامدىق كەلىسىم كەڭەسىنىڭ توراعاسى, «نۇر وتان» پارتياسى جامبىل وبلىستىق فيليالى توراعاسىنىڭ ورىنباسارى شابدەن تىلەۋمۇرات اتالعان كەڭەستىڭ اتقارىلعان جۇمىستارىنا توقتالدى. «قازاقستان حالقى اسسامبلەياسىنىڭ ححV سەسسياسىندا ەلباسى نۇرسۇلتان نازارباەۆ قوعامدىق كەلىسىم كەڭەستەرىنىڭ ماڭىزدىلىعىن ەرەكشە اتاپ وتكەن بولاتىن. بۇل كەڭەستەر جالپىۇلتتىق امبەباپ پىكىرتالاس الاڭىنا اينالدى. سونداي-اق بيلىك پەن تۇرعىندار اراسىنداعى بەدەلدى قۇرىلىم حالىققا قىزمەت ەتىپ كەلەدى» دەدى شابدەن توقتاسىن ۇلى ءوز سوزىندە.

قازىرگى تاڭدا جامبىل وبلىسىندا 175 قوعامدىق كەلىسىم كەڭەسى جۇمىس ىستەيدى. ولاردىڭ ىشىندە وبلىستا 1, قالادا 2, اۋدانداردا 10, اۋىلداردا 153 جانە ءىرى مەكەمەلەردە 9 كەڭەس قىزمەت ەتەدى. اتالعان كاسىپورىندار قاتارىنا «قازفوسفات» جاۋاپكەرشىلىگى شەكتەۋلى سەرىكتەستىگى, «تارازەنەرگو» اكتسيونەرلىك قوعامى, «جامبىل جىلۋ» جانە «تاراز-سۋ» كوممۋنالدىق مەملەكەتتىك مەكەمەلەرى كىرەدى. قوعامدىق كەلىسىم كەڭەستەرىنىڭ جالپى مۇشەلەر سانى بۇگىندە 1025-كە جەتىپ وتىر.  

كەڭەس وتىرىسىندا جامبىل وبلىسى قازاقستان حالقى اسسامبلەياسى قوعامدىق كەلىسىم كەڭەسى توراعاسىنىڭ ورىنباسارى, وبلىستىق ءبىلىم باسقارماسىنىڭ ادىسنامالىق كابينەت مەڭگەرۋشىسى بيگەلدى تاجىباەۆ بايانداما جاساپ, «ماڭگىلىك ەل» جالپىۇلتتىق يدەياسى اياسىندا ءبىلىم الىپ جاتقان بالالارعا پاتريوتتىق تاربيە بەرۋدى ارتتىرۋ ماسەلەسىن ايتىپ ءوتتى. ال جامبىل وبلىسى قازاقستان حالقى اسسامبلەياسى حاتشىلىعىنىڭ باس مامانى ۇلتۋار باباقۇلوۆا جامبىل, بايزاق, تالاس جانە سارىسۋ اۋداندارىنداعى قوعامدىق كەلىسىم كەڭەستەرىنىڭ جۇمىس بارىسىن باياندادى.

وتىرىس سوڭىندا قاتىسۋشىلار پىكىر الماسىپ, قوعامدىق كەلىسىم كەڭەستەرىنىڭ جۇمىسىنا قاتىستى ۇسىنىستارىن جەتكىزدى.

حاميت ەسامان,

«ەگەمەن قازاقستان»                                                                                                        

جامبىل وبلىسى